Anuksen kanzalline livvinkarjalazien N. G. Prilukinan nimine muzei

On otettu Рувики-späi
Gerb-icon.png

Ven'an Federacien kul'tuuruministerstvu

Arrow-Right.png
Gerb-big.png
Ven'an Federacien kul'tuuruministerstvu
Anuksen kanzalline livvinkarjalazien N. G. Prilukinan nimine muzei
Олонецкий национальный музей карелов-ливвиков им. Н. Г. Прилукина.jpeg
Perustandan päivymiäry 1959 da 1958
Olopaikku

 Karjal

 Ven'anmua
Adressi 186000, Karjalan tazavaldu, Anuksen piiri, Anuksenlinnu, Voiton 30-vuozipäivän uuličču, 8
Johtai Vasiljeva Natalja Nikolajvena
Verkosivusto olon-mus.ru (ven.)
olon-mus.ru
Логотип РУВИКИ.Медиа Медиафайлы на РУВИКИ.Медиа

Anuksen kanzalline livvinkarjalazien N. G. Prilukinan nimine muzei (ven. Олонецкий национальный музей карелов-ливвиков имени Николая Григорьевича Прилукина) on Karjalan tazavallan kul’tuuran b’udžiettulaitos. On Karjalan tazavallan Anuksen piirin Anuksenlinnas Voiton 30-vuozipäivän uuličal, № 8. Muzein taloi on histourien da kul’tuuran mustomerkinny tazavaldalazen merkičyksenke[1].

On Karjalan enzimäine piirin kodialovehmuzei[2].

Muzei perustettih vuvvennu 1958[3].

Histourii

Muzei on vuozinnu 1871—1872 nostetun tundietun anukselazen kauppumiehen Jegor Dmitrijevič Kuttujevan talois. Taloi on linnan puustos, niemel Anuksen- da Mägrienjoven yhtyndykohtal, Anuksenlinnan histouriellizes kohtas, ei säilynyön Anuksen linnoituksen  (ven.) (olo. kohtas[3].

Anuksen kanzalline livvinkarjalazien N. G. Prilukinan nimine muzei perustettih kodialovehentiedäjän Nikolai Prilukinan alguhpanos (1909—1983) vuvvennu 1958[3].

Se on ainavo muzei Karjalan tazavallas, kus kävyjät voijah kuulta karjalan kielen livvin murrehtu[4].

Kävyjih niškoi muzei virrallizesti avattih 30. pakkaskuudu vuvvennu 1959 da se rodih Karjalan enzimäzekse piirin kodialovehmuzeikse. Allus muzeil oli kaksi pertii Kuttujevan talois[5]. Muzeis ruokos oldih livvinkarjalazien XIX—XX vuozisuan aigazet etnogruaffizien materjualoin keräilemät[3].

Vuvves 1974 vuodessah 1992 muzei oli Smolenskoin jumaldoman kirikös. Vuvvennu 1992 Smolenskoi kirikkö annettih järilleh kiriköle, a muzeile annettih tilat Lapsien muuzikkuškolas[5].

Vuvvennu 1994 Anuksen muzei sai kanzallizen muzein stuatusan[3].

Vuvvennu 1999 se sai muzein alguhpanijan da enzimäzen johtajan Nikolai Prilukinan nimen[3].

Vuvvennu 2009 muzei muutti kohendettuh kauppumiehen Kuttujevan taloih.

Joga vuottu muzeih kävyy enämbi 12 000 hengie[4].

Anuksen kanzalline muzei ezittäy livvinkarjalazien histouriedu da kul’tuurua, avvuttau Anuksen čupun histourii-kul’tuurizen perindön säilyttämizes.

Vuvvennu 2012 muzeis ruvettih pidämäh ekskursieloi livvikse.

Muzein haldivoiččijannu  (ven.) (olo. on Anuksen kanzallizen piirin hallindo[6].

Muzein johtajannu on Nikolajeva Natalja Vasiljevna[6].

Ozuttelut

Muzeis ruatah alallizet ozuttelut:

  • interaktiivuozuttelu "Linnoituksen formulu" (ven. "Формула крепости") Anuksen čupun histouries neolitas algajen meijan aijanluvun XVIII vuozisadassah;
  • histourii-etnogruaffine ozuttelu "Карелы-ливвики. Liygiläžet".

Muzeis ruadau vahnan uvvenvuvven bobazen ozuttelu, kudai on muzein kauppumiehen laukas, on etnoploščadku histouriellizes Suuren Sellin kyläs, kus pietäh interaktiivuohjelmii kävyjih niškoi[3].

