Viktor Jevsejev
| Viktor Jakovlevič Jevsejev | |
|---|---|
 | |
| Roindupäivy | 13. heinykuudu 1910 |
| Roindupaikku |
Jehkilän kylä, Suomen suuri kniäzikundu, nygöi Suojärven piiri, Karjalan tazavaldu |
| Kuolendupäivy | 12. talvikuudu 1986 |
| Kuolendupaikku | Petroskoi, Karjalan avtonoumine socialistine nevvostotazavaldu |
| Mua |
 Ven'an valdukundu→ Nevvostoliitto |
| Tiedoala | Suomi-ugrilaine kielitiedo, folkloristiekku |
| Ruadokohtu | Leningruadan valdivonyliopisto |
| Opastus | Ven'an tiedoakadiemien Karjalan tiedokeskuksen Kielen, literatuuran da histourien instituuttu |
| Oppiarvo | Filolougientiedoloin douhturi (1958) |
| Tiedoarvonimi | professoru (1968) |
| Tiedo-ohjuaju | Dmitrii Vladimirovič Bubrih |
| Arvonimet da palkindot |
 |
Viktor Jakovlevič Jevsejev (13. heinykuudu 1910 – 12. talvikuudu 1986) on nevvostolaine folkloristu, filolougientiedoloin douhturi, professoru, Ven'an tiedoakadiemien Karjalan tiedokeskuksen Kielen, literatuuran da histourien instituutan vahnin tiedoruadai, Karjalan avtonoumizen socialistizen nevvostotazavallan tiedoalan arvostettu ruadai (1967).
Eloskerdu
Viktor Jevsejev oli roinnuhes liygiläzien pereheh Jehkilän kyläh Suojärvie lähäl. Vuvvennu 1917 pereh muutti Petroskoih.
Keskiškolan loppiettuu piäzi opastumah Leningruadan valdivonyliopistoh, kävyi sežo akadiemiekan N. J. Marran luvendoloile Jafetičeskoih instituuttah.
Vuvves 1931 Jevsejev on Karjalan tiijollizen tutkimusinstituutan ruadajannu. Jevsejev tutki karjalastu rahvahanrunohuttu.
Vuozien 1935-1939 aigah ruadoi Karjalan pedagouguinstituutas assistentannu yleiskielitiijon alal, Punainen Karjala -lehten toimituksen literatuururuadajannu, kiändäjänny Karjalan valdivollizes julguamos.
Vuvvennu 1939 tuli uvvessah ruadoh Karjalan tiijollizeh tutkimusinstituuttah. Vuvvennu 1940 piäzi ilmah hänen luajittu enzimäine karjal-suomelazien runoloin da pajoloin folklourukogomus "Sampo".
Suuren Ižänmuallizen voinan allettuu ruadoi evakos Belomorskas Karjal-Suomelazen nevvostotazavallan Gosizdatan redaktorannu. Vuvvennu 1944 händy otettih armieh Karjalazele frontale.
Voinan jälles ijän kaiken Viktor Jevsejev ruadoi Ven'an tiedoakadiemien Karjalan tiedokeskuksen Kielen, literatuuran da histourien instituutas. Vuvves 1946 kuului Nevvostoliiton kirjuttajien liittoh. Jevsejevan oučerkoi da kirjutuksii painettih ven. Дружба народов-, ven. Звезда-, Punalippu-, ven. На рубеже-žurnualoih, Vengries da Suomes.
Tuhukuul vuvvennu 1948 Dmitrii Bubrih kirjutti Jevsejevan tutkimusruadoh nähte[1]:
Viktor Jevsejevan tiijot karjal-suomelazen foklouran kyzymyksis ollah ainavoluaduzet da hänen arvo tiedoruadajannu on ylen korgei. Häi on tiedoruadai ei virgua myöte, a induo myöte
Vuvvennu 1958 ven. Исторические основы карело-финского эпоса-monogruafien enzimäzes ozas Viktor Jevsejevale oli annettu filougientiedoloin douhturin oppiarvo.
