Tähkäine (tyttiteatru)
| Tähkäine | |
|---|---|
 Vieljärven lapsien tyttiteatru "Tähkäine" | |
| Teatran tiippu | Karjalankieline tyttiteatru |
| Perustettu | 2015 |
| Teatran artistujoukko | Vieljärven školan opastujat |
| Ezityskohtat | Petroskoi, Karjalan tazavallan kylät |
| Teatran taloi | |
| Olopaikku | Karjalan tazavaldu, Priäžän kanzalline piiri, Vieljärven kylä |
| Johtokundu | |
| Taido-ohjuaju | Julija Jegorova |
Tähkäine on Karjalan tazavallan Vieljärven kyläs ruadai lapsien tyttiteatru. Teatru ozuttau spektakliloi karjalan kielen livvin murdehel.
Yleistiijot
Tyttiteatru on perustettu vuvvennu 2015. Silloi Petroskoin valdivonyliopiston karjalan da vepsän kielen ozaston loppenuh, endine Čičiliušku-tyttiteatran artistu Julija Jegorova tuli ruadamah omah Vieljärven školah. Häi rubei opastamah karjalan kieldy. Silaigua nuorele opastajale tuligi mieleh kerätä opastujii karjalankielizeh tyttiteatrah, kerdu ku vuozinnu 2009—2014 iče oli tundietun karjalankielizen Čičiliušku-tyttiteatran artistannu.
Omale teatrale vieljärveläzet vallittih pättävy nimi — "Tähkäine".
Julija Jegorova sellittäy:
Sen periä se on "Tähkäine", gu myö kaikin olemmo tyttiteatras yhtes, ihan kui jyvät ollah tähkazes kiini toine toizes, da vie sen periä, kui sanottih lapset, tähkäzes (ruis-, nižutähkäzes) luajitah jauhuo da pastetah leibiä, mugai meile, konzu äijän harjaittelemmo da ruammo, tulou äijy hyviä tulostu, uuttu ozutelmua.
— Kipinä, 2020 — № 8
"Tähkäine" ruadau Karjalan Kielen Kois.
Ohjelmisto
"Tähkäine" valmistau spektakliloi karjalan kielel. Nämmis vuozis kaččojat nähtih jo nelli "Tähkäzen" ozutelmua karjalan kielel:
- "Kirjavu kanaine",
- "Jänöin kyynälet"
- "Kodine",
- "Erilazet rattahat"
Kahtes enzimäzes spektaklis lapsil ollah kädeh pandavat tytit, kolmandes — planšiettutytit, niilöi artsitat liikutetah keppizien vuoh da kaiken ozutelman aigua olla kaččojien ies.
Omakse 10-vuozipäiväkse "Tähkäine" varusti da ozutti uvven spektaklin "Häkkine — tervattu bokkaine"[1].
Ozuttelumatkat da festivualit
"Tähkäine" matkustelou da ottau ozua lapsien teatroin festivualiloih. Teatrujoukko jo kolme kerdua oli Karjalaine suarnu -festivualis. Vuvven 2019 festivualis "Tähkäzen" Kodine-spektakli rodih voittajakse Suarnukomšaine-nominacies.
Vuozinnu 2019[2] da 2021 teatru otti ozua kuulužah Karjalan tazavallan lapsien da nuorižon tyttiteatroin Kuklantida-festivualih. Vuvven 2019 festivualis vieljärveläzet oldih ainavot, ket ozutettih spektaklin karjalan kielel.
Gallerei
Huomavukset
- ↑ Julija Jegorova. "Tähkäine": kymmenekse vuottu uuzi ozutelmu // Oma Mua. — 2025. — 23. heinykuudu (№ 28). — С. 3.
- ↑ Kuklantida-festivuali
Kirjalližus
Jelena Ruppijeva. Vieljärveläine tähkäine // Kipinä. — 2020. — Elokuu (№ 8).