Karjalan tazavallan muuzikkuteatru

Karjalan tazavallan muuzikkuteatru
Endizet nimet	Karjalan avtonoumizen socialistizen nevvostotazavallan valdivolline muuzikkuteatru
Perustettu	1955
Teatran taloi
Olopaikku	Ven'a, Karjalan tazavaldu
Adressi	Petroskoi, Kirovan lagevo, 4
Arhitektoru	Savva Grigorjevič Brodskii
Synnyndy	607
Ven'an Federacien kanzoin kul'tuuruperindön objektat
Johtokundu
Virgulaitos	Karjalan tazavallan kul'tuuruministerstvu
Johtai	Larionova Jelena Gennadjevna
Piädirižoru	Sin'kevič Mihail Aleksandrovič
Piäbaliettumestari	Simonov Kirill Aleksejevič
Piähormeisteru	Zorin Aleksandr Dmitrijevič
Verkosivusto	Virralline verkosivusto
Медиафайлы на РУВИКИ.Медиа

Karjalan tazavallan muuzikkuteatru (ven. Музыка́льный теа́тр Респу́блики Каре́лия) on valdivolline teatru, kudai ruadau Petroskois. Teatran ohjelmistos on ouperua, baliettua, operiettua, muuzikkukomiediedu sego m'uziklua.

Teatran histourii

Nimet

• 1955—1956 — Karjal-suomelazen nevvostotazavallan muuzikku- da druamuteatru;
• 1956—1968 — Karjalan nevvostotazavallan muuzikku- da druamuteatru;
• 1968—1991 — Karjalan nevvostotazavallan valdivolline muuzikkuteatru;
• Vuvves 1991 nygypäivissäh — Karjalan tazavallan muuzikkuteatru;

Taloin histourii

Muuzikkuteatran nostanduruavot Petroskois Kirovan lagevol algavuttih vuvvennu 1952. Enne Muuzikkuteatran sijal oli kirikkö. Se riičittih vuvvennu 1936. Muuzikkuteatran projektan azuttih Nevvostoliiton kul’turuministerstvan Giproteatr-nimizen instituutan arhitektorat S. G. Brodskii, A. P. Maksimov da E. N. Čečik. Kuigi Moskovan Bol’šoi-teatral da Piiterin Aleksandran teatral, Karjalan muuzikkuteatral on kuuzi suurdu kolonnua. Teatran ulgotiloin, Kanzoin ystävys -vestoksen sego toizien pihavestoksien projektan azui Nevvostoliiton rahvahan taidoilii Sergei Kon’onkov.

Muuzikkuteatran nostanduruavot loppevuttih vuvvennu 1955. Kačonduzualah syndyy 607 hengie.

Ezihistourii

Vie vuozinnu 1919—1920 Petroskois ruadoi Kamernoi muuzikkuteatru. Se kuului Anuksen gubernien muanruadajien, ruadajien da ruskien armien deputuattoin toimehpaniikomitietan Rahvahan opastuksen ozastoh.

Perustandan histourii

Nevvostoliiton Ministroin Nevvoston käskys 20. oraskuudu vuvvennu 1955 Tazavallan ven'alazen druamuteatran pohjal perustettih Karjal-suomelazen socialistizen nevvostotazavallan muuzikku- da druamuteatru.

Muuzikkuartistujoukkoh kuuluttih enimilleh Ven'an teatrutaijon instituutan loppenuot, heidy kučui Petroskoih teatran enzimäine johtai S. P. Zvezdin. Horah da orkestrah tuldih Petroskoin muuzikkuopiston loppenuot.

Teatru avattih 5. kylmykuudu vuvvennu 1955 Isaak Dunajevskoin operietal ven. «Вольный ветер», kudaman ezitti nuorižon muuzikkuartistujoukko. Druamuartistujoukko avai oman enzimäzen kavven uvves talois Nikolai Pogodinan ozutelmal ven. «Кремлёвские куранты».

Enzimäzien ozuttelijoin joukos oldih A. G. Bondarenko, I. S. Gridčina, V. A. Kliš, D. S. Utikejev, L. N. Hramov, S. I. Gubina, S. Š. Kalinskii da muut.

Teatran enzimäzenny ohjuajannu oli L. M. Vil'kovič, orkestranohjuajannu — B. N. Pinskii, baliettumuasterinnu — K. V. Stavskii.

Vuvvennu 1956 uudeh teatrutaloih muutti Tazavallan ven’alazen druamuteatran taidojoukko da perustettu muuzikkuartistujoukko. Uvven teatran laval enzikerdua Petroskois ruvettih ozuttamah ouperua, baliettua da muuzikkukomiediedu.

Samannu vuon Karjal-suomelazen socialistizen nevvostotazavallan muutettuu Karjalan avtonoumizekse socialistizekse nevvostotazavallakse teatru sai Karjalan avtonoumizen socialistizen nevvostotazavallan muuzikku- da druamuteatran-nimen.

Vuvvekse 1958 muvvostui baliettuartistujoukko, enimilleh Moskovan, Leningruadan da Permin horeogruaffizis opistoloin loppenuzis.

Teatran histouries merkittävinny tapahtuminnu oldih vuvven 1959 Ruvim Pergamentan komiekkuouperu "Kumoha" da Karjalan enzimäine Helmer-Rainer Sinisalon Sampo-baliettu. Samannu 1959 vuon Moskovas Karjalan taijon da literatuuran dekuadan aigah nämmii spektakliloi kačottih moskovalazet kaččojat. Teatru ozutti Sampo-balietan Leningruadas da toizis linnois.

