Sever-žurnualu

Sever-žurnualu
Kieli	ven'an kieli
Toimituksen adressi	Petroskoi, Puškinan uuličču, 13
Piätoimittai	Pietiläinen Jelena Jevgenjevna (ligakuus vuvvennu 2007)
Mua	Ven'anmua
Ilmahpiästäi	Sever-julguamo
Perustandupäivy	1940
Tilavusmiäry	1200 kappalehtu
Verkosivusto	sever-journal.ru

"Sever" (ven. Север) on Ven’an jogakuuhine kaunehliteratuuru- da yhteiskunnallis-poliittine žurnualu. Piäzöy ilmah vuvves 1940 Petroskoil. Nevvostoliiton aigah oli yksi Ven'an federatiivizen socialistizen nevvostotazavallan kirjuttajien liiton lehtistöelimis.

Histourii

Žurnualu perustettih vuvvennu 1940 Karjal-suomelazen socialistizen nevvostotazavallan literatuuru- da taidožurnualakse Na rubeže -nimel. Nevvostoliiton da Suomen välizen voinan aigua (1941—1944) žurnualua ei jullattu. Tevoksien painamine allettih uudehes vuvvennu 1944.

Vuozien 1950 allus žurnualan piätoimittajannu ruadoi Aleksei Ivanovič Titov.

Vuvves 1954 vuodessah 1990 žurnualan johtajannu toimi Karjalan tazavallan rahvahan kirjuttai Dmitrii Jakovlevič Gusarov.

Pakkaskuus vuvvennu 1965 žurnualale annettih alovehellizen painojulgavon stuatussu da nimi "Sever". Vuvves 1965 žurnualas painettih Arhangelin, Voulogdan, Murmanskan da Novgorodan alovehien, Karjalan daKomin avtonoumizien socialistizien nevvostotazavaldoin kirjuttajien da runoilijoin tevoksii.

Vuvves 1990 vuodessah 2001 žurnualan piätoimittajannu oli Ven'an federatiivizen socialistizen nevvostotazavallan kul’tuurualan arvostettu ruadai Al'bert Nazarovič Tihonov.

Vuvves 1991 julgavon perustajannu on Karjalan tazavallan halličus da Ven'an kirjuttajien liitto.

Vuvves 2001 vuodessah 2005 Sever-žurnualua johti Karjalan avtonoumizen socialistizen nevvostotazavallan kul’tuurualan arvostettu ruadai Stanislav Aleksandrovič Pankratov. Hänen aigah žurnualu uvvistettih, muutettih sen ulgonägö da ruvettih painamah värillisty fotokuvua. Vuvvennu 2002 piätoimittajua S. A. Pankratovua da taidoilijua Vitalii Nakonečnoidu palkittih Karjalan tazavallan kul’tuuran, taijon da literatuuran Valdivollizel palkindol žurnualan korgeitazozes kuvuandas.

Vuozinnu 2005—2007 žurnualua johti Jana Leonardovna Žemoitel’ (peittonimi literatuuras Jana Žemoitelite).

Ligakuus vuvvennu 2007 Sever-žurnualan piätoimittajan virgah pandih Jelena Jevgenjevna Pietilästy. Žurnualas rodih uuttu rubriekkua — "Karjalan literatuuran antolougii", "Armas kodoilu", "Tundemattomua tietys", "Persounalline arhiivu", "Pagizuttelu annetus aihies".

Vuvves 2009 Sever-žurnualu pidäy jogavuodehistu Pohjaine tiähti-kilbua (ven. "Северная звезда"), kuduan tarkoituksennu on lyödiä 15-37-vuodehizien nuorien kirjuttajien nerokkahii tevoksii julguamizekse žurnualan sivuloil da ozanottamizekse Gor’koin nimizen Literatuuruinstituutan luomisseminuaroih Moskovas da nuorien kirjuttajien jogavuodehizele fourumale Lipkois.

Vuvvennu 2012 Sever-žurnualu perusti literatuurupalkindon. Palkinduo juatah joga vuottu kilvan perustehel kolmes nominacies — prouzu, runohus da lehtikirjutus — kirjuttajile literatuurutevoksis da lehtikirjutuksis, kudamat ollah merkittävät kul’tuuran da moralin puoles, da kudamis kannatetah literatuuru- da kogo rahvahan moraliarvoloi. Palkindokilbah yhtytäh kai žurnualan sivuloil vuvven aloh painetut tevokset, mis palkindo annetahgi.

Vuvvennu 2013 kogo Ven'an legenduarine jogavuodehine Runohuon päivy -al'manuahu (ven. "День поэзии") painettih Sever-žurnualan perustal da piästettih se vuvven 2014 allus Muailman runohuon päiväkse. Vuvven 2013 "Runohuon päivy" keräi kannen uale enämbi sadua kirjuttajua ymbäri Ven’anmuadu, lähizes da loittozes rajantagazes. Joukos on äijy kuulužua nimie — Jevgeni Jevtušenko, Kirill Koval’dži, Andrei Dementjev, Gleb Gorbovskii, Larisa Vasiljeva, Jevgenii Rein, Jegor Isajev, Vladimir Kostrov, Stanislav Kun’ajev da monet toizet. Sever-žurnualan piätoimittai Jelena Pietiläinen sai Ven’an Federacien Kul’tuuruministerstvan M. J. Lermontovan medalin runollizes panokses Ven’an kul’tuurah, sego luomispanokses jogavuodehizen Kogo Ven’an Runohuon päivy -al’manuahan julguamizeh.

Vuozinnu 2011, 2012, 2013, 2015 Sever-žurnualu merkittih Lehtistön kuldaine fondu -eromerkil (ven. "Золотой фонд прессы"), kudai perustettih palkittavakse korgeiluaduzii da yhteiskunnan puoles merkittävii painojoukkoviestimii, kudamat propagandiirujah korgieloi moraliperustehii da kuduat täyzin avvutetah persounan hengellisty da älyllisty kehitysty.

Sulakuus vuvvennu 2012 Ven'anmuan joukkoviestimien Aziellizel fourumal Sever-žurnualu ilmoitettih kogo Ven’an Zolotoi lotos-2011 -kilvan voittajakse Ven’an hengižyön, kul’tuuran da muuttumattomien moraliperustehien säilyttämizes, žurnualu sai Suavutuksen stratiegii-2011 -kilvan diploman hyvin pietys žurnualan tilavuskompuanies.

Vuvvennu 2012 Sever-žurnualu sai enzimäzen palkindon da Aleksandr Nevskoin medalin Literatuuružurnualu -nominacies vuvven 2011 ruadotuloksien mugah.

Pakkaskuul vuvvennu 2026 Karjalan tazavallan piämiehen Artur Parfenčikovan käskys žurnualu sai medalin "Arvoruadolois Karjalan tazavallan hyväkse" suuris suavutuksis ižänmuan literatuuran da kul’tuuran kehittämizes, panokses perindöllizien hengellis-morualizien arvoloin säilyttämizes. Pruazniekalline palkičendupido piettih Ven'an lehtistöpäivänny, 13. pakkaskuudu.

Huomavukset

Linkat

• Официальный сайт журнала "Север" Официальный сайт журнала "Север" (рус.). sever-journal.ru. Kačondan päivymiäry: 5. elokuudu 2025.
• "Север": история, люди события (выступление Елены Пиетиляйнен на телеканале Совета Федерации "Вместе — РФ" (рус.). Kačondan päivymiäry: 5. elokuudu 2025.
• Журнал "Север" на ресурсе "ЛитБук" (рус.). litbook.ru. Kačondan päivymiäry: 5. elokuudu 2025.