Surhasko Jugo Jul'jevič
| Jugo Jul'jevič Surhasko | |
|---|---|
.jpg) | |
| Roindupäivy | 4. kevätkuudu 1929 |
| Roindupaikku | Leningruadu |
| Kuolendupäivy | 2002 |
| Tiedoala | etnogruafii |
| Opastus | Petroskoin valdivonyliopisto |
| Oppiarvo | histourientiedoloin kandiduattu |
| Tundietah | karjalazien svuad'buperindölöin tutkijannu, kiändäjänny |
| Arvonimet da palkindot | Karjalan tazavallan tiedoalan arvostettu ruadai, Karjalan avtonoumizen socialistizen nevvostotazavallan kul'tuurualan arvostettu ruadai |
Jugo Jul'jevič Surhasko (ven. Юго Юльевич Сурхаско; 4. kevätkuudu vuvvennu 1929 — vuvvennu 2002), etnograffu, histourientiedoloin kandiduattu, Ven'an tiedoakadiemien Karjalan tiedokeskuksen Kielen, literatuuran da histourien insituutan vahnembi tiedoruadai. Karjalan tazavallan tiedoalan arvostettu ruadai, Karjalan avtonoumizen socialistizen nevvostotazavallan kul'tuurualan arvostettu ruadai[1].
Eloskerdu
Jugo Surhasko oli roinnuhes 4. kevätkuudu vuvvennu 1929 Leningruadas. Tuattah — Julius Aleksandrovič Surhasko, muamah — Aino Matvejevna Lattunen, tuttavuttih hyö Petrogruadas vuvvennu 1917. Vuvvennu 1918 mendih yhteh, vuvven peräs heile rodih tytär, a kymmenen vuvven peräs Jugo. Samannu vuon Surhaskot muutettih Karjalah, Kondupohjah)[2].
Vuvvennu 1938 nevvostolazien suomelazien repressieloin aigah Surhaskon tuattua otettih kiini. Perehes ei tietty, kus da konzu händy ammuttih da pandih muah. Vuvvennu 1956, jo kuoltuu, händy reabilitiiruittih[2].
Talvivoinan aigah pereh eli Kondupohjas. Suuren Ižänmuallizen voinan allettuu, elokuul vuvvennu 1941, lähtiettih evakkoh Kirovan alovehele[2].
Pakkaskuul vuvvennu 1949 pereh muutti Belomorskah, vuvven puolivälis Petroskoih[2].
Vuozinnu 1949—1955 Surhasko opastui Karjal-suomelazen valdivonyliopiston suomi-ugrilazel ozastol.
Syvyskuul-ligakuul vuvvennu 1955 ruadoi Junii leninec -lehten toimitukses, sit vuvven 1957 elokuussah oli Petrovskoin histouriellizen muzein tiedoruadajannu Dvorčan kyläs[2].
Vuvvennu 1964 piäzi opastumah Nevvostoliiton tiedoakadiemien Etnogruafien instituutan aspirantuurah.
Vuvves 1966 ruadoi Karjalan tiedokeskuksen Kielen, literatuuran da histourien instituutas. Tutki karjalazien perehritualoi da uskonduo.
Vuvvennu 1978 puolisti kandiduatan väitösruavon karjalazien svuad'buperindölöis. Vuozi enne Nauka-julguamos piäzi ilmah hänen perinpohjaine tutkimus ven. «Карельская свадебная обрядность», kudai sikse aigua da tässäh on sit aihies tävvellizenny tutkimuksennu.
Surhasko kiändi suomen- da karjalankielizii tevoksii ven'an kielele. Hänen kiännettylöin tevoksien joukkoh kuulutah Nikolai Jaakkolan ven. «Водораздел», Pertti Virtarannan kniigu ven. «Этюды о карельской культуре. Люди и судьбы».
Surhasko pidi luvendoloi Petroskoin valdivonyliopistos baltiekkumerensuomelazen tiedokunnal.
Kuoli vuvvennu 2002.
Bibliogruafii
Surhasko on enämbän migu 40 tiedoruavon kirjuttajannu. Tundiettuvimat ollah:
- Карельская свадебная обрядность (Л., 1977)
- Семейные обряды и верования карел (Л., 1985)
- Баня в семейном быту карел // Обряды и верования народов Карелии (П., 1992. С. 68-85) (toizien kirjuttajien joukos)
- О карельской народной медицине: рациональное и иррациональное в традиционном врачевании // Обряды и верования народов Карелии (П., 1994. С. 103—121)
- Обряды жизненного цикла // Прибалтийско-финские народы России (М., 2003. С. 263—268) (toizien kirjuttajien joukos).
Palkindot da arvonimet
- Karjalan tazavallan tiedoalan arvostettu ruadai
- Karjalan avtonoumizen socialistizen nevvostotazavallan kul'tuurualan arvostettu ruadai
Huomavukset
Kirjalližus
- Логинов, К. К. Сурхаско Юго Юльевич / К. К. Логинов // Карелия : энциклопедия. В 3 т. Т. 3. Р-Я. — Петрозаводск, 2011. — С. 155; Сурхаско Ю. Ю. // Учёные Карельского научного центра Российской академии наук : биогр. слов. — 3-е доп. и перераб. изд. — Петрозаводск, 2012. — С. 395—396.
- Ученые Карельского научного центра Российской академии наук : биографический словарь / [гл. ред. А. Ф. Титов; отв. ред. Ю. В. Савельев; редкол.: Е. В. Жирнель и др.]. — 3-е изд., доп. и перераб. — Петрозаводск : Карельский научный центр РАН, 2012. — 419, [1] с. ; 21 см. — Библиогр. в конце ст. — Алф. указ.: с. 409—419. — ISBN 978-5-9274-0490-2