Paginat tärgies
Paginat tärgies on kluasan ulgopuoline urokku, kudamua pietäh Ven'an opastuslaitoksis da se on omistettu muan perindölöile da kul'tuuruperindöle. Niilöi otettih školaohjelmah vuvvennu 2022. Enzimäzen urokan pidi Ven’an Federacien piämies Vladimir Putin 1. syvyskuudu vuvvennu 2022 Kaliningruadas. Vuvvennu 2025 perustettih Kogo Ven’an Paginat tärgies -palkindo, kudaman tarkoituksennu on tämän opastusainehen parahien opastajien da praktiekkoin eččimine.
1. syvyskuudu vuvvennu 2022, Kaliningruadu
Histourii
Školaohjelmah kluasan ulgopuolizen urokan vältämättömäs otandas ilmoitettih 20. kezäkuudu vuvvennu 2022 Znanije-yhtistyksen istundol. Ven'an Federacien opastusministerstvu valmisti metoudizii nevvoloi opastajih niškoi[1]. Ven’al toimi 700 ploščadkua kluasanpalvojien uudeh opastusaineheh valmistamizekse[2].
Enzimäzen Paginat tärgies -urokan pidi Ven'an piämies Vladimir Putin 1. syvyskuudu vuvvennu 2022 Kaliningruadan ruadomatkan aigua. Avvonazele urokale kučuttih olimpiuadoin da kilboin voittajii tiijon, kul’tuuran da sportan alal, kudamat tuldih Kaliningruadah Ven’an eri čuppuloispäi. Urokku ei olluh omistettu yhtele aihiele; ozanottajat saneltih piämiehele heih niškoi tärgielöis tapahtumis da kyzeltih tiijon, histourien, ekolougien da toizien aloin kyzymyksii. Urokan stenogrammu sijoitettih Ven'an piämiehen verkosivustole[3].
Ven'an školis enzimäine Paginat tärgies -urokku piettih opastusvuvven enzimäzenny enzimässargen, 5. syvyskuudu. Urokan aihiennu oli Tiijonpäivy. Urokan tiemat ollah edukädeh miärätty joga nedälikse opastusvuvven loppussah, niilöin joukos ollah histouriellizet tapahtumat, kuulužien rahvahien eloskerrat, Ven'an pruazniekat, sociualizesti tärgiet projektat da muut[4].
Urokan materjualoi kehitti Ven’an opastusakadiemien Opastuksen kehityksen stratiegien instituuttu[5]. Aihieloi da urokkoin pluanoi vallittih tiedoruadoloin, pedagougukirjalližuon da normatiivu-oigevuksellizien dokumentoin pohjal[6]. Projektan todevuttajannu on Lapsusaijan, perehen da kazvatuksen tutkimusinstituuttu.
Vuvves 2024 "Paginoi tärgies" ruvettih pidämäh päivykodilois lapsih niškoi, kudamil on enämbi viitty vuottu. Sen kehoitettih päivykodiloin lapsienkazvattajat, kudamat piettih urokkoi metoudiekas pienih školaniekkoih nähte vahnembas da vahnimas joukos da nähtih lapsien kiinnostustu kehoitettuloih aihieloih[7]. Ven’al enzimäzinny, pakkaskuul vuvvennu 2025, urokkoi ruvettih pidämäh Voulogdan päivykoit[8].
Urokan kogonažus
Urokku pidäy pidiä kerran nedälis, enzimäzenny urokannu enzimässargen. Urokku on vältämätöi joga 1.-11. kluasan opastujih niškoi. Joga urokku algavuu Ven'an gimnas da valdivollizen flavun nostandas.
Joga urokkah nähte on valmistettu metoudizet materjualat. Net on juattu viideh kategourieh opastujan igii myöte: enzimäzes toizeh kluassah nähte, kolmandes nelländessäh kluassah nähte, viijendes seiččemendessäh kluassah nähte, kaheksandes yheksändessäh kluassah nähte, kymmenendes yhtendehtostu kluassah nähte. On sežo olemas ammatillizen keskiopastuksen nähte valmistettu materjualoin kategourii[9].
Joga kategourieh kuulutah käzikirjutus da metoudizet materjualat, videorouliekat, prezentacii da plakuattu, kudamua voibi käyttiä urokan ozutteluezinehenny. Vahnembih školaniekkoih niškoi on luajittu ližämaterjualua. Urokal opastujat kačotah videodu, luajitah interaktiivizii tehtävii da loppietah urokku mielenvaihtopaginoih. Opastai iče piättäy, käyttiägo kehoitettu käzikirjutustu da materjualoi libo pidiä urokkua toizes ruadomuvvos[4].