Vuvvennu 1968 Karjalan Ministroin Nevvoston käskyn mugah Muuzikku- da druamuteatru jagavui Karjalan muuzikkuteatrah da ven’alazeh druamuteatrah.

Teatran ohjelmistoh kuuluttih kai muuzikkulavažanrat: klassielline da nygyaigaine operiettu, muuzikkukomiedii, m’uziklu, ouperu da baliettu. Teatran laval enzikerdua ezitettih Karjalan säveldäjien tevoksii.

Vuozinnu 1955—1977 teatran johtajannu oli Sergei Petrovič Zvezdin.

1960—1990-lugu

Vuozinnu 1960 teatrah kučuttih orkestranohjuajat I. E. Šerman, J. E. Proskurov, L. Z. Ballo, baliettumuasteri I. V. Smirnov.

Ezityksien joukos oli ouperua da operiettua — Franc Legaran "Džuditta" (1965), P’otr Čaikovskoin "Jevgenii Onegin" (1966), Imre Kal’manan "Bajadera" (1968). Teatran baliettutaiduo ezitettih klassiellizet ezitykset — "Joučenlambi", "Maguaju kaunotar", "Ščelkunčik", "Žizel’", "Korsar", "Don Kihot", "Bajaderka" da muut.

Teatru XXI vuozisual

Teatran artistoin, luomisruadajien da tehniellizeh ruadokundah kuuluu läs kolmiesadua hengie.

5. kylmykuudu vuvvennu 2005 piettih Muuzikkuteatran 50-vuozipäivän. Pruazniekkupivon simvolakse vallittih Omre Kal'manan operiettu "Monmartran fialku". Juuri se viijenkymmenen aigah yhtisti laval artistoi eri sugupolvie. Jo puolentostu kuun mendyy teatran avuandas ohjuaju Lev Vil'kevič pani sen lavale. Toizen kerran operietan luadi Kirill Strežnev vuvvennu 1981, а vuvvennu 2004 oman versien täs spektaklis azui ohjuaju Vladimir Podgorodinskii.

Vuvves 2006 vuodessah 2009 teatras piettih perusremontu.

Rahvahan keskes kuulužimii ozutuksii ollah ouperat Dž. Verdin "Traviata", Ž. Bizen "Karmen", P. Čaikovskoin "Jevgenii Onegin", Dž. Puččinin "Madam Batterfl’ai", Dž. Rossinin "Sevil’skii Cir’ul’nik", balietat P. I. Čaikovskoin "Ščelkunčik", Sergei Prokofjevan "Romeo da Džuljetta" sego A. Adanan "Žizel’" da "Korsar", operietat I. Štrausan "Yöliivoi" da I. Kal’manan "Sil’va" sego R. L’vovičan ouperu-m’uziklu lapsile "Mustu kana".

Muuzikkuteatran laval joga vuottu pietäh Onežskaja maska -palkindon juandupiduo.

Teatran solistu Pavel Nazarov Tonion partien ezitändäs Pajaci-spektaklis sai Ven’an korgeviman Kuldaine masku -palkindon vuvvennu 2023.

Vuvven 2025 teatran ohjelmistoh kuuluu 20 ouperua, kolme operiettua, viizi muuzikkusuarnua da kolme m'uziklua lapsih niškoi, yheksä klassiellistu da viizi nygyaigastu baliettua. Vuvves 2019 teatru on nuorien ouperupajattajien OperaVita-festivualin da nygyaigazen horeogruafien Nord Dance-festivualin pidäjänny.

Kylmykuul vuvvennu 2025 tuli tietoih, ku teatru sai federuallizet abudengat Sampo-balietan elävyttämizeh. Uvven ozutuksen valmistau teatran piäbaliettumuasteri Kirill Simonov da sen enzi-ildu huavatah pidiä vuvvennu 2026.

• 

  Karjalan tazavallan muuzikkuteatru. Kaččojes virgutulenduveriäspäi

• 

  Kačonduzualu

• 

  Sergei Kon'onkovan vestokuvien kogomus «Kanzoin ystävys»

• 

  Mustolaudu

Huomavukset

Kirjalližus

• Войцеховская А. В. Театры Карелии: указатель литературы (1945—1960 гг.). — Петрозаводск, 1962.
• Государственный музыкально-драматический театр Карельской АССР. — Петрозаводск: Госиздат КАССР, 1959. — 78 с.
• Звездин С. П. Государственный музыкально-драматический театр Карельской АССР. — Петрозаводск: Госиздат КАССР, 1959. — 48 с.
• Колосенок С. Театр нашего города. — Петрозаводск: Карелия, 1972.
• Смирнов И. В. …танцует Карелия : заметки и размышления балетмейстера / И. В. Смирнов; авт. вступ. ст. Р. Захаров — 2-е изд., испр. и доп. . — Петрозаводск: Карелия, 1981.
• Государственный Музыкальный театр Республики Карелия / М-во культуры Респ. Карелия; [сост. Е. Сотникова; дизайн: В. Наконечный]. — Петрозаводск: Файн Лайн, 1995.
• Генделева Ю. Д. Музыкальный театр Карелии : очерк истории / Юлия Генделева. — Петрозаводск: ПетроПресс, 2009.
• Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД "ПетроПресс", 2009. — С. 248—464. — ISBN 978-5-8430-0125-4.

Linkat

• Из истории Музыкального театра
• Здания театров, построенных в СССР в 1950-е и 1960-е годы
• Каталог "Объекты историко-культурного наследия города Петрозаводска". Театр музыкально-драматический