Pakkasukon da Lumineičoin päivy
| Pakkasukon da Lumineičoin päivy | |
|---|---|
 Pakkasukko da Lumineičoi Voronež-linnas | |
| Tiippu | Ei-virralline |
| Toizin | Pakkazen da Lumineičukkazen päivy |
| Merkičys | Ehtolline proššaičendu talvenke |
| Pietäh | Ven'al |
| Päivymiäry | 30. pakkaskuudu |
| Perindöt | Suarnoin sanelemine, rahvahan pruazniekku, riel ajelutandu, lumiukkoloin lumes luajindu |
| Liittyy | Velesah, Pyhälaskuh |
Pakkasukon da Lumineičoin päivy (ven. День Деда Мороза и Снегурочки) on Ven'an ei-virralline pruazniekku, kudai on omistettu Uvven Vuvven piähengilöile. Se on jogavuodehine pakkaskuun 30. päivän pruazniekku. Päiväl ollah paganallizet juuret, se merkiččou proššaičendua talvenke da sidä, gu jo terväh tulou kevät.
Histourii
Pakkasukon da Luminečoin päivän alguperä on slavjuanoin valehjumalahuskondois. Ihan allus se oli omistettu Pakkazele — slavjuanoin panteonan yhten piäjumalan, Velesan, talviolemuksele, kudamua piettih rikkahuon, viizahuon da muanväin puolistajannu. Muinazet slavjuanat uskottih, gu niken muu, a vai häi tuou vilun da lumet muale. Tämä päivy oli talven lopun simvolannu, sen jälgeh tuli Pyhälasku, kudai merkičči keviän lähästy tulendua.
Nygözen Pakkasukon prototiipannu oli talven paganalline Morok-hengi, libo Račkai. Enzimäi häi ozuttihes kovasydämellizenny da hirvienny starikannu, kudai voibi kylmätä kaiken elävän. Hänen mielen pehmendettäväkse rahvas jäteltih koin kynnyksele limo meččäh gostinčua: kyrziä, iduu da maiduo. Aijan mugah sen kuva pehmeni, da Morok muutui Pakkazekse (ven. Мороз) — talviviluloin vägeväkse halliččijakse, kudamua jo ei muga äijäl varattu, enämbäl kunnivoitettih[1].
Luminečoin kuvagi tuli slavjuanoin mifolougiespäi. Kerdomuksien mugah Pakkazel da hänen mučoil, Lumikuningattarel, oli tytär Sneževinočka-nimel, libo Lumineičoi. XIX vuozisual tämä hengi rodih aiga kuulužakse folkloristan Aleksandr Afanasjevan tutkimusruadoloin hyvyös, vuvvennu 1867 Afanasjev julgai hänes rahvahan suarnoi.
Vuvvennu 1873 dramaturgu Aleksandr Ostrovskii, Afanasjevan ruadolois innostuttuu, kirjutti Lumineičoi-ozutelman, kudamas häi ezittyy Pakkasukon da Kaunehen Keviän tyttärenny. Ozutelmu oli kirjutettu Ščelikovo-usad’bas, kudamua tänäpäi pietäh Lumineičoin roindupaikannu[2][3].
Tänäpäi hyvin tuttavan Pakkasukon vunukan stuatusan Luminečoi sai vaste nevvostovallan aigua. Enzimästy kerdua hyö yhtes ezityttih vuvvennu 1937 Moskovan Ammattiliittoloin talois Uvven Vuvven vastuandupruazniekas, se oli kerras sen jälgeh, konzu oli otettu iäre uvvenvuvven kuuzen kiedo. Silloigi rodih kaikkien tiettävy talven piätiedoiniekkoin liitto[1][4].
Pruazniekan piendytavat
Muinažuos sinäpiän oli tavannu Pakkazen hyväilendy, gu talvi olis lauhkiembi, gu siät ei oldas muga kovat da vaigiet. Slavjuanat jätettih gostinčulahjoitustu kyrzinny da vil’l’annu suurien puuloin, puaksumbah tammiloin libo kuuzien uale, kudamii piettih pyhinny. Perehet kerävyttih omih kodiloih, saneltih suarnoi da kerdomuksii Pakkazes da Lumineičois, heijäh hyvis da hirvielöis, toiči varavuttajis tegolois. Mugaže oli olemas kodiloin vardoičuspiduo talven pahois hengis: kodiloi sydämes brizgutettih "tiedovoičusviel", ikkunoile riputeltih vil’l’uhuavozii-amuliettoi, kuduat oldih kaikenkyllyön merkinny.
Päivän vältämättömii piendytaboi oli rahvahan pruazniekku da kižat. Järjestettih ajelutandoi riel, kudamil, rahvahan uskomuksien mugah, pidi "nostattua muadu" da lähendiä keviän tulendua. Mugaže luajittih lumiukkoloi, kudamii piettih Pakkazen "abuniekoinnu", čomendeltih niilöi lentoil lykyn muanitettavakse. Uskottih, gu sinäpiän sai kiändyö Pakkazen puoleh da pakita hyvineländiä da huavehien täyttämisty.
