Galina Lettijeva
| Galina Lettijeva | |
|---|---|
 | |
| Täyzi nimi | Galina Jegorovna Lettijeva |
| Roindupäivy | 3. kezäkuudu 1944 (82 vuottu) |
| Roindukohtu | Kemi, Karjal-suomelaine socialistine nevvostotazavaldu, Nevvostoliitto |
| Kanzalližus |
 Nevvostoliitto,  Ven'anmua |
| Toimindu | toimittai, kiändäi, opastai |
Galina Jegorovna Lettijeva (3. kezäkuudu vuvvennu 1944) on filoulogu, toimittai, kiändäi, opastai, karjalaine aktivistu da karjalazen rahvahan Oma Pajo -horan pitkyaigaine pajattai da pajoloin sanoin kirjuttai da kiändäi, Ven'an žurnalistoin liittoh kuului (vuvves 2002 algajen)[1].
Eloskerdu
Galina Jegorovna Lettijeva on roinnuhes Kemin linnas Suuren Ižänmuallizen voinan aigah vuvvennu 1944 karjalazeh pereheh. Ga hänen lapsusaigu meni Kalevalan piiris[1]. Galina Jegorvnan tuattah oli hevosmiehenny da parzien vedäjänny meččyruadolois[2].
Galina Lettijeva opastui seiččemenkluasan školas Jyškyjärvel da sit jatkoi opastundan Kalevalan školas. Kalevalan školan loppiettuu häi läs kahtu vuottu ruadoi Kondupohjan rakendusmuan kivirakendajien joukos[2].
Sit piäzi opastumah Petroskoin valdivonyliopistoh histourii-filolougizele tiedokunnale suomi-ugrilazele ozastole, kudaman loppiettuu kolme vuottu ruadoi ven'an kielen opastajannu Muotkon kylän školas.
Jälles nelli vuottu ruadoi Inturist-laitoksen Leningruadan ozastos Viipuris[2]. Ga vierahal mual igävöičči Karjalua.
Vuvves 1972 Galina Lettijeva eläy Petroskois[1]. Ruadoi kuuzi vuottu Progress-julguamos kiändäjänny. Konzu se salvattih, rubei ruadamah Opastajien jatko-opastusinstituutas. Kuuzi vuottu oli lapsien Kipinä-žurnualan toimittajannu, piätoimittajannugi. Opasti suomen da karjalan kieldy Petroskoin valdivonyliopistos. Kymmene vuottu oli Karjalan ruadivon kanzalliskielizen toimituksen toimittajannu da varapiätoimittajannu[2]. Sen jälles kolme vuottu ruadoi karjalankielizen Vienan Karjala -lehten piätoimittajannu, kuspäi vuvvennu 2010 lähti eläkkehele.
Galina Jegorovna monien vuozien aigah pajatti karjalan rahvahan Oma Pajo -horas. Inehmine on horan pajoloin sanoin kirjuttajannu da kiändäjänny. Häi kiändäy karjalan kielen vienankarjalan murdehele kaunehkirjalližuon tekstoi da ozutelmii Karjalan Kanzallizeh teatrah nähte.
Galina Lettijeva on karjalan kielen vienankarjalan murdehen Tule pakinoilla -paginsanakniigan kirjuttajannu da erähänny Venäjä-viena šanakirjan luadijannu (ven. Русско-севернокарельский словарь)[3].
Julgavot
- Побеседуем = Tule pakinoilla : Tule pakinoilla : русско-карельский разговорник : (на собственно-карельском наречии карельского языка) / [сост. Галина Леттиева]. — Petroskoi (Петрозаводск) : Periodika, 2010. — 125, [1] с.; 17 см.; ISBN 978-5-88170-206-9 : 500
- Ностальгия / Perijuurilla. Kiändäjänny Galina Lettijeva
- Vienan tyynet ta tuulet / Ветры земли калевальcкой Kniigan toimittajinnu ollah Valentina Karakina da Galina Lettijeva.
- Русско-севернокарельский словарь (Venäjä-viena šanakirja) Сост. П.М.Зайков, И.П.Новак, Н.А.Пеллинен, Н.Н.Архипова, В.И.Каракина, Г.Е.Леттиева, Т.И.Медведева, М.А.Спицына.