Jänölöin alango

On otettu Рувики-späi
Nähtävys
Jänölöin alango
Долина зайцев Карелия 01.jpg
61°57′06″ с. ш. 34°14′02″ в. д.GЯO
Mua  Ven'anmua
Kuvanvestäi Sergei Gapanovič
Perustandan päivymiäry 2018
Verkosivusto iloverabbit.ru

Jänölöin alango (ven. Долина зайцев) on jänölöin kallivokuvat, muataijon taido-objektu. Sijaiččou kallivol 23 kilometrin piäs Karjalan tazavallan piälinnas Petroskoispäi[1][2].

Olendupaikku

250 metrii pitky kallivo on 23 kilometrin piäs Petroskoin linnas, federuallizen Kola-juaman vieres, Šuiskaja-stantsien da Čuppu-kylän välis[3].

Kuvailu

Joga jänöin elemental oman sijan kallivol ližäkse on vie oma nimi da oma histourii[4].

Kuvanvestäi Sergei Gapanovič yhtes Karjalan dizaineran Viktor Zaburdajevanke luadi pari kymmendy jänölöin kuvakuavua. Jogahizele häi andoi nimen da keksi histourien. Muga Lakki on paikalline liäkäri, kudai lieččiu meččyeläimii. Liluai-emäjänöi on starinoin da karjalazen mečän legendoin akkiloiččii, а Al’oša Knopočkin on fotokuvuaju, kudai kuvuau jänöiperehen tärgielöi tapahtumii.

Erähil on vakkiluadustu nimie: Lakki, Ahti, Liluai, Itu, T’oplii Veter, Sil’nii Duh. Ongi niilöin keskes tavallistu, ezimerkikse, Žorik, Sen’a, Petrovič, Alisa. On olemas kai kogonaine Lipkinoin pereh: Anatolii, Marus’a, Fed’a da Nadežga Patrikejevna. Kui sanou Sergei Gapanovič, jogahizel hänen jänölöis on tovelline ristikanzan prototiippu[5].

Puolet "kallivoeläjis" ollah hengikohtallizet. Konzu kuvanvestäjäl rodih jygei yksinäh rahoittua projektua, häi rubei myömäh jänölöi, enzimäi lahjoitukseh, jällel 3 tuhandes da 5 tuhandessah rubl’ua. Dengat häi pidi poltoaineheh da abulazien palkah, osti niilöih srojumaterjualua da kiven veständyruadobrujua.

Joga jänöih annetah tovesteh, kudamas on sen noumer[6].

Histourii

Kiven- da kuvanvestäi, koufieloin omistai Sergei Gapanovič algai projektan vuvvennu 2018[7]:

- Silloi, konzu minä innostuin kivenveständäh, mieleh tuli ajatus: voinhäi minä luadie mintahto moizen, mis vois tulla vie yksi Karjalan nähtävys? Mugai rodih idei vestiä täs jänölöi. Minuu ainos suututettih vandualoin tylgiet kirjutukset kallivoloil. Anna parembi täs rodieu pitkykorvua[8].

Piettih suuri varustusruado. Enzikse seiny kabrastettih kivilöis, kuduat hos konzu voidanus romahtuakseh piäle, sit azetettih srojutelinehet  (ven.) (olo. ruandakse kogo kallivon alovehele.

Toivehpiramiidazet kallivon vieres

Omale enzimäzele jänöile, teriämbi emäjänöile, Gapanovič pani nimen oman mučoin kunnivokse — Natalja Mihailovna.

Projektah niškoi luajittih verkosivusto. Enzimäi sie oli seiččie jänöin kuvua, myöhembäh niilöin lugumiäry kazvoi.

Jänölöin kuvien keskeh ilmestyttih dinozauru da pitsupala.

Vuvves 2024 lähtijen seinän viereh lad’d’atah kivipiramiidua da ezitetäh toivehtu.

Matkanjärjestäjät pietäh aktiivistu toimindua Jänölöin alango — Sampo-mägi — Martsial'noit viet — Kivačču -maršruutan kehittämizekse da edehpäi eistämizekse[9]. Nähtävyksellyö kävyndäkse järjestettih erilline matku[10].

Tehnolougii

Sergei Gapanovič ruadau yhtes omien dovarošoinke. Kävvähgi ruadoh rahvas omal tahtol[8].

Allukse seiny kolaitetah da puhtastetah. Sen jälgeh ruokitah kruaskan jället. Kirjutukset da kuvat otetah iäre silendys- da hivondukonehil libo hävitetäh hiimien ainehil[3].

Allus 1-2 santimetrin syvän kallivokuvan luadimizeh Gapanovičal meni kolmin čuassuloin, harjavumizien kehitettyy da neroloin suaduu aigu lyheni čuasussah.

Kivenveständymuasterit leikatah kallivuo kuvakuavoil  (ven.) (olo.. Mostu kuavua kuvanvestäjil vuvvennu 2019 oli läs kolmiekymmendy. Toine toizes net erotah muvvol da suuruol.

