Pakkasukon muatila (Velikii Ust'ug)

On otettu Рувики-späi
Nähtävys
Pakkasukon muatilat Velikii Ust'ugas
Pakkasukon taloi
Pakkasukon taloi
Mua Ven'a
Linnu Velikii Ust'ug
Rakendamine 2002

Pakkasukon muatilat Velikii Ust'ugas on yötiloin, kul'tuurг- da matkailuobjektoin kompleksu Ven'an uvvenvuvven temuatiekan da Velikii Ust'ug — Pakkasukon roindumua -valdivollizen projektan hantuzis 12 kilometrin piäs Velikii Ust'ug -linnaspäi. Puuston alovehel sijoitunnuos kompleksas pietäh ekskursieloi, teatrallizii ozutuksii da muasteripajoi Pakkasukonke da ven'alazen folklouran toizien piähengilönke. Joga vuottu rezidencieh tulou läs 240 tuhattu kirjastu lapsis da täyzi-igäzis (kolmas vuitti kirjazis) kogo muailmaspäi[1][2].

Projektan histourii da kehitys

Valdivolline matkailuprojektu "Velikii Ust'ug — Pakkasukon roindumua" pandih alguh 21. talvikuudu vuvvennu 1998 Voulogdan alovehen piämiehen V. Pozgalevan da Moskovan piämiehen J. Lužkovan yhtehizes käskys Ven'an histouriellizien kanzallizien perindölöin propagandakse. Projektan enzimäzeh ozah kuului lapsien lahjupoligruafien ilmahpiäständy, piirdovideoloin luajindu, Velikii Ust'ugas kogo Ven'an histourien da muantiijon školakilboin piendy, rezidencien puuston piäpluanan valmistandu[3].

Projektan toizeh ozah kuului kompleksan taloloin da huonuksien nostamine. Enzimäzenny objektois 25. talvikuudu vuvvennu 1999 virrallizesti avattih vestetty puuhine taloi — Velikii Ust'ugan Pakkasukon taloi. Taloi luajittih da nostettih puutevolližuon laitokset, kudamat tänäpäi kuulutah Voulogdan ven. «Сокольский ДОК»-laitokseh. Sidä valmistettih vuvven 1999 syvyskuus, kaksikerroksizen taloin korgevus on 23 metrii[4].

Vuvven 2002 allus Juriidizien yksikkölöin yhtehizeh valdivollizeh luvetteluh (ven. ЕГРЮЛ) rodih kirjutus ven. ОАО «ВОТЧИНА ДЕДА МОРОЗА»-yhtymän kirjalepanos (salvattu oraskuul vuvvennu 2007, nygöi hotelikompleksu ven. «Вотчина»), algavui hotelikodiloin da tarvittavan infrastruktuuran nostamine.

Vuvvennu 2024 rezidencies on 11 kodii gostih niškoi, restoruanoin verko da Lumitiähtyt-koufeilu (ven. «Снежинка»), ven'alaine kyly da sauna. Pakkasukon taloin ližäkse luajittih moizet matkailuobjektat kui Suarnoin troppu da kodi, Poštuozasto, Ruadopaja da Sepän paja, mustolahjoin laukku da Moudan taloi, Zooparku da Jiätikkö. Kompleksua sanotah Muatilakse (ven. Вотчина)[5][6][7].

Vuvvennu 2023 projektale rodih 25 vuottu. Logistiekan parandamizekse uvvistettih Velikii Ust'ugan lendoazemu da ruvettih käymäh erillizet matkalilujunat, vuvven aigah Pakkasukon muatilah kävyy läs puoldumiljonua matkailijua. Muatila kehitty ielleh: vuvvennu 2023 Voulogdan alovehen valdivovallan elimien johtajat allekirjutettih sobimuksen Ven'an hotelioperuattoranke "Cosmos Hotel Group", kudai kuuluu ven. АФК «Система» -korporacieh. Rezidencies roijah uvvet ekskursiet da matkailukohtat, 87 gektuaran alovehel nostetah hoteliloin kompleksu, sportu- da iloitusobjektua. Uuzi matkailuklasteru andau Voulogdan alovehele läs puoldutuhattu uuttu ruadopaikkua[8].

