Sulo Juntunen

Sulo Heikkijevič Juntunen
Sulo Heikkijevič Juntunen
	Tiijosto:ЮнтуненС.Х.jpg
Roindupäivy	1. syvyskuudu 1915
Roindupaikku	Petrograd, Ven'an valdukundu
Kuolendupäivy	19. kylmykuudu 1980 (65 vuottu)
Kuolendupaikku	Petroskoi, Karjalan avtonoumine sicialistine nevvostotazavaldu, Nevvostoliitto
Mua	Ven'an valdukundu[d]; Suomi; Nevvostoliitto;
Žanru	ymbäristökuva

Tiijosto:Ptz-doska-52.JPG

Mustolaudu Petroskois Leninan prospektal, taloi № 8.

Sulo Heikkijevič Juntunen (1. syvyskuudu 1915 – 19. kylmykuudu 1980) on nevvostolaine taidoilii, taidomualuaju, gruafiekku, ymbäristökuvien piirustai. Nevvostoliiton rahvahan taidoilii (1980)^[1].

Eloskerdu

Oli roinnuhes Petrogradas, inkeriläzen kengänombelijan Heikki Juntuzen pereheh.

Vuozinnu 1920 pereh lähti elämäh Suomeh. Tamperel loppi rahvahan školan, sit ammattiškolas sai raudusepän da valajan ammatin.

Vuvvennu 1932 pereh peitoči venehel soudi Suomenlahtes poikki da tuli Leningruadah, kuspäi kiiniotandan da piäständän jälles oli työtty elämäh Urualale. Vuvvennu 1934 Sulo muamanke muutti Karjalan avtonoumizeh socialistizeh nevvostotazavaldah Petroskoih. Ruadoi Oniegan mašinoinrakendus- da metallurgiizavodal valanduozastol muovailijannu.

Vuozinnu 1934—1936 opastui Petroskoin meččytehnikumas, vuozinnu 1936—1941 — Petroskoin rahvahan taijon taloin piirustus-stuudies Karjalan avtonoumizen socialistizen nevvostotazavallan taidoalan arvostetun ruadajan V. N. Popovan johtol, yhtel aigua loppi opastajien kursit.

Suuren Ižänmuallizen voinan allettuu händy inkeriläzenny olles armieh ei otettu. Oli työtty evakkoh Permin alovehele, kus ruadoi meččyruadolois. Vuvvennu 1945 tuli järilleh Petroskoih.

Luomisruado

Vuvvennu 1946 Sulo Juntustu otettih Nevvostoliiton taidoilijoin liittoh.

Taidoilijan uvvet ruavot oli luajittu nevvostolazen ymbäristökuvan perindölöin mugah tarkukohtienke (”Oniegujärvi”, 1950; ”Čirka-Kemin jogi”, 1954 da muut), myöhembi ominažuonnu rodih kuvan tarkus da vagavus (”Jiä sulau”, 1960; ”Valgei yö”, 1960; ”Kylmykuun päivy”, 1960 da toizet). Taidoilijan 1960-luvun ruavos värit roittih äijiä kirkahembat (”Uuzi valgamo”, 1965; ”Kezä. Lohijogi”, 1969; ”Minun Karjal”, 1969 da toizet). Vuozinnu 1970 Juntunen piirusti panoruamuymbäristökuvien sarjua (”Kivizien järvilöin keskes”, 1970; ”Uvven Karjalan ymbäristökuva”, 1972; ”Pohjazen päiväzen al”, 1976 da toizet).

Vuozinnu 1953—1967 Juntunen oli Karjalan avtonoumizen socialistizen nevvostotazavallan Taidoilijoin liiton piälikönny.

Oli vallittu Karjal-Suomelazen avtonoumizen socialistizen nevvostotazavallan Korgeviman nevvoston deputuatakse.

