Kanzalline projektu "Matkailu da rahmannožus"

Kanzalline projektu "Matkailu da rahmannožus" on Ven'an erähii kanzallizii projektoi, kudai pandih alguh vuvvennu 2021 da uvvistettih vuvvennu 2024. Sen tavoittehekse sanottih matkailun alan roulin muan talohuos suurendamine da turistumatkoin kazvamine 140 miljonassah vuvven 2030 mennes.

Histourii

Allus algajen projektal oli nimi "Matkailu da rahmannožuon industrii". Se valmistettih vuvvennu 2020 koronaviirusan pandemien aigah da se sai Ven'an Federacien piämiehen Vladimir Putinan kannatuksen. Kanzalline projektu pandih rattahile vuvvennu 2021.

Sih kuului kolme alguhpanuo:

• Matkailun infrastruktuuran kehittämine,
• Matkailupalveluloin suadavuon ližiämine,
• Ohjailun parandamine matkailun alal.

Ligakuul vuvvennu 2022 Ven’an piämiehen käskys loppi ruandan Federualline matkailun agenstvu (ven. Ростуризм), virrasto kudai kehitti da vastai kanzallizes projektas. Sen funksiet annettih Ven’an Federacien talohuon kehittämizen ministerstvale. Kanzallizen projektan kuruattorannu jäi varapiäministru Dmitrii Černišenko.

Väliaigazet tulokset

Matkailu da rahmannožuon industrii -projektan todevutandu loppih vuvven 2024 lopus. Samannu vuon kylmykuul Černišenko väliaigazii tuloksii luadijes pani merkile, ku sen todevutandah valdivollizes b’udžietaspäi annettih 200 miljardua rubl'ua da ilmoitti:

Kaikkien tunnuksien mugah on pozitiivine kehitys. Ezimerkikse, turistumatkoin lugu muadu myöte kazvoi 45 miljonas vuvvennu 2020 84 miljonassah vuvvennu 2023. Vuvven 2024 tuloksien mugah vuotammo läs 92 miljonua turistumatkua.

Kanzallizen projektan tärgeilöis piätöksis häi mainičči arvonližäveros matkanjärjestäjien da hotelilois yövyndypalveluloin piästämizeh nähte vuodessah 2027 sego nol’a-arvonližäveron jatkamizen hoteliloih nähte vuodessah 2030.

Maksim Rešetnikov ilmoitti, ku kanzalline projektu enziallus oli lykykkähänny kriizisanvastazennu instrumentannu.

Projektan todevutandas paistes talohuon kehittämizen ministru Maksim Rešetnikov juohatti, ku enziallus se rodih kriizisanavastazennu instumentannu, kudai autoi alale piästä koronoviirusan pandemien jälgivaikutuksis:

Käyttöh otettuloin miärien mugah puutui ei vaiku säilyttiä ala, ga alguagi infrastruktuuran kehittämizen pluanoin todevutandan. Ruvettih ruadamah helpotuskrediittuohjelmat hoteliloin nostamizekse da modulihoteliloin subsidiiruičendah nähte. Kodimuan matkailu rubei ruttoh kehittymäh. Biznessu vastai kazvajua kyzyndiä: suurettih investiciet. Vuvven 2024 enzimäzes puoliškos biznessu huokutteli 377 miljardua rubl’ua, mi on 60 % suurembi migu samas aijas mulloi.

Kuvailu

Uvvistettu kanzalline projektu sai Matkailu da rahmannožus -nimen, sih kuuluu viizi federuallistu projektua:

• Hotelihuonehenfondan luadimine,
• Meritervehyönhoidolat,
• Muan matkailuviehättävys,
• Ruadajat,
• Matkailun talovuolline turvuamine.

Kanzallistu projektua todevutetah vuodessah 2030. Muan piämies andoi tehtävän suurendua matkailun vuittii yhtehizes muantuotandos 5:ssäh %.

Piätapahtumat

Kanzallizen projektan hantuzis Talohuon kehittämizen ministerstvu sen johtajan sanoin mugah piätavoittehikse azettau kyzyndöin kehityksen — yövyndysijoin perustamistu da suurendamistu, uuzien matkailukohtien muvvostandua. Jälgimäzekse mainittuloi ollah mägihiihtokeskukset, akvaparkat, ymbäri vuvven ruadajat iloitusparkat. Reknaillah luadie 59 tuhattu uuttu hotelihuonehtu da ližätä huogavoh da iloitukseh nähte luajittuh infrastruktuurah käyndöi 23 miljonassah hengie vuvves. Ližäkse huavatah:

• Luadie ymbäri vuvven ruadajii merikurortoi — 11 projektua Ven’an Federacien yheksäs subjektas: enämbi 72 tuhattu uuttu hotelihuonehtu da 80 tuhattu ruadosijua.
• Moduliyövyndysijoin nostamine — 10 tuhattu uuttu hotelihuonehtu.
• Ven’an Federacien yhtehine subsiidii tapahtumien pidämizeh, linnoin histouriellizien keskuksien kunnostamizeh, kezoirandoin da matkailumaršruuttoin kunnostamizeh, ei-perustehellizen valgamoinfrastruktuuran luadimizeh, se ližiäs turistumatkoi 7,4 miljonal.
• Projektat ruavon tehokkohuon suurendamizekse 57 laitokses matkailualal Siästäväine tuotando -alal.
• Opastus-metoudizien kompleksoin valmistamine da ruadajien opastamine matkailun da rahmannožuon industrieh niškoi, opastujien lugu — 53 tuhandessah.

Kanzallizen projektan todevutandan kriitiekku

Talvikuul vuvvennu 2021 Ven'an piämies Vladimir Putin kritikuičči kanzallizen projektan todevutandua. Häi sanoi, ku virgumiehet pietäh otčottua 83,1 % annettuloin varoin kulutandas, a suurin oza dengois meni ei tovellizih ruadoloih, infrastruktuuran da objektoin nostamizeh, a maksoloih ven. "Туризм.рф"-korporacien piäkapitualah niškoi (korporacii perustettih talvikuul vuvvennu 2020 piäministran Mihail Mišustinan käskys kodimuan da kodimuahtulendan matkailun kehittämizekse). Samal aigua kai piäruavot on ruattu vaiku 51:l %.

Huomavukset