Geral'diekku

Pakkasukon štandartu
Pakkasukon gerbu, se pandih kirjale kezäkuul vuvvennu 2000

Velikii Ust'ugan Pakkasukon gerbu pandih kirjale Ven'an garal'diekkukolliegies. Sen piäozinnu ollah lumisuojusvehkeh, tunnussanat, hobjaine venču, kaksi suojusvehkehty pidäjiä kondiedu, oravaine, kelloine da igivihandan kuuzen oksat.

Suojusvehkehen taivahankarvaine väri merkiččöy hyväsydämelližytty, moitimattomuttu da kunnolližuttu, venču ozuttau omistajan suuruttu. Lumitiähten muodo da pakkasviehkurit yhtistetäh suarnallizen halliččijan hänen vallas olijan talvimuailmanke. Oravaine sanelou ruavonsuvaičendas, kondiet lujas väis. Kuuzi merkiččöy kyllytty da igästy elostu. Tunnussanat "Luaji hyvytty" pal'l'astetah ven'alazen suarnallizen piähengen muailman nägemykset da potakoijah ristikanzallizih tegoloih. Pieni kelloine lentan keskipuolel kirjutettuloin tunnussanoinke andau toivuo, ku hyvyön nimeh toivotut toivomukset täytytäh[9].

Pakkasukon poštan flagu

Pakkasukol on kaksi flaguu: oma štandartu da poštan flagu.

Taivahankarvazen štandartan keskel kuuzikolkazen hobjazen tiähten pohjal on omistajan pieni gerbu, kudaman mollembis puolis ollah nimen enzimäzet simvolat[10].

Ven'an kolmevärizen flavun värilöin mugah luajitun poštan flavun keskel on sarvi — vauhtikkahien poštukariettoin vältämätöi ominažus. Kaksi lumitiähtie vihjatah kirjazien suajah, Velikii Ust'ugan gerbu yhtistäy Muatilan kummallizen tevolližuon ymbäriolijan muailmanke[11].

Geral'diekkuozien kuvat luajittih da lahjoitettih linnale Jefim da Jelena Komarovskoit, Kogo Ven'an geral'diekkuyhtymäh kuulujat[12].

Tarin

Velikii Ust'ugan gerbas on kuvattu Vezimies (Neptun vaihtovalličuksellizen versien mugah). Vezimiehen käzis olijois kahtes kukšinaspäi valujat virrat merkitäh yhteh virduajii paikallizii jogiloi, kudamien yhtehine virdu andau allun Pohjaine Dvina -jovele[13]

Tarinan mugah (kirjuttai Ol'ga Kul'nevskaja), Vezimies oli Pakkasukon vahnembannu vellenny da elettih hyö Gleden-mäin ymbäristöl, ei loitton Velikii Ust'ug -linnaspäi. Neroniekkuvellekset hallittih jogiloin da järvilöin vezii, sežo lumii da vihmoi. Vezimies halličči vuvven lämmäl aigua, Pakkasukko rubei ruadamah talvikuun tulles. Kerran vellekset riidavuttih da Pakkasukko lähti kävelemäh muadu myöte. Käveli kaiken Pohjazen muapuoliškon Japounies da Loittozes Pohjazespäi Angliessah. Matkoin vuozis harmattuu da igävöittyy tuli järilleh Velikii Ust'ugah, kudamas halličči Vezimies. Velli sebäi Pakkasukon da kehoitti elosijan ei loitton linnaspäi halliččemah talviluonduo da luadimah kummua hyvyön nimeh[14][15].

Pakkasukon roindupäiviä pietäh 18. kylmykuudu, tämän päivymiärän Ven'alazen tiedoiniekan abuniekat tarkendettih vuvvennu 2005. Sit päiväs algajen Voulogdan alovehele tullah enzimäzet pakkazet[16].

