Elias Lönnrot

Tarkastettu kirjutus

Elias Lönnrot
Elias Lönnrot B. Rainhol'dan kuvas (1872)
Roindupäivy	9. sulakuudu 1802(1802-04-09)
Roindukohtu	Sammatti, Ruočin Suomi, Ruočči
Kuolendupäivy	19. kevätkuudu 1884(1884-03-19) (81 vuozi)
Kuolendukohtu	Sammatti, Uusimaa, N'ulandan gubernii, Suomen Suuri kniäzikundu, Ven'an valdukundu
Kanzalližus	Ruočči, Suomen Suuri kniäzikundu
Toimindu	Kielentutkii, folkloristu, Kalevala-eeposan luadii
Akku	Maria Piponius
Palkindot da arvonimet	Pohjantiähten kunnivomerkin suuri ristu (1748—1975, Ruočči) Pour le Mérite -kunnivomerki (Prusii) Pyhän Annan 3. astien kunnivomerki Pyhän Stanislavan 2. astien kunnivomerki
Медиафайлы на РУВИКИ.Медиа

Elias Lönnrot (9. sulakuudu 1802 — 19. kevätkuudu 1884) on Suomen kielentutkii, folkloristu, karjal-suomelazen Kalevala-eeposan luadii.

Eloskerdu

Elias Lönnrot rodivui sovanombelijan perehes Sammatti-prihodas, kudai sih aigah kuului Ruočin kuningaskundah (nygöi Sammatti kuuluu Suvi-Suomen Uusimaan muakundah). Pereh eli köyhästi, Eliasan tuattah duumaičči, ku poigu sežo rodieu sovanombelijakse, ga Elias ahkerah opastui da sai korgeiškolan opastuksen.

Tammisaaren, sit Turkun školan loppiettuu Lönnrot piäzi vuvvennu 1822 opastumah Åbon kuningahan akadiemieh yhteisgumanituarizele tiedokunnale, kudaman loppi vuvennu 1827. Samannu vuon puolisti väitösruavon nimel "Väinämöine, muinas-suomelazien Jumalu" (latinan kielel).

Jälles opastui Helsingforsan yliopistos liäkärikse, loppi sen vuvvennu 1832 da sai liečetiedoalan douhturin oppiarvon.

Vuvven 1833 allus sai piiriliäkärin virran Päivännouzu-Suomes Kajaanis, kus eli 21 vuottu vuvven 1853 loppussah. Liäkärinny ruadajes otti ozua holeran kulgiitavvin vastustamizes Suomes, ičegi voimatui sih.

"Kalevalan" enzimäine painos (1835)

Kajaanis eläjes Lönnrot rubei keriämäh karjal-suomelastu folklourua, muinazii eeppizii runoloi, sananpolviloi da sananpiälöi. Tämä ainehisto tuliel aigua rodih Kalevala-eeposan pohjakse. Sen luadijannu Lönnrot rodih kuulužakse kogo muailmas.

Lönnrot ajeli Suomen da Ven'an Karjalah 11 kerdua (1828—1842).

Matkois astui jallai, oružan da sumčanke selläs, libo soudi venehel. Hänen matkoin tarkoituksennu enne kaikkie oli folklouru da kieli, ga hänen matkukirjutuksis on kallehii muantiedo- da kodialovehtiedoloi tielöis da kullendutavois, mualois, järvilöis, jogilois, eländykohtis, rahvahis, eloksentavois da ruadolois, talovuollizes tilas, uskondolois, liäkärin abulois da muus.

Ven'an Karjalan pohjazes Lönnrot vastavui tundiettuloin runonpajattajien Arhippa Perttuzen da Vassila Kieleväzenke.

Vuvvennu 1835 häi kogonah keräi "Kalevalan" runot yhteh kniigah.

"Kalevalan" enzimäine painos nägi päivänvalgien vuvvennu 1835, toine – 1849.

Vuvvennu 1836 Elias Lönnrot perusti Mehiläinen-žurnualan, kudai Suomes rodih enzimäzekse aijanmugazekse literatuuružurnualakse.

Lönnrotal kaikis pitkevimänny da jygevimänny oli matku vuozinnu 1836—1837. Matkan enzimäzen puoliškon aigah tutkii oli pohjazes: Uhtuon, Kieretin, Kovdan kauti kävyi Kandalehteh da Kuolah Kuolanniemimual, Petsamoh da Suomen pohjazeh.

Vuvvennu 1839 piäzi ilmah Lönnrotan ruado "Suomelazen muanruadajan kodiliäkäri".

Hänen jälgimäzen matkan tarkoituksennu Karjalua myöte oli karjalan kielen murdehien tutkimine da materjualan keriändy ruočči-suomelazen sanakniigah nähte. Vuvvennu 1841 Lönnrot kävyi Petroskoih.

Elias Lönnrot perehenke. Vuozien 1860 algu

Kalevala-fontuanu Elias Lönnrotan nimizes puustos Petroskois

Vuozinnu 1841—1842 yhtes Matias Kastrenanke kävyi suureh etnogruaffizeh da kielellizeh tutkimusmatkah Lappih.

