Kandeleh
| Kandeleh | |
|---|---|
| kandeleh | |
 10-kieline kandeleh | |
| Soitandan ezimerki | (viizikieline kandeleh) |
| Klassifikacii | Citra[1] |
| Sugusoittimet | kannel, kankles, kokles[1], gusli[2] |
 Медиафайлы на РУВИКИ.Медиа | |
Kandeleh (vie kannel) on karjalazien, vepsäläzien, suomelazien, inkeriläzien näppäilykielisoitin[3]. Kuuluu citran tiippah[1]. On yhty suguu eestiläzien kannel-soittimenke, litvalazien kankles-soittimenke, latvielazien kokles-soittimenke ven'alazien guslinke[2].
Rakendeh da histourii
Kandeleh on kielisoitin. Sen piäozat ollah puuhine rungo da jouhilois, jiändehis libo ravvas luajitut kielet.
Enzimäzet soittimet oldih viizikielizet da niilöin rungo kaiverdettih puus, yhtes libo kahtes palas. Kahtes ozas luajitus kandelehes oli rungo da kanzi. Kandelehen luadimizeh käytettih kuustu, mändyy, huabua da leppiä. Kandelehen vakku oli luajittu lepäs, kielien varret – koivus, kielet – jouhes. Laudoi rungon azumizeh ruvettih käyttämäh 1800-luvul.[4]
Nygözet kandelehet voibi jagua pienih (vähembi 15 kieldy) da suurih (kai 39 kieldy).[5]
Kandelehen kielih enne käytettih hebozen jouhiloi, ga jo 1700- da 1800-luvul oldih käytös raudukielet. "Vaskikandeleh" tarkoittau kandelehtu, kuduan kielet ollah vaskes. [6] Kazvoi kielien miärygi. Puaksumbah käytettih 5-, 10-, 12- da 16-kielisty diatounistu soitindu. Nygyaijal Karjalas on olemas kaksi kandelehen lajii: diatounine da hromuattine. Diatounizel kandelehel soitetah vaigu rahvahallistu muuzikkua, hromuattizel voibi soittua kui rahvahallistu, mugai klassillistugi muuzikkua.
Hromuattizen kandelehen luadii on Kalevalan runoloin keriäjy Elias Lönnrot. Vuozinnu 1830-1840 häi luadi kaksi hromuattistu kandelehtu, kudamis yksi nygöi on Suomen muzeis.
Nygyaijal luajitah pikkolo-, prima-, al'tu- da bassukandelehet.
Vahnimat tovestukset kandelehsoittimis (ezimerkikse, suomelazien kandeleh, eestiläzien kannel, latvielazien kokles [sanotah kuokles], litvalazien kanklės da ven'alazien gusli) ollah Novgorodan sego Pol'šan Opolen da Gdańskan 900–1400-luvulpäi olijoi arheolougizii löydölöi.
Kandeleh nägyy da kuuluu kanzanrunohuos, Kalevalas se on Väinämözen soitin. Suomenkielizes kantele–sanas on luajittu Kanteletar-nimi, kudai merkiččöy suomelazien kanzallizien runoloin kogomustu, kuduan Elias Lönnrot keräi da piästi ilmah kolmes ozas vuozinnu 1840—1841. Tar–suffiksu merkiččöy naispuoldu, toizin sanojen Kanteletar on Kandelehen tytär libo tämän soittimen soitandan muza-puolistai.
1930-luvun allus V. P. Gudkovan tiijollizen tutkimusinstituutan fol'klouruozaston ruadajan ohjuamizen mugah neroniekat Kl'uhin da Jamščikov luajitah hromuattizen kandelehen. Vuvvennu 1936 Karjalas oli perustettu valdivolline Kantele-ansambl'u, kudaman johtajannu oli V. P. Gudkov.
Suomes 1970-luvus algajen ruadau Kanteleliitto. Jyväskyläs ruadau Suomen kandelehmuzei.
Kandelehensoittuo on opastettu Sibelius-Akadiemies Helsinkis, nygözes Taidoyliopistos, omannu opastusainehennu vuvves 1987.[7][8]
Nägevy panos hromuattizien kandelehien luajindah pandih neroniekat Kl'uhin, Jamščikov, Kristal, Kuk, Čelombit'ko, Frolov, Smolin.
Kandelehsoittimet eri rahvahil
- karjalazet: kandeleh
- latgallat: kūkles ja kūkle
- latvielazet: kokles ja kokle
- liiviläzet: kāndla
- liettualazet: kanklės
- marit: kärš ja kysle
- puolalazet: gęśle
- suomelazet: kantele, kannel
- tatuarat: guslja, göslja ja keslja
- čuvašat: kesle, kjosle ja kysle
- udmurtat: krez
- ukrainalazet: husli
- valgoven'alazet: gusli
- vadjalazet: kannõl, gusli ja guusla
- ven'alazet: gusli
- vepsäläzet: kandel, stribunik
- eestiläzett: kannel
Kandelehelsoitto
Kandelehtu soitetah pidäjen sidä piduzin polvil libo stolal. Kanzanomastu kanneldu soitetah näppäilendäl kielilöi da jätändäl net puaksuh soimah, ga yhtelläh taidosoitos käytetäh iänen sammutindu.
