Ontrei Malinen
| Ontrei Malinen | |
|---|---|
| Roindupäivy | 1777 da 1781 vuvven välil |
| Roindukohtu | Vuonnini, Ven'an valdukundu |
| Kuolendupäivy | 1855 da 1856 vuvven välil |
| Toimindu | runonpajattai, mečästäi, tiedoiniekku |
Ontrei Malinen (1777 da 1781 vuvven välil – 1855 da 1856 vuvven välil)[1] on karjalaine runonpajattai. Runuo hänes kirjutti "Kalevalan" luadii Elias Lönnrot.
Eloskerdu
Ontrei Malinen oli roinnuhes Vuonnizen kyläh. Oli Malizen runonpajattajien suvun alguhpanijannu[1]
Lönnrot kirjutti hänes runoloi syvyskuul vuvvennu 1833. Hänes da Arhippa Perttuzes Lönnrot kirjutti tävvellizembät runot[2].
Kirjuttamah runuo Ontrei Malizes vie enne, elokuul vuvvennu 1825, kävyi Andrei Šögren, häi kirjutti kaksi libo kolme runuo[2].
Ontrei Malinen oli vägevänny tiedoiniekannu da hyvänny mečästäjänny, omal pajatandal maltoi kiškuo hammastu kondiel[2]. Anni Lehtoni, Ontrei Malizen sugulaine, nenga sanoi hänes:
„Sehäi on olluh kogo kyläs mielevin. On olluh kirjuniekannu.Anni Lehtoni, Vienan läänin runonlaulajat ja tietäjät
Onteri Malinen nerokkahasti soitti viizikielizel kandelehel[2]. Sen neron suadih hänes poijatgi. Ontrein vuvvennu 1833 luajittu kannel oli olemas vie vuvvennu 1877, konzu suomelaine folklouran keriäjy Aksel Borenius sen osti Suomen Kansallismuzeile[2].
Ontrei Malizen poijat Jyrki da Vaslei Malizet sežo oldih kuulužinnu runonpajattajinnu. Heis kirjutettih tuhanzii rivilöi da kymmenii runoloi. Anni Lehtozen sanoin mugah Ontrein tytär Ul'l'ana oli tundiettu itkettäi[2].
Ontrei Malinen kuoli 75-vuodizennu[2].