Vladimir Lukin
| Vladimir Lukin | |
|---|---|
 | |
| Roindupäivy | 22. kevätkuudu 1954 (72 vuottu) |
| Roindukohtu | Žil’čoi, Anuksen piiri |
| Kanzalližus |
 Nevvostoliitto→ Ven'anmua |
| Toimindu | opastai, virguniekku, Anuksen karjalazet -yhtistyksen piälikkö |
Vladimir Vasiljevič Lukin (ven. Владимир Васильеввич Лукин, roin. 22. kevätkuudu 1954) on anuksen karjalaine, yhteheiskunnalline ruadai, Anuksen karjalažet -yhtistyksen piälikkö. Vladimir Lukin monien vuozien aigah kuuluu Karjalazien kerähmön vallittuloin nevvostoh da Karjalan piämiehen tyves toimijah Karjalazien, vepsäläzien da suomelazien nevvostoh.
Eloskerdu
Vladimir Lukin on umbikarjalaine, rodinuhes Anuksen piirin Žil’čoin hierus. Hänen tuattah oli Žil'čoispäi, muamo – Yllözespäi. Perehes aiven paistih kahtel kielel: karjalakse da ven’akse, maltettih sežo suomen kieldy. Tuatto, Vasilii Lukin, ijän kaiken ruadoi šouferinnu, muamo, Anna Lukina, opastajannu, kul’tuurutaloin emändänny, sit ruadoi bol’ničas kancel’uaries.
Opastui Žil'čoin školas. Konzu pereh muutti Yllözeh, Vladimir rubei käymäh Yllözen školah. Yheksändeh da kymmenendeh kluassah kävyi Anukseh. Jälles školua lähti opastumah Petroskoin valdivonyliopistoh fiiziekku-matemuatiekan tiedokunnale, kudaman loppiettuu äijän vuottu ruadoi fiiziekan opastajannu Alavozes da Anukses.
Vladimir Vasiljevič hätken aigua ruadoi opastajannu, sit vie hätkembän Anuksen piirin administracies. Oli opastusozaston piälikönny, hoidi sociualukyzymyksii, oli administracien varapiälikönny.
On eläkkehel, eläy Anuksenlinnas.
Yhteiskunnalline ruado
Vuvvennu 2007 perustettih Anuksen karjalažet -yhtistys, sit aijas Vladimir Vasiljevič on sen alallizennu piälikönny. Yhtistyksen piäruadoloi on karjalan kielen da karjalazen kul’tuuran kehittämine. Yhtistys ruadau suurdu ruaduo piiris da Vladimir Lukin on sen joga ruavos.
Palkindot da arvonimet
Vladimir Lukinan ruado on korgiesti arvostettu tazavallan tazol.
- Vuvven 2013 laureattu Karjalan tazavallas;
- Karjalan tazavallan piämiehen rynnäsmerki "Panokses Karjalan tazavallan kehittämizeh" (2020)[1].
Huomavukset
- ↑ Министерство по национальной и региональной политике Республики Карелия. Группа во Вконтакте (рус.). Министерство по национальной и региональной политике Республики Карелия. Kačondan päivymiäry: 30. syvyskuudu 2025.