Aleksandra Punžina
| Aleksandra Vasiljevna Punžina | |
|---|---|
 | |
| Roindupäivy | 20. oraskuudu 1934 |
| Roindupaikku | Tveri, Ven'an federatiivine socialistine nevvostotazavaldu, Nevvostoliitto |
| Kuolendupäivy | 30. talvikuudu 2020 (86 vuottu) |
| Kuolendupaikku | Petroskoi, Karjalan tazavaldu |
| Tiedoala | kielitiedo, karjalan kielen murrehoppi da sanakirjuruado |
| Ruadokohtu | Ven'an tiedoakadiemien Karjalan tiedokeskuksen Kielen, literatuuran da histourien instituuttu |
| Opastus | Petroskoin valdivonyliopisto |
| Oppiarvo | filolougientiedoloin kandiduattu |
Aleksandra Vasiljevna Punžina (ven. Александра Васильевна Пунжина, 20. oraskuudu vuvvennu 1934 — 30. talvikuudu vuvvennu 2020) on karjalaine filoulogu, dialektoulogu, sanakniiganluadii, karjal-ven'alazen sanakniigan luadii.
Eloskerdu
Oli roinnuhes Kalinin-linnas karjalazes perehes. Hänen vahnembat oldih rodužin Lihoslavl'an piirin Tolmačun kylän čupulpäi: Vasilii Ivanovič Kurgani-kyläspäi, Jevdokija Feoktistovna Spornoje-kyläspäi. Perehes paistih vaiku karjalakse, sendäh Aleksandra Vasiljevna ylen hyvin maltoi tolmačun murrehtu. Vuvvennu 1937 "karjalazen dielon" mugah otettih kiini kymmenii tverinkarjalazii. Heijän joukos oli Vasilii Ivanovič Punžingi. Händy piästettih välläle vuvvennu 1938, ga jälles otettih Suurele Ižänmuallizele voinale. Perehel pidi järilleh muuttua Tolmaččuh, kus Aleksandra Vasiljevna da hänen vahnembi velli Veniamin loppiettih školan.
Vuvvennu 1953 piäzi opastumah Karjal-suomelazeh valdivonyliopistoh histourii-filolougizen tiedokunnan ven’an kielen da kirjalližuon ozastole. Opastusvuozinnu ruadoi Grigorii Makarovan johtol tutkimusmatkan aigua tverinkarjalazilluo "Karjalan kielen murrehkartastoh niškoi ainehiston keriändän programman" hantuzis (toimittajannu oli Dmitrii Bubrih). Yliopiston loppiettuu nuordu specialistua työttih ruadoh Valamoi-suarele ven'an kielen da kirjalližuon opastajakse, jälles häi mondu vuottu ruadoi Petroskoin školas.
Vuvven 1965 lopus Aleksandra Punžinua kučuttih ruadoh Ven'an tiedoakadiemien Karjalan tiedokeskuksen Kielen, literatuuran da histourien instituuttah kielitiijon ozastole tiedoruadajakse. Vuvvennu 1977 häi puolisti väitösruavon Tarton yliopistos aihies "Nominukategouriet karjalan kielen tverinkarjalazis murdehis" (ven. «Именные категории в тверских говорах карельского языка»), ainehistuo sih niškoi häi keräi karjalazien kolmes murrehjoukos — vesjegonskan, tolmačun da djoržan murdehis.
Tutkimusruavon ližäkse Aleksandra Vasiljevna keräi sanastuo Karjalan kielen sanakniigah nähte (tverinkarjalazet murdehet). Sih ruadoh häi ottavui vie vuvvennu 1966. Sikse aigua Aleksandr Bel'akov luadi tulien sanakniigan sanaluvettelun, V. J. Zlobina pani tallele enzimäzii tutkimusmatkumaterjualoi. Enziallus sanakniigan luajindah otti ozua Vieno Fedotova. Kezäl vuvvennu 1966 oli heijän enzimäine tutkimusmatku Aleksandra Vasiljevnan omah Kalininan alovehen Lihoslavl'an piirih. Oli tutkittu enimyölleh kai piirin karjalazet kylät. Aleksandra Vasiljevna musteli:
Kerras tundui rahvahien kieleh siirryndy. Puutui panna tallele kaunehen karjalazen paginan.
Tutkimusmatku innostutti tutkijua, sinävuon häi uvvessah lähti Ylä-Volgan alovehele, nygöi jo Spirovan piirin karjalazilluo. Aleksandra Vasiljevna mielihyväl musteli paginoi rahvahanke:
Minä ovvostin rahvahan suuren arvon kielen opastundas. Oli tarkoitus: ajua ielleh da hätkekse.
Tulieloinnu vuozinnu oli tutkittu Lihoslavl'an, Spirovan, Ruameškan, Maksatihan, Mečän da Vesjegonskan piirit. Ainehistuo kirjutettih magnitofonale da kartočkoih. Materjualan sanaluvetteluloin mugah pietyn keriändän ližäkse käytettih kyzelyy temuattizien kogomuksien mugah. Loman aigua Aleksandra Vasiljevna sežo keräi kieliainehistuo tveriläzis kylis.
Sanakniiguruado keskustui, konzu vuvvennu 1979 Aleksandra Punžinua pandih Kielen, literatuuran da histourien instituutan tiedosekretarikse, a vuvven 1983 tuhukuus vuodessah 1986 häi ruadoi Nevvostoliiton tiedoakadiemien Karjalan ozaston Prezidiuman tiedosekretarinnu.