Äijis aihielois kirjutetah videoloi federuallizien paginanpidäjienke, kuadmat ollah azientiedäjinny vallittulois tiemois. Nenga Ven'an legendat -tieman mugah ezityi Valdivollizen Duuman varapiälikkö P'otr Tolstoi, Volont'uoroin päivy -tiemas — ven. «Старость в радость»-fondan perustai Jelizaveta Oleskina, Ven'a — tervehelline mua -tiemas — Olimpiuadukižoin voittai Maksim Tran'kov. Video on kirjutettu dialogan muvvos: paginanpidäjät vastatah lapsien kyzymyksih[4].
Urokkoin materjualoi sijoitetah "Paginoin tärgies" virrallizele virkosivustole. Tallendua voibi kaikkii materjualoi sego mennyzien vuozien arhiivoi.
Palkindo
Vuvven 2025 mennes Ven'al piettih 105 Paginat tärgies -urokkua, niilöih otti ozua enämbi 20 miljonua opastujua. Federuallizinnu paginanpidäjinny oli 120 yhteiskunnallizen alan toimijua da federuallizien virrastoloin ezittäjiä. Opastusmaterjualoin kehittämizeh otettih ozua Ven'an tundietut laitokset: Ven'an raududorogat, Rosatom, Sberbanku, Enzimäine kanualu, Artek, Ven’an soda-histourielline yhtistys da muut.
Huomavoh otettih projektan sociualine tärgevys da piätettih perustua jogavuodine kogo Ven'an Paginat tärgies -palkindo. Palkinduo juatah nelläs nominacies:
- Vuvven paras pagizutandu;
- Videoanonsoin paras vedäi;
- Paras urokku partn'orois;
- Enzimäzet. Paginat tärgies -sarjan paras ozuttelii (oza).
Opastajah niškoi luajittih erilline nominacii "Tärgiedy paginua luadijes". Kilbah voibi työndiä luadijoin valmistettuloi urokkoin materjualoi, metoudizii materjualoi, urokkoin mielenvaihtopaginoin videoloi.
Arvostelukundah kuuluu Lapsusaijan, perehen da kazvatuksen tutkimusinstituutan ruadajua, Kogo Ven'an vahnembien komitietan ezittäjiä da Kazvattua ristikanzu -kilvan (ven. «Воспитать человека») finalistua[10].
Huomavukset
- ↑ «Разговоры о важном» в школе: что это и какие темы обсуждаются, Коммерсантъ (11 pakkaskuudu 2024). Kačondan päivymiäry: 22. oraskuudu 2025.
- ↑ Кравцов: «Разговоры о важном» позволят интересно рассказать о ценностях и истории России (рус.). Минпросвещения России. Kačondan päivymiäry: 22. oraskuudu 2025.
- ↑ Открытый урок «Разговор о важном», Президент России. Kačondan päivymiäry: 22. oraskuudu 2025.
- ↑ 1 2 3 Разговоры о важном. Министерство просвещения Российской Федерации. Kačondan päivymiäry: 22. oraskuudu 2025.
- ↑ Разговоры о важном. Методические рекомендации. Институт стратегии развития образования.
- ↑ Классный час "Разговоры о важном" 2025-2026: что это такое, программа, темы уроков, Комсомольская правда. Kačondan päivymiäry: 22. oraskuudu 2025.
- ↑ Путин поддержал идею проводить "Разговоры о важном" в детских садах, РИА Новости (3 ligakuudu 2024). Kačondan päivymiäry: 22. oraskuudu 2025.
- ↑ Власти Вологды первыми в стране ввели еженедельные «Разговоры о важном» в детсадах, Известия (21 pakkaskuudu 2025). Kačondan päivymiäry: 22. oraskuudu 2025.
- ↑ Разговоры о важном в колледже: как организовать внеурочные занятия для СПО (рус.). Единый всероссийский институт дополнительного профессионального образования. Kačondan päivymiäry: 22. oraskuudu 2025.
- ↑ Старт первой Всероссийской премии «Разговоры о важном» (12. oraskuudu 2025). Kačondan päivymiäry: 22. oraskuudu 2025.