Jevsejevua tundietah karjalazen rahvahan folklouran keriäjänny, tutkijannu da ven'an kielele kiändäjänny. Tutkii pidi luvendoloi suomi-ugrilazes folklouras Petroskoin, Mordouvien da Siktivkaran yliopistolois. Vuvvennu 1968 A. M. Gor'koin nimizes literatuuruinstituutas hänele oli annettu professoran tiedoarvonimi.
Jevsejev oli ristin-rästin ajelluh Karjalan. Häi kävyi sinne, kunne jygei oli puuttuo. Oli pohjazis kylis, Keski-Karjalas, Karjalan suvipuolel, Tverin karjalazilluo. Vuvvennu 1935 Jevsejev pyöräl kävyi läs 30 kyläh. Kaheksastostu päiväs oli ajeltu läs 500 kilometrii. Omien tutkimusmatkoin aigua häi kirjutti karjalazis ylen äijän eeppistu pajuo, suarnua, virty, joiguu. Enimät on pandu hänen luajittuloih kniigukogomuksih.
On pandu muah Suolusmäin kalmužimale Petroskois[2].
Tiedoruavot
Ulgopuolizet videotiijostotOn painettu enämbi viittykymmendy Viktor Jevsejevan tiedoruaduo tiedokniigoih da -žurnualoih.
- Сампо: сб. карел.-фин. рун. — Петрозаводск, 1940. — 182 с.
- Руны и исторические песни. — Петрозаводск, 1946. — 87 с.
- Избранные руны Архипа Перттунена. — Петрозаводск, 1948. — 74 с.
- Карельские эпические песни. — М.,Л., 1950—526 с.
- Исторические основы карело-финского эпоса. — М.-Л., 1957
- Карельский фольклор в историческом освещении. — Л.: Наука, 1968. — 203 с.
- Карельские народные песни (в 2-х томах). — Таллин, 1976, 1980
- Карельское научно-поэтическое творчество. 1981
- Карело-финский народный эпос (в 2-х книгах). — М., 1994. Кн. 1. — 476 с., Кн. 2. — 510 с.
Palkindot da arvonimet
Viktor Jevsejev on Karjalan avtonoumizen socialistizen nevvostotazavallan tiedoalan arvostettu ruadai, Kalevalaseuran jäsen da Suomalaisen Kirjallisuuden Seuran ulgomualaine korrespondentu-jäsen.
Musto
Viktor Jevsejevan 100-vuozipäiväkse Karjalan tiedokeskuksen Kielen, literatuuran da histourien instituutas piäzi ilmah ven. У истоков карельской фольклористики. К 100-летию В.Я.Евсеева-kniigu, kudaman allus on sanottu Jevsejevan elokseh da ruadoh nähte. Sen jälgeh on tutkijan tutkimusruadoloin, häneh näh kniigoin da kirjutuksien luvettelu da hänen kerättylöin materjualoin, kudamat ollah ruokos Karjalan tiedokeskuksen Kielen, literatuuran da histourien instituutan arhiivas, luvettelu. Enzimäzen luvettelun luadi karjalazen literatuuran tutkii Natalja Čikina, toizen — rahvahanrunohuon tutkii Valentina Mironova.
Huomavukset
Kirjalližus
- Писатели Советской Карелии: справочник / Авт.-сост. А. А. Иванов. — Петрозаводск, 1959. — О Евсееве В. Я.: с. 38-39.
- Карелы Карельской АССР. — Петрозаводск: Карелия, 1983. — О Евсееве В. Я.: с. 210, 252, портр.
- Пертти Виртаранта. Этюды о карельской культуре: Люди и судьбы. — Петрозаводск: Карелия, 1992. — 287 с.
- Евсеев Виктор Яковлевич // Писатели Карелии: биобиблиографический словарь. — Петрозаводск, 2006 — С. 159—160.
- Карелия: энциклопедия: в 3 т. / гл. ред. А. Ф. Титов. Т. 1: А — Й. — Петрозаводск: ИД «ПетроПресс», 2007. С. 321—400 с.: ил., карт. ISBN 978-5-8430-0123-0 (т. 1)
- У истоков карельской фольклористики. К 100-летию В. Я. Евсеева. Биография, библиография. — Петрозаводск: КарНЦ РАН, 2010. — 72 с. ISBN 978-5-9274-0406-3