Pakkaine
| Pakkaine | |
|---|---|
| karj. Pakkaine | |
 | |
| Karjalan suarnalline talvitiedoiniekku | |
| Mifolougii | Nygyaigaine Karjalan mifolougii |
| Aloveh | Karjalan tazavaldu, Ven'a |
| Sugupuoli | mies |
| Alguperä | Nygyaigaine karjalaine legendu |
| Tunnustamine | Pakkasukko |
Pakkaine on karjalaine suarnalline talvitiedoiniekku, ven'alazen Pakkasukon vastineh[1][2][3].
Karjalan kielespäi kiännetynny Pakkaine on «морозец»[4]. Karjalaine Pakkaine ei ole, kui toizet Pakkasukot, vahnu parrakas mies. Häi on nuori, ravei da iloniekku[5].
Pakkazen kodi on Anuksenlinnas. Joga vuottu sie talvel pietäh Pakkazien kižoi.
Pakkastu auttau hänen ystävy Luminaine[5].
Tarin
Tarin Pakkazes ei ole vahnu. Sen keksittih Anuksen kanzallizen livvinkarjalazien muzein ruadajat omas linnas talvimatkailun kehittämizekse[6].
Tarinan mugah Pakkaine rodivui 1. talvikuudu kauppumiehien pereheh. Häi rodivui matkas, konzu hänen tuattah da muamah ajettih jarmankaspäi kodih Anukseh. Pihal oli kova pakkaine, ga brihačču oli terveh da luja, matkas ei kylmänyh, sendäh hänele pandih nimi Pakkaine[7][5].
Pakkaine, kui hänen tuattah da muamah, rodih kauppumiehekse, rubei šalgu selläs ajelemah linnoi da kylii myöte. Joga taloih, kunne häi azettelih da kačahtih zirkaloh, jäi hänen kuvahaine. Hänen lähtiettyy kuvahaine elavui da rodih vie yksi Pakkaine[8].
A konzu Pakkaine huogavui kois Anuksenlinnas, sen kuvahazet loittozis mualois da linnoispäi lennettih hänellyö. Kauppumiehen roindumual hyö piettih kilboi da kižoi, kačottih, ken heis on ravei da vägevy. Iče Pakkaine kačoi kaikkeh, kummua saneli da nagroi. Häi varmah tiezi, ken on tovelline Pakkaine.
Tämä nygyaigaine tarin rodih vuvvennu 1999 Anuksen Pakkazien kižoin piendän pohjakse. Sit aijas lähtijen joga vuottu Anuksenlinnah tulou ozuttamah omua neruo da vägie Pakkasukkuo Ven'an eri kolkispäi da ulgomualoispäi[5].
Ulgonägö
Vuvvennu 2005 rodivui Pakkazen obrazu. Jälles pitkii eččimizii sidä rubei ozuttamah Valerii Kucabov[6], kudai vie enzimäzien Pakkazien kižoin aigua oli sen roulis.
Pakkazen sovat ombeli petroskoilaine dizaineru Irina Porošina, kudamua tundietah karjalazien perindöllizien sobien tiedäjänny da ombelijannu.
Sobien pohjakse dizaineru otti kauppumiehen vuozisualoin XI—XII ruskiet sovat. Karjalaine talvitiedoiniekku rodih čoma da omaperäine. Pakkaine äijäl eruou toizis Pakkasukkolois. Net ollah harmaipardudied'oit, a Pakkaine on nuori mies. Hänen "kolliegat" pietäh turkiloi da šuapkoi, Pakkazelhäi on lämmin kauhtanu piäl da movvakas kartuuzu piäs.
Pakkaine äijän matkustelou Ven'ua myöte, ottau ozua eri pruazniekkoih da pidoloih. Yhtes oman abuniekan Luminaizenke kävyy lapsien da sociualulaitoksih. Kävyigi Ven'an Pakkasukon roindupäiväle Velikii Ust'ug -linnah[5].
Anuksen Pakkazien kižat
Joga vuottu Pakkazen roindupäivänny Anuksenlinnas pietäh Pakkazien kižoi. Eri vuozinnu niilöih käydih Ven'an piälimäine Pakkasukko Velikii Ust'ug –linnaspäi, Baikalan Pakkasukko, Santa Klaus Lapispäi, Talviukko Karjalaspäi da toizet.
Pakkazien kižois eri alovehis da mualoispäi tulluot Pakkasukot kilbaillah eri kilvois, vastavutah lapsienke. Kižoin aigah pietäh moizii pidoloi kui "Pakkazien jalgumiäččy" da "Pakkazien kezoinkylvendät", kudamii suvaijah kaččojat[5].
 Pakkazien kižat 2022. Keskel Talviukko Čalnaspäi |
Rezidencii
Pakkazen rezidenciennu on kauppumiehen piha[9] Anuksen kanzallizen muzein luo. Se avattih vuvvennu 2014[5][10] da sit on kaksi piähuonustu: kauppumiehen laukku da uvvenvuvven aittu[7].
Pakkazen kauppumiehen pihas on regyt, kudamas häi on roinnuhes. On Pakkazen puuhine pyöry da oma tiedovoittu dengaine – Aino diivo, se tuou lykkyy sille, ken pidäy sidä käis[11].
Rezidencies Pakkazen abuniekannu on rahmannoi Luminaine. Häi sanelou Pakkazeh nähte, pidäy ekskursieloi rezidenciedu myöte. Luminaine tuttavuttau gostii kauppumiehen ruadoh da tiedovoittuloin vehkehien peittožuksih[5].
Huomavukset
- ↑ Карельские Деды Морозы: Талви, Халла и Паккайне.
- ↑ Тринадцать родственников Деда Мороза. ТАСС (28. talvikuudu 2016).
- ↑ Яковенко И.М., Якубова Ф.А. Мифологические ресурсы и направления их исследования для целей туризма // Ученые записки Крымского федерального университета имени В. И. Вернадского. География. Геология. — 2016. — № 2.
- ↑ Дьяконова Мария Владимировна, Родионова Александра Павловна. Язык и культура карел как бренд развития малых территорий (на примере этнолокальной группы карел-людиков) // Современные проблемы сервиса и туризма. — 2018. — № 4. — doi:10.24411/1995-0411-2018-10411.
- ↑ 1 2 3 4 5 6 7 8 Карельский Морозец Паккайне.
- ↑ 1 2 Карельский Дед Мороз.
- ↑ 1 2 Карельский Дед Мороз и его резиденция в Олонце.
- ↑ Карельские Деды Морозы: Талви, Халла и Паккайне.
- ↑ Купеческий двор Паккайне.
- ↑ Карельский Морозец Паккайне в Олонце
- ↑ «Мы рождены, чтоб быль сделать сказкой»
Kirjalližus
- J. V. Ruppijeva, J. V. Pankratjeva. Livvin opastuskniigu: 6. kluassu. — Петрозаводск: Verso, 2018. — С. 49-50. — 2018 с. — ISBN 978-5-91997-294-5.
- Яковенко И.М., Якубова Ф.А. Мифологические ресурсы и направления их исследования для целей туризма // Ученые записки Крымского федерального университета имени В. И. Вернадского. География. Геология. — 2016. — № 2.
- Дьяконова Мария Владимировна, Родионова Александра Павловна. Язык и культура карел как бренд развития малых территорий (на примере этнолокальной группы карел-людиков) // Современные проблемы сервиса и туризма. — 2018. — № 4. — doi:10.24411/1995-0411-2018-10411.