Karjalan tazavallan halličus

Karjalan tazavallan halličus
karj. Karjalan tašavallan hallituš suom. Karjalan tasavallan hallitus
Karjalan tazavallan halličuksen taloi
Yhtehizet tiijot
Mua	Ven'anmua
Jurisdikcii	Karjal (kui Ven'an Federacien subjektu)
Perustandupäivy	17. kezäkuudu vuvvennu 1994
Ielolii	Karjalan avtonoumizen socialistizen nevvostotazavallan Ministroin nevvosto, Karjalan tazavallan Ministroin nevvosto
Rakendeh
Olendupaikku	Petroskoi, Leninan prospektu, 19
Verkosivusto	«Карелия официальная»

Karjalan tazavallan halličus (ven. Правительство Республики Карелия) on Karjalan tazavallan alalleh toimii valdivovallan toimehpaniivallan korgevin elin.

Yhtehizet kohtat

Karjalan tazavallan halličuksen piälikönny on Karjalan tazavallan piämies, kudai muvvostau Karjalan tazavallan halličuksen.

Karjalan tazavallan halličus toimiu Ven’an Federacien peruszakonan, federuallizien peruszakonallizien zakonoin, federuallizien zakonoin da Ven’an Federacien toizien normatiivizien oigevusaktoin, Karjalan tazavallan peruszakonan, Karjalan tazavallan vuvven 2013 tuhukuun 5. päivän "Karjalan tazavallan halličukseh nähte" № 1679-ЗРК zakonan da Karjalan tazavallan toizien normatiivizien oigevusaktoin mugah.

Histourii

Halličuksen taloi, kudamas johtajannu oli O. V. Kuusinen, 1940-lugu.

Elokuul vuvvennu 1990 Karjalan avtoumizen socialistizen nevvostotazavallan Korgevin Nevvosto hyväksyi "Deklaracien Karjalan avtonoumizen socialistizen nevvostotazavallan valdivollizes iččenäžyös".

Karjalan avtonoumizen socialistizen nevvostotazavallan Korgeviman Nevvoston 12. kučundukerähmön kymmenendel sessiel 13. kylmykuudu vuvvennu 1991 piätettih tazavallan nimen muutandas. Karjalan avtonoumizen socialistizen nevvostotazavallas rodih Karjalan tazavaldu.

12. talvikuudu vuvvennu 1993 kogo Ven’an referenduman aigah hyväksyttih Ven’an Federacien peruszakon. 24. talvikuudu vuvvennu 1993 hyväksyttih Karjalan tazavallan peruszakonan uuzi toimitus, kudaman mugah pidi perustua Karjalan tazavallan peruszakonalline suudo, Karjalan tazavallan halličuksen piälikön virgu, Karjalan tazavallan zakonoinluajindukerähmön valličendu.

Vuvven 1993 Karjalan tazavallan Peruszakonan mugah Karjalan tazavallan halličuksen luadijannu da piälikönny oli rahvahan nelläkse vuottu vallittu Karjalan tazavallan halličuksen piälikkö, kudai samal aigua oli Karjalan tazavallan toimehpaniivallan piälikönny da korgevimannu virguniekannu.

Vuvvennu 2002 rodih Karjalan tazavallan halličuksen piäministran virgu, kudai otettih iäre vuvvennu 2010.

18. tuhukuudu vuvvennu 2016 Karjalan tazavallan piämies Aleksandr Hudilainen allekirjutti käskyn "Karjalan tazavllan halličuksen iärelähtendäs".

24. kevätkuudu vuvvennu 2016 Karjalan tazavallan halličus hyväksyi zakonuprojektat Karjalan tazavallan Peruszakonah kohenduksien luajindas sego Karjalan tazavallan zakonah "Karjalan tazavallan halličukseh nähte" da zakonah "Erähis kyzymyksis valdivollizes siviilipalvelus da valdivovirrois olijoin persounien oigevuksellizes tilas". Uvvessah rodih Karjalan tazavallan halličuksen piäministran — Karjalan tazavallan enzimäzen varapiälikön virgu. Karjalan tazavallan piämies on Karjalan tazavallan toimehpaniivallan piälikönny.

6. sulakuudu vuvvennu 2016 käskys № 21 hyväksyttih halličuksen uuzi struktuuru.

Karjalan tazavallan piämiehen käskys № 108 syvyskuun 25. päivänny vuvvennu 2017 hyväksyttih halličuksen uuzi struktuuru.

5. tuhukuudu vuvvennu 2025 Karjalan tazavallan piämies Artur Parfenčikov ilmoitti muutoksis Karjalan tazavallan halličukses.

Täyzivaldažuksien aigu	Halličuksen piälikön virgu	Halličuksen piälikkö
13. kylmykuudu 1991 — 14. heinykuudu 1994	Ministroin nevvoston piälikkö (virgu otettih iäre vuvvennu 1994)	Blinnikov Sergei Petrovič
17. oraskuudu 1994 — 1. kezäkuudu 1998	Halličuksen piälikkö	Stepanov Viktor Nikolajevič
1. kezäkuudu 1998 — 12. oraskuudu 2002	Halličuksen piälikkö (virgu otettih iäre vuvvennu 2002)	Katanandov Sergei Leonidovič
12. oraskuudu — 31. talvikuudu 2002	Piäministru	Katanandov Sergei Leonidovič
1. pakkaskuudu 2003 — 27. heinykuudu 2010	Piäministru	Černov Pavel Viktorovič
28. heinykuudu — 26. elokuudu 2010	Piäministru (virgu otettih iäre vuvvennu 2010)	Nelidov Andrei Vitaljevič
26. elokuudu 2010 — 22. oraskuudu 2012	Tazavallan piämies	Nelidov Andrei Vitaljevič
24. oraskuudu 2012 — 15. tuhukuudu 2017	Tazavallan piämies	Hudilainen Aleksandr Petrovič
15. tuhukuudu — 27. kevätkuudu 2017	Tazavallan piämies	Parfenčikov Artur Olegovič
27. kevätkuudu 2017 — tuhukuu 2025	Piäministru	Čepik Aleksandr Jevgenjevič
oraskuun 27. päiväs 2025	Piäministru	Sergejev Andrei Sergejevič

