Grigorjev Grigorii Grigorjevič

Grigorii Grigorjevič Grigorjev
Anuksen gubernuattoru
oraskuu vuvvennu 1870 — oraskuu vuvvennu 1890
Ielolii	Julii Konstantinovič Arsenjev
Jatkai	Mihail Mihailovič Ves'olkin
Vladimiran varagubernuattoru
21. ligakuudu vuvvennu 1866 — 23. oraskuudu vuvvennu 1870
Ielolii	Platon Vasiljevič Safonov
Jatkai	Vasilii Aleksejevič Sem'onov
Penzan varagubernuattoru
26. heinykuudu vuvvennu 1863 — 21. ligakuudu vuvvennu 1866
Ielolii	Aleksandr Petrovič Percov
Jatkai	Aleksandr Mihailovič Žemčužnikov
Roindu	14. syvyskuudu 1819(1819-09-14) Varšavu
Kuolendu	5. kevätkuudu 1899(1899-03-05) (79 vuottu) Florencii, Itualii
Tuatto	Grigorii Vladimirovič Orlov
Muamo	Marija Osipovna Kos
Opastus	Imperuattoran liečetiijolline da hirurgielline akadiemii
Palkindot

Grigorjev Grigorii Grigorjevič (ven. Григо́рий Григо́рьевич Григо́рьев, 14. syvyskuudu 1819, Varšavu — 5. kevätkuudu 1899, Florencii^[d]) on peittonevvoi, vuozinnu 1870—1890 Anuksen gubernuattoru.

Eloskerdu

Gruafu Grigorii Vladimirovič Orlovan da Marija Osipovna Kosan (1799—1852) yhtehmenemättäh suadu poigu. Häi on roinnuhes 14. syvyskuudu vuvvennu 1819 Varšavas. Händy ristittih 17. elokuudu vuvvennu 1824 Kirkastuksen kirikös Piiteris.

Vuvvennu 1844 loppi Piiterin Imperuattoran liečetiijollizen da hirurgiellizen akadiemien. Sluuži Mariinskoin bol’ničas köyhile. Vuvvennu 1847 händy siirrettih Ven'an valdukunnan vojennoin ministerstvan kansel’uarieh. Vuvves 1850 ruadoi syväinazieloin ministerstvan toimikunnas talovusozaston huoliiruadajannu, virguniekannu erinomazis tehtävis.

Vuvvennu 1857 häi on Kriman voinan täh kärzinyzile Novorossien alovehen eläjile avvuttamistu sellittäjän Piäkomitietan ozanottai. 21. oraskuudu vuvvennu 1861 sai Tovelline valdivonevvoi -virguarvon. 26. heinykuudu vuvvennu 1863 — 21. ligakuudu vuvvennu 1866 on Ven’an valdukunnan Penzan gubernien varagubernuattoru. Vuvves 1866 — Vladimiran gubernien varagubernuattoru.

25. oraskuudu vuvvennu 1870 händy pandih Anuksen gubernien gubernuattorakse. Täs virras olles häi todevutti valdivon endizien muanruadajien mualoin kundohpanamizen vuvven 1866 uvvistuksen mugah. Hänen ehoitukses da hyvyös rakendettih Poventsa-Sumskii Posad -juamu, telegfuaffuliiniet Anukseh, Poventsah, Puudogah da Sumskii Posadah päi sego järjestettih alalline höyrylaivuliikeh Sumskii Posadan da manasterin välis, Poventsan, Puudogan, Vitegran da Arhangelin alovehen Voznesenjan välis. Vuvvennu 1875 händy ylendettih Peittonevvoi -virguarvoh.

G. G. Grigorjev työndi Ministrukomitiettah lipun tutkimuksien vältämättömäs piendäs Vienanmeren-Baltiekkumeren kanualan nostamizekse. 8. kevätkuudu vuvvennu 1886 Ministrukomitietan hyväksytyn miärävön mugah vuozinnu 1887 da 1888 valdivokaznan vuoh piettih tutkimusruadoloi kanualan rakendamizeh niškoi. Anuksen gubernien paikalline ičehalličus paikallizen statistiekallizen komitietan avul pidi kaikenpuolizen talovustutkimuksen da julgai sen erillizennu tevoksennu nimel "Vienanmerenkanualan talovuolline merkičys".

G. G. Grigorjev kiinitti suurdu huomavuo tervehyönhoijon, rahvahan opastuksen kehitykseh da alovehen luonnonvaroin tutkimukseh. Hänen ehoitukses uvvistettih zemstvan liečetoimisto. Gubernuattoran pakičukses Vitegra-linnas avattih gubernien enzimäine opastajien seminuarii opastajien valmistamizekse, da vuozinnu 1870—1880 rubei ruadamah eri virrastoloin enämbi kahtusadua uuttu rahvahan školua.