Arvostelu

Taido-objektoi sanotah Karjalan nygyaigazikse kallivopiirroksikse[5].

Palkindot

Vuvvennu 2022 objektu piäzi Ven'an kymmenen parahan taido-objektan joukkoh Tutu.ru -matkupalveluloin versien mugah[11][12].

Kui sih piästä

Jänölöin alangole voibi piästä omal mašinal, yhteiskunnallizel transportal libo ekskursiijoukos.

Omal mašinal Petroskoin linnan keskučaspäi Р-21 -dorogua myö pidäy ajua 23 kilometrii Kondupohjah päi. Kerras Šuiskaja-stantsien jälgeh tulou Murmanskan juamale eritazoliityndy, kudaman vieres on Jänölöin alango.

Petroskoin avto- da raududoroguvokzualoilpäi yhteiskunnallizel transportal suau piästä Šuiskaja-stantsiessah:

  • avtoubusal matkuaigu on 40 minuuttua, kävyy joga čuassuu;
  • sähköjunal matkuaigu on 20 minuuttua, kävyy kaksi kerdua päiväs[13].

Šuiskaja-stantsielpäi Jänölöin alangossah voibi piästä jallai libo mašinal. Jalgumatkah menöy läs 50 minuuttua. Р-21 Kola-juamaspäi pidäy astuo dorogua myö Hirvahan čurahpäi guazunjagobutkessah, kiändyö huruale da mennä sih kohtassah, kuspäi lähtöy kunnostettu meččytroppu. Mašinal voibi ajua 86К-18-juaman nelländeh kilometrissäh da enne hiuruu kiändyö huruale, Jänölöin alango roih oigiel puolel.

Ekskursiijoukonke päiväs voibi ehtie kävvä kaččomah ei vai Jänölöin alanguo, dai gi Kivaččuu, Sampo-mägie, Hirvahan tulimägie (pidäy vai tarkendua matkoin viettelijäl Jänölöin alangole kävyndiä).

Huomavukset

  1. ↑ Софья Сажнева. В Карелии создают "долину зайцев". Metro International (6. kevätkuudu 2019). Kačondan päivymiäry: 5. tuhukuudu 2026.
  2. ↑ Своя «Долина зайцев» появилась в Карелии — репортаж Пятого канала. АО Телерадиокомпания «Петербург» (8. elokuudu 2018). Kačondan päivymiäry: 5. tuhukuudu 2026.
  3. ↑ 1 2 Игорь Лукьянов. Карельский предприниматель превращает исписанную хулиганами скалу в арт-объект. ТАСС (26. heinykuudu 2018). Kačondan päivymiäry: 5. tuhukuudu 2026.
  4. ↑ Нас не будет, а зайцы останутся. Наскальное творчество вновь возрождается. Еженедельник "Аргументы и Факты" (20. sulakuudu 2018). Kačondan päivymiäry: 5. tuhukuudu 2026.
  5. ↑ 1 2 Виола Лехнович. Долина тысячи зайцев. Журнал "Русский мир" (5. kezäkuudu 2019). Kačondan päivymiäry: 5. tuhukuudu 2026.
  6. ↑ Долина зайцев: у каждого зверя появился личный номер. Газета "Карелия" (5. syvyskuudu 2018). Kačondan päivymiäry: 5. tuhukuudu 2026.
  7. ↑ Анна Гриневич. Счастливый человек Сергей Гапанович. газета "Карелия" (5. heinykuudu 2022). Kačondan päivymiäry: 5. tuhukuudu 2026.
  8. ↑ 1 2 Алина Чемерис. Карельский «дед Мазай» создал каменную «Долину зайцев» рядом с Петрозаводском. Комсомольская правда в Санкт-Петербурге (6. syvyskuudu 2020). Kačondan päivymiäry: 5. tuhukuudu 2026.
  9. ↑ О нашей поездке по маршруту «Долина Зайцев - Гора Сампо - Марциальные воды - водопад Кивач». petrsu.ru (23. kylmykuudu 2023). Kačondan päivymiäry: 5. tuhukuudu 2026.
  10. ↑ Экскурсии к «Долине зайцев» из Петрозаводска (рус.). experience.tripster.ru. Kačondan päivymiäry: 5. tuhukuudu 2026.
  11. ↑ Долина зайцев вошла в десятку необычных арт-объектов в России. Сетевое издание «Петрозаводск говорит». (26. pakkaskuudu 2022). Kačondan päivymiäry: 5. tuhukuudu 2026.
  12. ↑ Арт-объект «Долина зайцев» вышел в финал всероссийского конкурса. Филиал ФГУП ВГТРК ГТРК "Карелия" (17. kylmykuudu 2021). Kačondan päivymiäry: 5. tuhukuudu 2026.
  13. ↑ https://4trek.ru/dolina-zajcev.html (рус.) (28. oraskuudu 2025). Kačondan päivymiäry: 5. tuhukuudu 2026.
Lähteh - "https://olo.ruwiki.ru/w/index.php?title=Jänölöin_alango&oldid=126361150"