Karjalan tazavallan halličukseh kuulujat

Karjalan tazavallan halličuksen struktuuru on hyväksytty Karjalan tazavallan piämiehen käskys "Karjalan tazavallan halličukseh kuulujis" 25. syvyskuudu vuvvennu 2017 № 108:

• Karjalan tazavallan piämies;
• Karjalan tazavallan enzimäine varapiämies — Karjalan tazavallan halličuksen piäministru;
• Karjalan tazavallan varapiämies — Karjalan tazavallan piämiehen hallindon johtai;
• Karjalan tazavallan piämiehen kodimuanpoliitiekan varapiämies;
• Karjalan tazavallan piämiehen oigevusvalvojien laitoksienke toimindan varapiämies;
• Karjalan tazavallan varapiämies — Ven’an Federacien Prezidentan Karjalan tazavallan alalline ezittäi;
• Karjalan tazavallan piämiehen ezittäi Karjalan tazavallan Zakonoinluajindukerähmös;
• Karjalan tazavallan halličuksen talovusvarapiäministru;
• Karjalan tazavallan halličuksen sociualukyzymyksien varapiäministru;
• Karjalan tazavallan halličuksen infrastruktuuran kehityksen varapiäministru;
• Karjalan tazavallan halličuksen varapiäministru — Karjalan tazavallan mua- da kalatalovusministru;
• Karjalan tazavallan rahavaroinministru;
• Karjalan tazavallan talovuskehityksen da tevolližuon ministru;
• Karjalan tazavallan omažus- da muavälilöin ministru;
• Karjalan tazavallan luonnonvaroin da ekolougien ministru;
• Karjalan tazavallan tervehyshoidoministru;
• Karjalan tazavallan sociualuturvuministru;
• Karjalan tazavallan kul’tuuruministru;
• Karjalan tazavallan opastanduministru;
• Karjalan tazavallan rakendamizen, eländykunnallistalovuon da energietiekan ministru;
• Karjalan tazavallan kanzallizen da alovehellizen poliitiekan ministru;
• Karjalan tazavallan tietalovuon, ajonevvoloin, poštu- da telelaitoksen ministru;
• Karjalan tazavallan nuorižoazieloin, liikundukul’tuuran da sportan ministru.

Halličuksen täyzivaldažuot

• Todevuttau ruadomiärii ristikanzan da kanzalazen oigevuksien da vällyzien todevuttamizekse, varmistamizekse da suojelemizekse, omažuon da yhteiskunnallizen järjestyksen suojelemizekse, terrorizman da ekstremizman vastustamizekse, rikoksien vastustamizekse;
• Valmistau Karjalan tazavallan b'udžietan projektan da tazavallan sociualu-talovuollizen kehityksen ohjelmien projektat niilöin Karjalan tazavallan piämiehen ezittämizekse Karjalan tazavallan zakonoinluajindukerähmös;
• Huolehtiu Karjalan tazavallan b’udžietan todevuttamizes da valmistau Karjalan tazavallan piämiehen Karjalan zakonoinluajindukerähmös ezitettäväkse selvityksen miärätyn b’udžietan todevuttamizes da selvitykset Karjalan tazavallan sociualu-talovuollizien ohjelmien todevuttamizes;
• Muvvostau Karjalan tazavallan toimehpaniivallan muut elimet;
• Hoidau da miäriäy Karjalan tazavallan omažuttu Karjalan tazavallan zakonoin mugah sego hoidau Karjalan tazavallale annettuu federuallistu omažuttu federuallizien zakonoin da muuloin Ven’an Federacien normatiivizien oigevusaktoin mugah;
• Hänel on oigevus ehoittua paikallizele ičehaldivole, vallitule libo muule paikallizen ičehaldivon virguniekale sen, ku heijän jullatut oigevusaktat luajittas Ven’an Federacien zakonoinmugazikse, ku nämmä aktat ollah Ven’an Federacien Peruszakonua, federuallizii zakonoi da Ven’an Federacien muuloin normatiivizien oigevusaktoi vastah sego hänel on oigevus kiändyö suudoh;
• Käyttäy muuloi federuallizis zakonois, Karjalan tazavallan Peruszakonas da Karjalan tazavallan zakonois sanottuloi täyzivaldažuksii sego Ven’an Federacien Peruszakonan 78. pygäläs miärättylöi sobimuksii toimehpaniivallan federuallizien elimienke.

Huomavukset

Linkat

• Состав Правительства Республики Карелия (2012—2016) // gov.karelia.ru. Arhiivukoupii 31 talvikuudu 2010 Wayback Machine  (Kačondan päivymiäry: 20 elokuudu 2025)
• Указ о структуре органов исполнительной власти Республики Карелия от 24 марта 2016 года // gov.karelia.ru. Arhiivukoupii 8 sulakuudu 2016 Wayback Machine  (Kačondan päivymiäry: 20 elokuudu 2025)
• Указ от 6 апреля 2016 года "О составе Правительства Республики Карелия" // gov.karelia.ru. Arhiivukoupii 12 oraskuudu 2016 Wayback Machine  (Kačondan päivymiäry: 20 elokuudu 2025)