Nygözel aijal Pakkasukon da Lumineičoin päiväl ei ole virrallistu stuatussua, eigo sih liity suurdu kogo kanzan pruazniekkua. Pruazniekan piendän luaduu myö se on enimiten paikalline, sidä kannatetah Ven’an alovehien kul’tuuru- da opastuslaitokset. Daigi niilös paikois, kuduat ollah kiingieh kiini päivän piähengilöih, 30. pakkaskuudu ei ole suurien tapahtumien päivymiäry. Muga, Pakkasukon taloi Velikii Ust'ugas -projektan virrallizel verkosivustol tädä päiviä muanitah "suarnallizennu pruazniekannu" starinoin musteltavakse, a päiväle omistettulois eritapahtumis ei sanota. Kostroma-linnas, kudamua pietäh Lumineičoin roindupaikannu, tärgevimät da suurimat pruazniekat järjestetäh mugaže talviloman aigua, ei pakkaskuun lopus. Muga pruazniekkupäivy säilyttäy omua merkičysty enimyölleh folklouruperindölöin da pienien paikallizien aloittehien hantuzis.
Sinäpiän lapsile järjestetäh mostu temuattistu toimenpiduo, kui tiijustusčuassuu, tiedokilbua, tehtäviä da kižaohjelmua, mugaže on tavannu sanella suarnoi da starinoi talven tiedoiniekkolois. Školis da lapsien päivykodilois pietäh päiväle omistettuu piduo, ezitysty da kilbua. Pruazniekku on lougielline uvvenvuvven pidoloin sarjan loppu, se merkiččou gostienke, Pakkasukon da Lumineičoinke, proššaiččemistu da heijän suattamistu Muanpohjazeh n’abah tulieh uudeh vuodessah.
Pakkasukon juna
"Pakkasukon juna" on Ven'an raududorogoin kogo Ven’an pruazniekkuprojektu, kudai on Pakkasukon liikkui rezidencii[5]. Pruazniekallizesti čomendettuh junah kuulutah Pakkasukon vastahottoperi, Suarnalline hieru -vagonu kižoih niškoi, lavavagonu, tyttiteatruvagonu, mustolahjoin laukkuvagonu da restoruanuvagonat[6]. Linnois, kudamis on pitkyaigaine seizonduaigu, järjestetäh maksollistu junakierdomatkua, junan lyhyzil seizondukodvil perronoil pietäh ilmastu vesseldysohjelmua[7].
Pakkasukkoh da lumineiččoih liittyjät pruazniekat
- 18. kylmykuudu — Pakkasukon roindupäivy, on virralline pruazniekku, kudamua pietäh vuvves 2005 lähtijen Velikii Us’tugas (Vologdan aloveh);
- 31. talvikuudu — 1. pakkaskuudu — Uuzi Vuozi. Pruazniekku, kudamal Pakkasukko da Lumineičoi ollah piäpersonuažat. Hyö tuvvah lapsile lahjua, yhtytäh uvvennvuvven pruazniekkuezityksih;
- 4. sulakuudu — Lumineičoin roindupäivy. Virrallizesti sidä enzimästy kerdua piettih Kostromas vuvvennu 2009. Kostroma-linnua pietäh Lumineičoin roindupaikannu, sendäh gu juuri sie, Ščelikovo-muzei-zapovedniekas Aleksandr Ostrovskii kirjutti Lumineičoi -ozutelman.
Huomavukset
- ↑ 1 2 Новый год: история, традиции, как празднуют в России. РИА Новости (24. kylmykuudu 2024). Kačondan päivymiäry: 15. talvikuudu 2025.
- ↑ Идеологически верная Снегурочка: откуда взялась внучка Деда Мороза. РИА Новости (2. pakkaskuudu 2019). Kačondan päivymiäry: 15. talvikuudu 2025.
- ↑ Кострома — родина Снегурочки. Терем Снегурочки. Kačondan päivymiäry: 15. talvikuudu 2025.
- ↑ День рождения Деда Мороза в 2025: как празднуют, история, традиции. Российская газета (18. kylmykuudu 2023). Kačondan päivymiäry: 15. talvikuudu 2025.
- ↑ Поезд Деда Мороза. ОАО «РЖД». Kačondan päivymiäry: 15. talvikuudu 2025.
- ↑ РЖД опубликовали расписание «Поезда Деда Мороза» 2024/2025. Яндекс Путешествия. Kačondan päivymiäry: 15. talvikuudu 2025.
- ↑ Поезд Деда Мороза в 2024-2025 году: расписание и маршрут. gogov.ru. Kačondan päivymiäry: 15. talvikuudu 2025.
Kirjalližus
- Душенко К. В. Мифы ХХ века: дед Мороз и Снегурочка // Вестник культурологии. — 2004. — № 4.
- Медведева М. А. Герменевтический анализ символов праздника Нового года // Аналитика культурологии. — 2008. — № 11.
- Шаваринский Д. С. Трансформация образа Снегурочки в отечественной художественной культуре // Верхневолжский филологический вестник. — 2018. — № 2.