Häi toimekkahasti otti ozua Petroskoin kehitys- da parandamisruadoloih. Nosti ezile Pedri Suurele -mustopaččahan linnas azettamizen kyzymyksen Pedri I:n 200-vuozipäivän kunnivokse (mustopačas avattih vuvvennu 1873). Hänen aigah tuaste rubei ruadamah Petroskoin Rahvahalline kirjasto (1871), nostettih Petroskoin Duuhan kirikkö (1872) da azetettih paikallizen ičehalličuksen varoih mustopačas Aleksandru II:le (1885).

G. G. Grigorjevan johtol Petroskoil järjestettih Anuksen luonnontiijon, tevolližuon, histourien da etnogruafien muzei. Vuvves 1890 häi on Ven'an valdukunnan Syväinazieloin ministerstvan Nevvoston ozanottai.

On palkittu Ven'an valdukunnan Valgei kotku-, Pyhän Annan I da II astieloin, Ven’an valdukunnan Pyhän Stanislavan I astien, Pyhän Vladimiran II da III astieloin kunnivomerkilöil. On Ven'an muantiedoliiton da Imperuattoran Piiterin minerualougiellizen seuran ozanottai. Petroskoin da Anuksen gubernien ujezdulinnoin (Vitegran, Kargopol’an, Lodienoin, Anuksenlinnan, Poventsan, Puudogan) kunnivokanzalaine.

Kuoli 5. kevätkuudu vuvvennu 1899 Florencies da oli pandu muah Allorin kalmužimal.

Pereh

Enzimäiene mučoi oli kniäzitär Marija Ivanovna Odojevskaja(14.11.1833—13.07.1866), kniäzi Ivan Sergejevič Odojevskoin tytär, dekabristurunoilijan Aleksandr Ivanovič Odojevskoin sizär. Kuoli Penzas lapsen suajes, pandu muah Vladimiran gubernies. Heijän lapset:

• Ol’ga (15.07.1864— ?), Smol’noin instituutan loppenuh (1882), miehel (9. pakkaskuudu vuvvennu 1885) valdivonevvojan A. L. Novickoinke.
• Aleksandru (12.07.1866—07.08.1919), Imperuattoran oigevustiijollizen opiston loppenuh. Kniäzi Sergei Dmitrijevič Urusovan sanoin mugah, opastui muuzikkua, ga enimäl suvaičči viinan juondua da ylen terväh kargai tuatan siästämizet. Jälgivuozil eli Piiteris, kus uppoi erähäh kanualah, oli suadu viespäi da kuoli prostoloin ruadajien bol’ničas.

Toine mučoi (vuvves 1868) — Jelizaveta Vladimirovna Saveljeva-Rostislavič (1849—1917), Anuksen gubernien paikallizen haldivon piämiehen Vasilii Vladimirovič Saveljevan sizär. Heijän lapset:

• Vladimir (12.08.1869—vuvven 1925 jälgeh), Aleksandrovskoin liceis opastunnuh, kuoli muanpavos Jassat-kohtas.
• Vera (15.06.1873, Petroskoi — vuvven 1917 jälgeh).

Kirjutukset

• О существе власти губернатора и его официальном положении среди губернских должностных лиц.
• записка Г. Г. Григорьева. О государственном значении Беломорского канала // Русское судоходство. — 1890. — № 123/124. — С. 39—45.

Huomavukset

Kirjalližus

• Г. Г. Григорьев // Петрозаводск: хроника трёх столетий, 1703—2003 / под общ. ред. Н. А. Кораблева и др., Российская академия наук, Карельский научный центр РАН, Институт языка, литературы и истории КарНЦ РАН. — Петрозаводск: Периодика, 2002. — С. 111. — 512 с. — ISBN 5-88170-057-0.
• Кораблёв Н. А. Олонецкие губернаторы и генерал-губернаторы : биогр. справ / Н. А. Кораблёв, Т. А. Мошина. — Петрозаводск: Паритет, 2006. — С. 69—73. — 100 с. — ISBN 5-87870-006-9.
• Карелия: энциклопедия: в 3 т. / гл. ред. А. Ф. Титов. — Петрозаводск: ИД «ПетроПресс», 2007. — Т. 1: А — Й. — 400 с. — 3 000 экз. — ISBN 978-5-8430-0123-0.

Linkat

• Григорий Григорьевич Григорьев (рус.). library.karelia.ru. Kačondan päivymiäry: 7. elokuudu 2025.
• Портрет Г. Г. Григорьева (рус.). web.archive.org. Kačondan päivymiäry: 7. elokuudu 2025.
• Григорьев Григорий Григорьевич] // Список гражданским чинам IV класса. Исправлен по 15-е января 1874 года (рус.). viewer.rusneb.ru. Kačondan päivymiäry: 7. elokuudu 2025.