Paiči omua piäruaduo "Kalevalua" Lönnrot julgai suomen rahvahan liiriekan antolougien Kanteletar-kogomuksen (1840—1841), Suomen rahvahan sananpolvet- (1842) da Suomen arbaitukset -kogomukset (1844).

Vuvvennu 1844 jallai astujes Derptaspäi Helsingforsah Piiterin kauti Lönnrot kirjutti ižoralastu folklourua Kotlin kyläs.

Vuvven 1850 sulakuus algajen Lönnrot oli Berlinan kuningahan akadiemien kunnivojäsenenny. Vuvvennu 1853 händy kučuttih suomen kielen da literatuuran professorakse Helsingforsan yliopistoh. Vuvvennu 1859 Lönnrotua vallittih Vengrien tiedoakadiemien kunnivojäsenekse.

Vuvvennu 1860 painettih Lönnrotan ruado "Suomen kazvimuailmu".

Vuvvennu 1862 Elias Lönnrot jätti professoran virran da muutti roindukyläh Sammattih.

Elias Lönnrotua tundietah kaksiozazen Suomi-ruoččilazen sanakniigan luadijannu (1867—1881). Äijät terminät, kudamat nygöi ollah suomen kielen tiedoterminolougien vältämättömänny ozannu (semmite filolougien da kazvitiijon alal), ollah hänen luajitut.

Vuvvennu 1876 Lönnrotua vallittih Imperuattoran tiedoakadiemien kunnivoakadiemiekakse. Lönnrotan monivuodizel ystävyöl Ven'an tiedomiehen Jakov Grotanke, sežo hänen yhtevyksil Ven'an literuattoroin P'otr Pletn'ovan, Panteleimon Kulišan da toizienke oli suuri histouriellis-literatuurine merkičys.

Elias Lönnrot kuoli 19. kevätkuudu vuvvennu 1884 omas roindukyläs Sammatis 82 vuvven ijäs.

Kirjutukset

• Flora Fennica. Suomen Kasvisto. — Koelma, Hels., 1860.

da toizet.

Musto

• Suuren Ižänmuallizen voinan aigah suomelazien okkupacien aigah (1941—1944) Petroskoin Puškinan uuličču sai Elias Lönnrotan nimen.
• Hänen nimi on annettu uuličale Helsinkin keskukses, sil uuličal on tiedomiehen mustopačasgi.

Elias Lönnrotan da "Kalevalan" piähengilöin mustopačas Helsinkis

• Elias Lönnrotan nimi on annettu Petroskoin suomi-ugrilazele školale.
• Elias Lönnrotan pieni puusto on Petroskoin keskučas Kirovan da Sverdlovan uuličan ristavukses, sie on luajittu fontuanu Kalevala-eeposan hengilöin kunnivokse.
• Sordavalas vuvvennu 1978 avattih mustomerki Elias Lönnrotan kunnivokse.
• Kalevalas on Lönnrotan pedäi, kudaman al tarinan mugah vuozinnu 1830 istui kirjuttamas runoloi Elias Lönnrot.

Kirjalližus

• Лёнрот Элиас / Марцина И. Ю. // Куна — Ломами. — М. : Советская энциклопедия, 1973. — (Большая советская энциклопедия : [в 30 т.] / гл. ред. А. М. Прохоров ; 1969—1978, т. 14).
• Григорьев С. В. Биографический словарь «Естествознание и техника в Карелии». — Петрозаводск: Издательство «Карелия», 1973
• Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. С. 161—464 с.: ил., карт. ISBN 978-5-8430-0125-4 (т. 2)
• Карху Э. Г. Элиас Лённрот — жизнь и творчество. — Петрозаводск, 1996
• Каунконен В. Элиас Леннрот, великий учёный карело-финского народа. — Изв. АН СССР. Отделение литературы и языка, 1952, т. 11, в. 5
• Марцина И. Ю. Лёнрот // Краткая литературная энциклопедия / Гл. ред. А. А. Сурков. — М. : Советская энциклопедия, 1967. — Т. 4. Лакшин — Мураново.
• Маямаа Р. Элиас Лённрот // Сто замечательных финнов : Калейдоскоп биографий : [арх. 5 pakkaskuudu 2022] / ред. Т. Вихавайнен; пер. с фин. И. М. Соломеща. — Хельсинки : Общество финской литературы, 2004. — 814 с. — ISBN 951-746-522X. (Сто замечательных финнов)

• Путешествие Элиаса Лённрота: Путевые заметки, дневники, письма. — Петрозаводск, 1985
• Maailman kirjat ja kirjailijat. — Toim. T. Anhava, Hels., 1957
• Tarkiainen V., Kauppinen E. Suomalaisen kirjallisuuden historia, 2 painos. — Hels., 1961
• Laitinen K. Suomen kirjallislius 1917—1967, 2 painos. — Hels., 1970.
• Antila A. Elias Lönnrot — elämä ja toiminta. — Hels., 1985.

Linkat

• "Kalevala" ven'an kielel, Eino Kiurun da Armas Mišinan kiännös