Ol'ga Nikitina
| Ol'ga Ivanovna Nikitina | |
|---|---|
 Ol'ga Nikitina Kotkatjärven školas Ven'al imoitetun Opastajan vuvven allus (vuozi 2023) | |
| Roindupäivy | 7. sulakuudu 1968 (56 vuottu) |
| Roindukohtu | Kin'alahti, Priäžän piiri, Karjalan avtonoumine socialistine nevvostotazavaldu |
| Kanzalližus |
 Nevvostoliitto,  Ven'anmua |
| Toimindu | karjalan kielen opastai |
| Palkindot da arvonimet |
Karjalan tazavallan Vuvven opastai -kilvan Paras muamankielen opastai -nominacies voittai, Karjalan tazavallan arvostettu opastai, Karjalan tazavallan halličuksen kunnivokirjaine |
Ol'ga Ivanovna Nikitina (7. sulakuudu 1968) on kotkatjärveläine karjalan kielen opastai, Karjalan tazavallan Vuvven opastai -kilvan Paras muamankielen opastai -nominacies voittai (2013), Karjalan tazavallan arvostettu opastai (2014), Karjalan tazavallan halličuksen kunnivokirjazen suannuh (2023).
Eloskerdu
Ol'ga Nikitina on roinnuhes Priäžän piirin Kin'alahten kyläs karjalazeh pereheh. Hänen tuattah da muamah mollei oldih karjalazet.
Opastui kodvazen Kin'alahten školas enzimäzes kluasas, sit pereh muutti Louhen piirin Piäjärveh, kus Ol'ga loppi kymmene kluassua.
Školan jälles opastui Piiteris jallaččiloin viilijäkse opistos № 121. Vuvvennu 1988 piäzi opastumah lapsienkazvattajakse Petroskoin pedagouguopistoh № 2, kudaman loppi vuvvennu 1990.
Miehele mendyy vuvves 1990 Ol'ga Ivanovna eläy Kotkatjärven kyläs.
Ol'ga Nikitina 33 vuottu ruadoi Kotkatjärven školas da 27 vuottu niilöis opasti karjalan kieldy. Enne školah ruadoh tulendua ruadoi Kotkatjärven päivykois, nelli vuottu oli lapsienkazvattajannu, sit kerhon opastajannu. Vuvvennu 1997 Ol'ga Nikitinua kučuttih ruadoh Kotkatjärven školah, kus häi rubei ruadamah enzimäi sociualupedagougannu, sit jo karjalan kielen opastajannu.
Karjalan kieldy Ol'ga Ivanovna puaksumbah kuuli omas buabas, kudamas opastuigi sih. Ližiä neruo karjalan kirjukieles sai Petroskoin valdivonyliopistos baltiekkumerensuomelazien kielien da kul'tuuran tiedokunnal, kus opastui zaočno vuozinnu 2000-2003.
Minul oldih hyvät da oigiet opastajat. Yliopistos Jelena Viktorovna Bogdanova kaikel sydämel pani minuh suvaičuksen omah kieleh. Häi sanoi, ku ei sua kaimata kieldy, kudamah olet opastunnuh lapsennu.
Minun toizennu opastajannu oli Zinaida Timofejevna Dubinina. Häi minuu enzimäi tarkasti, a sit ainos kyzeli, kui menöy opastamine školas. Minul ei olluh jygei opastua kieldy, sendäh ku oldih hyvät abuniekat: Zinaida Dubinina, Marija Pelešenko da yliopiston tiedämizet.
— Oma Mua, № 2, 2023
Ol'ga Nikitina on harjaitannuh karjalan kieleh da karjalazeh kul'tuurah ei yhty polvie opastujua. Hänen opastujat ainos otettih ozua da roittih voittajikse kielikilvois Karjalan tazavallas da omas Anuksen piiris, ruvettih ozuttamah omii neroloigi Kogo Ven'an muamankielen da kirjalližuon kilvas, kudamale algu Karjalas oli pandu vuvvennu 2023[1]. Tämän tagan on opastajan suuri ruado da malto kiinnostuttua opastujii karjalan kielen opastumizeh.
 Anuksen piirin Kotkatjärven da Tuuksen školan opastujat Kogo Ven'an muamankielen da kirjalližuon kilvas, vuozi 2023 |
Palkindot da arvonimet
Ol'ga Nikitina on suannuh äijän kunnivo- da kiitändykirjastu omas ruavos karjalan kielen da karjalazen kul'tuuran hyväkse, suavutuksis karjalan kielen opastandas. Häi on monien opastajien kilboin ozanottai da voittai, monien arvonimilöin suannuh. Niilöin joukos ollah:
- Paras metoudiekkuopastusnevvo karjalan, vepsän da suomen kielel -kilvan voittai (2006).
- Karjalan tazavallan Vuvven opastai -kilvan voittai Paras muamankielen opastai -nominacies (vuozi 2013)[2].
- Karjalan tazavallan arvostettu opastai (2014).
- Anuksen kanzallizen piirin kunnivokirjaine monivuodizes kunnollizes ruavos opastandan alal (2021).
- Karjalan tazavallan halličuksen kunnivokirjaine korgies pedagougizes neros, monivuodizes kunnollizes ruavos da panokses Karjalan tazavallan opastuksen kehittämizeh (2023)[3].
Huomavukset
Kirjalližus
- Jelena Ruppijeva. Karjalan kielen opastajan ruavon tunnustus // Oma Mua. — 2023. — 18. pakkaskuudu (№ 2). — С. 2.
- Nadežda Mičurova. Pidäy opastua muga, gu lapsel silmät palettas // Oma Mua. — 2023. — 5. sulakuudu (№ 13). — С. 5.
- Nadežda Mičurova. Pidäy opastua muga, gu lapsel silmät palettas // Oma Mua. — 2023. — 12. sulakuudu (№ 14). — С. 7.