Sul'činat

Sul’činat
Kanzalline syömine
karjalaine, vepsäläine
Alguperämua	Suomi  Ven'a
Einehet
Piäeinehet	ruisjauho libo ozrujauho, vezi libo hapainmaido, libo maido, suolu, syväin, voi
Mahtonalazet	nižujauho

Sul’činat (vienankarjalakse šulččinat, lyydikse sulčinad, veps. sul'činad, suom. sultsinat, ven. сканцы, сульчины) on perindölline karjalaine da vepsäläine pastos. Se on ruisjauhos pastettu val'l'oi, kudaman syväimekse pannah pudruo. Piälepäi se voijellah hyväzesti voil. Sul'činoi piettih pruazniekkusyömizenny.

Pastandu

Karjalazet ammuzis aijois pastettih sul'činua. Niilöin pastajes sevoitetah riesku sagei tahtas. Sul'cinoi pastettih ruis- libo ozrujuahos, nygöi ližätäh nižujauhuogi keskeh. Taigin sevoitetah vedeh, hapainmaidoh libo maidoh. Pannah näppine suolua da jauhuo.

Tahtahas ajellah kuoret, kui šipainiekkoih niškoi. Kuori pidäy ajella moine hoikkaine, konzu puhut sih, ku se stolan piälpäi yläh nouzis. Enne sul'cinoi pastettih hiilien piäl päčinsuun ies libo päčinpohjal hiilien otettuu. Nygöi pastetah riehtiläl puoles dai toizes, siemenvoidu riehtiläle ei panna. Pastettuu sul'činat voijellah yhtes puoles sulatetul voil da lad’d’atah piälekkäi. Voijah lad'd'ata voijetut puolet vastakkai.

Syvves kuoren piäle pannah pudruo, rannat kiätäh, enzimäi yksi, sit toine sydämeh päi, sit vie kerdu kiätäh puolekkai libo kiäritäh sul'čin trubazelleh. Syväimekse keitetäh ei sagiedu mannoidu pudruo, brossu-, ozru- libo riissupudruo, kartohkupudruogi.

Karjalazet tavan mugah syvves sul’činoi katkattih puolekkai, sidä, ken tädä ei ruadanuh, sanottih ahnahakse.

Syvves sul'činoi painettih sulatettuh voih libo lämmäh kannatekseh. Syödih sul’činua vilun maijon libo ruahtomaijonke.

Sul'cinat oldih pruazniekkusyömizenny. Karjalazet ei pastettu sul'činua, sego šipainiekkua Äijäksepäiväkse, ei pyöritetty värtinästy sidä päiviä vaste. Piiraivärtinäine kai tavoiteltih peittiä loitomba, ku ei puuttus silmih, uskottih, ku puuttunou, sit kezäl maduo rubiet nägemäh.

Huomavukset

Kirjalližus

• Народы Карелии : историко-этнографические очерки / Российская академия наук, Карельский научный центр, Институт языка, литературы и истории; редакционная коллегия: И. Ю. Винокурова (ответственный редактор) [и др.]. — Петрозаводск : Периодика, 2019. — 752 с.
• Кольчурина, С. Н. Вкусная Карелия : путевые заметки коми-пермячки о карельской кухне / Светлана Кольчурина; [переводчики: Н. Н. Антонова, М. А. Спицына; фотограф С. Ю. Тиятявяйнен] ; Ассоциация этнокультурных центров и организаций по сохранению наследия "Эхо". — 2-е издание. — Петрозаводск : Кольчурина С. Н. : ЭХО, 2023. — 255 с. : ил. — Текст на русском и карельском языках. — ISBN 978-5-6043948-4-7
• Никольская Р.Ф. Сканцы // Карельская кухня. — Петрозаводск: Карелия, 1989. — С. 83—84. — 175 с.
• Pirkko Sallinen-Gimpl. Karjalainen keittokirja. — Helsinki: Kustannusosakeyhtiö Tammi, 2009. — 344 с.

Linkat

• За калиткой: вепсские сульчины и пряженцы