Kandelehel soittajes kielilöi näppäilläh tavan mugah oigiel käil, hurual käil soitetah madalil kielil. Puaksumbah kandelehet on viritetty diatounizesti. Viizikieline kandeleh on tavan mugah viritetty D-duurih (d–e–fis–g–a) libo vastavah mollih (d–e–f–g–a), ga tostugi viritysty käytetäh.
Kandelehel soitetah soluo, myödäh soitetah kanzallizen eeposan Kalevalan runoloin mugah.
Gallerei
- РунопевецКарелия.jpg
Anukselaine runonpajattai muanruadai. XX vuozisuan algu
Karjal-suomelazen socialistizen nevvostotazavallan soittajat II Muailman nuorižon da studentoin festivualis (Budapeštu, vuozi 1949)
38-kieline konsertukandeleh
Huomavukset
- ↑ 1 2 3 БРЭ, 2008.
- ↑ 1 2 Гусли // Большая российская энциклопедия. Том 8. — М., 2007. — С. 184
- ↑ Семакова, 2009.
- ↑ http://etno.net/soitin/kantele, Kantele, Sibelius-Akatemian kansanmusiikin aineryhmä, etno.net, 31.7.2015
- ↑ http://etno.net/soitin/kantele, Kantele, Sibelius-Akatemian kansanmusiikin aineryhmä, etno.net, 31.7.2015
- ↑ http://www.temps.fi/soitin/ Kastinen Arja, Temps Oy, 31.7.2015
- ↑ http://www5.siba.fi/studies/degrees-and-programmes/piano/about-us/-/asset_publisher/EaCeBi1iSpYj/content/sibelius-akatemian-kanteleopetus-viettaa-25-vuotisjuhliaan?redirect, Sibelius-Akatemian kanteleopetus viettää 25-vuotisjuhliaan, 2012, Sibelius-Akatemia|Viitattu = 31.7.2015
- ↑ https://web.archive.org/web/20150923151936/http://www.uniarts.fi/siba/harmonikka-kitara-kantele, Harmonikka, kitara ja kantele, Taideyliopisto,31.7.2015}}
Kirjalližus
- Blomster, Risto (toim.) 2009: Kantele, Kirjoittaneet Pekka Jalkanen, Heikki Laitinen ja Anna-Liisa Tenhunen. SKS:n teoksia 1225, Helsinki: Suomalaisen Kirjallisuuden Seura, ISBN 978-952-222-101-8
- Dahlblom, Kari 2011: Keski-Suomen kantele, Äänekoski, Kari ja Tuula Dahlblom, ISBN 978-952-92-9447-3
- Kastinen, Arja & Rauno Nieminen & Anna-Liisa Tenhunen: Kizavirzi. Karjalaisesta kandelehperinteestä 1900-luvun alussa. Temps Oy 2013.
- Nieminen, Rauno – Väänänen, Timo – Rossander, Meri-Anna 2011: Kantele eläväksi, Nurmes: Nurmeksen museo, ISBN 978-951-96797-3-0
- Nieminen, Rauno 1984: Viisikielisen kanteleen rakennuspiirustuksia, Kaustinen: Kansanmusiikki-instituutti, ISBN 951-95411-1-X
- Гаврилов М. И. Звучи, моё кантеле: Из репертуара кантелиста М. Гаврилова. — Петрозаводск, 1995.
- Кантеле // Большая российская энциклопедия. Том 12. — М., 2008. — С. 749.
- Кантеле // Музыкальная энциклопедия. Том 2. — М.: Советская энциклопедия, 1974. — Стб. 700—701.
- Семакова И. Б. Кантеле // Карелия. Энциклопедия. Том 2 / Гл. ред. А. Ф. Титов. — Петрозаводск: ПетроПресс, 2009. — С. 16.
- Соловьёв Н. Ф. Кантеле // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
- Кантеле [Ноты]: самоучитель игры / авторы текста Т. П. Вайнонен, М. И. Гаврилов. — Петрозаводск: Карелия, 1985. — 118 с. : ил.
- Семакова И. Б. О типологии карельских долблёных кантеле // Кантеле: Вопросы теории и исполнительства. — Петрозаводск, 2001.
- Шишканова И. В. Кантеле. Ступени к совершенству. — Петрозаводск, 2008.
- Михайлова Н. С. Карельское кантеле: традиции и современность // Рябининские чтения 2011. — Петрозаводск: Карельский научный центр РАН, 2011. — С. 329—331. — 565 с.
Linkat
- Kandelehliitto
- Kandeleh taipuu vaikka rokkiin. Yle Helsinki 21.1.2012.
- MuT Arja Kastinen: Soitin (temps.fi)
- MuT Arja Kastinen: Esitykset (temps.fi)
- Soitinrakentaja Jussi Laasasen kandelehsivut.