Keräilemät

Anuksen kanzallizes muzeis ruokos on läs 22 000 vehkehty, niilöis 15 548 ollah piälimäzen tallenduksen vehkehet. Kallehimii keräilemii ollah kodivehkehet — 640, sovat, jallačit, piähizet — 140, kodikuvondahizet — 160, ruadobrujat — 810, hengellizen kul’tuuran vehkehet — 325, arheolougizet mustomerkit — 1 316, numizmuatiekku  (ven.) (olo. — 3082, fotomaterjualat — 2 820, dokumenta — 2 300[7].

Muzeis on Karjalan suurin XIX vuozisuan aigaine liygiläzien kul’tuurua da argielostu kuvuaju etnogruaffine keräilemy[4].

Vahnoin uvvenvuvven bobazien keräilemäs on 860 bobastu. Vahnimal bobazel on 120 vuottu[5].

Toimindu

Muzeis ruadai "Kuvondupaja", kus opastetah kudomah kangastu perindöllizeh tabah, luajitah muzein keräilemien kuvottuloin veššilöin etnogruaffizii koupieloi da mustolahjutuottehii: koiskuvottuloi hurstiloi, käzipaikkoi, pyhkimyzii[4].

Muzeis ruadau muzein teatru "Eloksen ratas", kudai ozuttau spektakliloi karjalan kielen livvin murdehel[8], pietäh muzei-opastuksellizii ohjelmii, ekskursieloi, avtoubussumatkoi, individualizii matkoi da muasteripajoi[3].

On muzei-opastukselline keskus lapsien da täyzi-igäzienke ruadoh niškoi, kudaman hantuzis raudau huogavopäivän kluubu "Vastavummo muzeis" da Pakkazen kauppumiehen piha — Karjalazen Pakkasukon interaktiivuploščadku pihan, laukan da uvvenvuvven aitanke.

Vuvvennu 2021 kanzoinvälizen InterAktiivine histourii -projektan hantuzis (InterActive History) muzeis avattih interaktiivuozuttelu "Linnoituksen formulu. Usko, voinu da dengat Anuksenlinnan elokses XVII—XVIII vuozisual".

Muzein matkustajih niškoi varustettavat matkat: etnogruaffine matku "Joga kyläl omat tavat" (ven. "Что деревня — то обычай"), Pravosluavine Anuksenlinnu, avtoubussuekskursii Anuksen puolistusaijan bojukohtii myöte "Rauhatoi vuvven 1941 kezä".

Huomavukset

  1. ↑ Муниципальное бюджетное учреждение "Олонецкий национальный музей карелов-ливвиков им. Н.Г. Прилукина". Госкаталог. Kačondan päivymiäry: 4. syvyskuudu 2025.
  2. ↑ О музее (рус.). © Олонецкий национальный музей.. Kačondan päivymiäry: 4. syvyskuudu 2025.
  3. ↑ 1 2 3 4 5 6 7 8 Олонецкий национальный музей карелов-ливвиков им. Н. Г. Прилукина (рус.). © Национальный музей Республики Карелии. Kačondan päivymiäry: 4. syvyskuudu 2025.
  4. ↑ 1 2 3 4 Олонецкий национальный музей карелов-ливвиков им. Н. Г. Прилукина (рус.). Культура.РФ ©. Kačondan päivymiäry: 4. syvyskuudu 2025.
  5. ↑ 1 2 3 Олонецкий национальный музей карелов-ливвиков им. Н. Г. Прилукина (рус.). Официальный сайт Олонецкого национального муниципального района ©. Kačondan päivymiäry: 4. syvyskuudu 2025.
  6. ↑ 1 2 Олонецкий национальный музей карелов-ливвиков им. Н. Г. Прилукина. Общая информация (рус.). Олонецкий национальный музей карелов-ливвиков им. Н. Г. Прилукина. Kačondan päivymiäry: 4. syvyskuudu 2025.
  7. ↑ Фонды музея (рус.). olon-mus.ru. Kačondan päivymiäry: 4. syvyskuudu 2025.
  8. ↑ Музейный театр (рус.). Олонецкий национальный музей карелов-ливвиков им. Н. Г. Прилукина. Kačondan päivymiäry: 4. syvyskuudu 2025.

Linkat

Lähteh - "https://olo.ruwiki.ru/w/index.php?title=Anuksen_kanzalline_livvinkarjalazien_N._G._Prilukinan_nimine_muzei&oldid=126361570"