Ekskursiet Muatilan matkailuobjektoi myöte

Keviäntulendundupruazniekku
Lapsien hyvittelyt vuvvennu 2017 Muatilan hyvittelylavvas

Jogapäiväzien ekskursiiohjelmien piäobjektat:

  • Suarnoin troppu. Kižat da kilvat viizahuon da lougiellizen ajattelun ozutandas omaluaduzes Joga Babas da labirintu Hämähäkin hämähäkis, sportusuarnalline valmistus da tansiloin urokku mečäs.
  • Sepän paja luvendonke tagomizen ruavos da nerolois.
  • Suarnoin kodi. Interaktiivukvestu nuorih jällettäjih niškoi, kudamil pidäy löydiä piäzy mökispäi, ku suas pellastua Uuzi Vuozi.
  • Zoosad lapsien ajeluttamizienke koiran val'l'ahis.
  • Paja. Uvvenvuvven čomenduksien da bobazien valmistandan muasteripajat.
  • Pakkasukon taloi. Ekskursii taloin 12 pertii myöte da leppeisydämelline pagin ven'alazen piätiedoiniekanke Valduistuinzualas.
  • Poštuozasto. Kirjazien ruokospiendysistieman da Pakkasukole lahjoitettuloin erinomazien kirjazien da lapsien luajilmuksien ozutandu[17].

Adressi kirjazien työndämizeh nähte — 162390, Voulogdan aloveh, Velikii Ust'ug, Okt'abrskii-kujo, kodi 1А, Ven'alazele Pakkasukole. Ga Ven'an poštu voi suattua kirjazii lyhendetyn adresin mugah: «Velikii Ust'ug, Pakkasukole». [18]

Kačo ližäkse

Huomavukset

  1. ↑ Объекты Вотчины. Дом Деда Мороза.
  2. ↑ Деду Морозу из Великого Устюга пришло более 4,5 миллионов писем. Cultinfo.ru (24. kylmykuudu 2023).
  3. ↑ Лужков Ю. М., Позгалев В. Е. Распоряжение «О реализации проекта "Великий Устюг - родина Деда Мороза"». Информационная компания «Кодекс» (21. talvikuudu 1998).
  4. ↑ В канун Нового года вспоминаем о строительстве терема Деда Мороза на его Вотчине в Великом Устюге (30. talvikuudu 2020).
  5. ↑ ОАО "ВОТЧИНА ДЕДА МОРОЗА", сводка. vypiska-nalog.com.
  6. ↑ О «Вотчине Деда Мороза». Гостиничный комплекс «Вотчина».
  7. ↑ Мероприятия. Дом Деда Мороза.
  8. ↑ Вотчина Деда Мороза станет туристическим кластером мирового уровня. РИА Новости (31. ligakuudu 2023).
  9. ↑ Памятов О. Геральдика Деда Мороза. Академия русской символики «Марс».
  10. ↑ Памятов О. Геральдика Деда Мороза. Академия русской символики «Марс».
  11. ↑ Памятов О. Геральдика Деда Мороза. Академия русской символики «Марс».
  12. ↑ Памятов О. Геральдика Деда Мороза. Академия русской символики «Марс».
  13. ↑ Герб города Великий Устюг: символ Нового Года в России, численность и описание родины Деда Мороза. Блог про гербы.
  14. ↑ Легенда. Дом Деда Мороза.
  15. ↑ Кульневская О. Братья. Проза.ру.
  16. ↑ Интересные факты про Деда Мороза. kp.ru.
  17. ↑ Мероприятия. Дом Деда Мороза.
  18. ↑ Чухнин И. Российский Дед Мороз получил 4 миллиона 582 тысячи 736 писем со всего мира. kp.ru (4. elokuudu 2023).
Lähteh - "https://olo.ruwiki.ru/w/index.php?title=Pakkasukon_muatila_(Velikii_Ust%27ug)&oldid=126162542"