Taidoilijan ruavot oldih ezil ozuttelulois: Kogo Nevvostoliiton (1950—1981), Kogo Ven’an (1957—1999), alovehellizis (1964—1998), Karjalan taidoilijoin Moskovas (1951, 1959, 1980) da Leningruadas (1972, 1980), persounalizis Moskovas (1965), Petroskois (1965, 1975, 1985, 1995, 2000), Suomes (1966, 1969, 1976), Germuanies (1972, 1977, 1981, 1985).

Taidoilijan tevokset ollah ruokos Valdivollizes Tretjakovan gallereis, Valdivollizes Ven’alazes muzeis, Karjalan tazavallan taidomuzeis, Karjalan tazavallan kanzallizes muzeis, yksittäzis keräilemis Ven'al da ulgomual.

Kuoli 19. kylmykuudu Petroskois jälles jygiedy taudii. On pandu muah Suolusmäin kalmužimale^[2].

Pereh

Poigah — Oleg Sulovič Juntunen (1948—2005), taidoilii. Ven’an Federacien arvostettu ruadai (2002).^[3]

Arvonimet da palkindot

Karjal-Suomelazen socialistizen nevvostotazavallan taidoalan arvostettu ruadai (1953)
Ven’an Federatiivizen socialistizen nevvostotazavallan taidoalan arvostettu ruadai (1959)
Ven’an Federatiivizen socialistizen nevvostotazavallan rahvahan kirjuttai (1970)
Nevvostoliiton rahvahan taidoilii (1980)^[4]
Karjalan avtonoumizen socialistizen nevvostotazavallan valdivolline palkindo (1969)
Orden Trudovogo Krasnogo Znameni –kunnivomerki
Rahvahan ystävyön kunnivomerki (1975)
Znak Počota -kunnivomerki (1951)^[5]

Huomavukset

↑ Карелия: энциклопедия: в 3 т. / гл. ред. А. Ф. Титов. Т. 3: Р — Я. — Петрозаводск: «ПетроПресс», 2011. — 384 с.: ил., карт. — С. 304 ISBN 978-5-8430-0127-8 (т. 3)
↑ S. Juntuzen kalmu
↑ O. S. Juntunen
↑ Указ Президиума Верховного Совета СССР от 19 июня 1980 года № 2315—Х «О присвоении почетного звания «Народный художник СССР» тов. Юнтунену С. Х.» // «Ведомости Верховного Совета Союза Советских Социалистических Республик». — № 26 (2048) от 25 июня 1980 года. — Ст.509.
↑ Указ Президиума Верховного Совета СССР от 29 октября 1951 года «О награждении орденами и медалями работников искусств Карело-Финской ССР»

Kirjalližus

Калинин Е. С. Художники Карелии. — Петрозаводск, 2000
Народные избранники Карелии: Депутаты высших представительных органов власти СССР, РСФСР, РФ от Карелии и высших представительных органов власти Карелии, 1923—2006: справочник / авт.-сост. А. И. Бутвило. — Петрозаводск, 2006. — 320 с.
Балагурова Ю. М. Отец и сын. Художники Суло и Олег Юнтунены: Пейзажи одинокой души / Балагурова Ю. М. Юсупова З. Г.. — «Инсан», 2008. — 191 с. — ISBN 978-5-85840-011-0.

Linkat

[1] Карелия: энциклопедия: в 3 т. / гл. ред. А. Ф. Титов. Т. 3: Р — Я. — Петрозаводск: «ПетроПресс», 2011. — 384 с.: ил., карт. — С. 304 ISBN 978-5-8430-0127-8 (т. 3)

[2] S. Juntuzen kalmu

[3] O. S. Juntunen

[4] Указ Президиума Верховного Совета СССР от 19 июня 1980 года № 2315—Х «О присвоении почетного звания «Народный художник СССР» тов. Юнтунену С. Х.» // «Ведомости Верховного Совета Союза Советских Социалистических Республик». — № 26 (2048) от 25 июня 1980 года. — Ст.509.

[5] Указ Президиума Верховного Совета СССР от 29 октября 1951 года «О награждении орденами и медалями работников искусств Карело-Финской ССР»

[1]

[2]

[3]

[4]

[5]