Aleksandra Punžinan "Karjalan kielen sanakniigu: tveriläzet murdehet" (ven. Словарь карельского языка: тверские говоры, (1994)) on tärgielöi ruadoloi karjalan kielen murrehsanakniigoin joukos. Tutkii maltoi tävvelleh da tarkah panne tallele tverin karjalazien tolmačun da vesjegonskan murdehen sanaston. Sanakniigas on läs 17 tuhattu sanua, kudamien merkičys nägyy ezimerkilöis. Se oli pohjannu karjalan kirjukielen luadijes, kudai nojavuu karjalan kielen tolmačun murdeheh da tässäh on perustannu sen kehittämizes. Sanakniigah kuului tarku registru auttau, konzu ei ole tverinkarjalazien murdehien ven’a-karjalastu sanakniigua.
Aleksandra Punžinan tärgielöi arvoruadoloi on "Karjalan kielen murrehkartaston" luadimine (ven. «Диалектологический атлас карельского языка. Тверские говоры», (1997)). Dmitrii Bubrih piätti luadie sidä vuvvennu 1930, terväh algavui ruado materjualoin keriämizes Karjalan tazavallas. Kartasto oli valmis painettavakse vuvvennu 1956, ga eri syylöin periä sidä ei painettu. Sih ruadoh uvvessah ottavuttih 1990-luvul Suomen tiedo-tutkimuksellizen kielikeskuksenke yhtehizen projektan hantuzis. Pidi täyttiä atlassu tverinkarjalazil murdehil. Olemas olijoin tutkimusmaterjualoin kundoh panemizeh da tarkendamizeh ottavui murdehien paras tiedäi Aleksandra Punžina. Vuozien 1990 allus häi miäräi kartogruafien kohtat da valmisti kartastoh niškoi 209 kartua tverinkarjalazien murdehien mugah. Samal aigua Aleksandra Punžina keräi materjualua "Baltiekkumerensuomelazien kielien kielikartastoh" niškoi (ven. «Лингвистический атлас прибалтийско-финских языков»).
Aleksandra Punžinan tutkimusmatkoin aigua kerätty tverinkarjalazien materjualoin suurin vuitti (läs sadua ruokosolendukappalehtu) on Ven’an tiedoakadiemien Karjalan tiedokeskuksen Kielen, literatuuran da histourien instituutan iäniteharhiivas, sidä materjualua häi keräi yksinäh da yhtehizien tutkimusmatkoin aigua, suomelazien tutkijoinkegi Pertti Virtarannanke da Lauri Honkonke. Vaiku oza nämmis materjualois on rasšifruittu da piästetty ilmah julgavolois "Baltiekkumerensuomelaine kielitiedo" (1971), "Näytteitä karjalan kielestä" (1994). Matku Tverin alovehen Zubcovan piirin karjalazilluo ylen äijäl vaikutti tutkijah, kudai sanoi, ku kiinnostutettih paginluavun ominažuot. Vuvvennu 2001 piäzi ilmah tekstoin kogomus "Kuundelen karjalastu paginluaduu" (ven. «Слушаю карельский говор»), kudamas oli djoržan da valdain karjalazien paginluavun rasšifrovkat. Omua aigua vuotetah Aleksandra Punžinan etnogruafien da kielen puoles arvokkahat käzikirjutuksien rasšifrovkat.
Eläkkehele lähtiettyy tutkii rubei ruadamah rasšifrovkonke da tävvendämäh sanakniigua. Häi andoi nevvuo algajile karjalan kielen tutkijoile, saneli omas ruavos tutkimusmatkoin aigua.
Aleksandra Punžina kuoli 30. talvikuudu vuvvennu 2020. On pandu muah Petroskois Suolusmäin kalmužiman kunnivokalmukohtale.
Bibliogruafii
Aleksandra Punžina on monien tiedokirjutuksien kirjuttajannu baltiekkumerensuomelazen kielitiijon kyzymyksis, tverinkarjalazien kirjukieles, karjalan kielen termistös.
- Словарь карельского языка: тверские говоры. — Петрозаводск: Карелия, 1994. — 396 с.
- Диалектологический атлас карельского языка / Д. В. Бубрих, А. А. Беляков, А. В. Пунжина ; Ин-т языка, лит. и истории Карел. науч. центра РАН, Научно-исслед. центр языков Финляндии; ред. Л. Сарвас. — Хельсинки : Финно-угорское общество, 1997
- Слушаю карельский говор: образцы речи дёржанских и валдайских карел / сост. А. В. Пунжина. — Петрозаводск: Периодика, 2001
Kirjalližus
- Новак И. П. Александра Васильевна Пунжина: (к 80-летию со дня рождения) // Труды Карельского научного центра РАН — No 3. — 2014. — С. 169—170
- Исследователи и учителя из тверских карел (Александра Васильевна Пунжина) // Пертти Виртаранта. Этюды о карельской культуре: люди и судьбы / пер. с фин. Ю. Ю. Сурхаско. — Петрозаводск: Карелия, 1992. — С.76-79
- Aleksandra Vasiljevna Punzina // Gromova L. Aiga lugie i paissa karielaksi. — Tveri, 2002. — C.135