Tuari
| Tuari | |
|---|---|
 | |
| Perustiijot | |
| Žanru | folkjoukko |
| Vuvvet | perustettu vuvvennu 2023 |
| Mua | |
| Kieli | karjalan kieli |
| Ohjuaju | Darja Toivonen |
| Kuulutah | Darja Toivonen, Vsevolod Šajin, Ksenija Prikman, Anna T'utr'umova, Anastasija Sošnevskaja |
"Tuari" on Karjalan tazavallas vuvvennu 2023 perustettu folkjoukko, kudai kanzallizil soittimil soittajes pajattau perindöllizii pajoloi karjalan kielel. Joukon perustajannu on petroskoilaine Darja Toivonen.
Histourii da yleistiijot
"Tuarin" histourii algavui kezäl vuvvennu 2023, konzu petroskoilaine Darja Toivonen piäzi Jevruazien iäni -muuzikkuprojektan (ven. «Звук Евразии») loppuozah etnizenny pajattajannu Tuari-nimel[1]. Silloi tuligi mieleh kerätä pieni joukko samal nimel.
Puaksuh tutkin eri Karjalua koskijoi materjualoi, muuzikas da muuloi mieldykiinittäjii. Läs kahtu vuottu tagaperin kädeh puutui kirjutus Karjalan nimilöis, minä opiingi kaččuo, kui minun nimi rodieu karjalan kielel. Sie oli äijy variantua, ga miellyin Tuarih. Vuvven peräs, konzu työnnin pakičuksen "Jevruazien iäneh", piätin ilmoittuakseh Tuari-pajattajannu, tämän nimen myö otimmogi joukkoh niškoi.Darja Toivonen, Tiijoitusagenstu "Respublika"[1]
Täl aigua joukos pajattau da soittau viizi hengie: Darja Toivonen, Vsevolod Šajin, Ksenija Prikman, Anna T'utr'umova, Anastasija Sošnevskaja (liityi myöhembä). Kai ollah ammatillizet muuzikkumiehet[1].
Joukol ollah kaunehet sovat da čomendukset, kudamis nägyy karjalazien da skandinuavien rahvahien perindöllisty elementua, da omaluaduine makijuažu[1].
"Tuari" ezittyy Karjalas da jo on käynnyh pajattamah Ven'an monih linnoih — ozutti omua neruo Moskovas Rahvahan talohuon suavutuksien ozuttelus, Sočis muailman nuorižofourumas, Joškar-Olas, Ruskeala Symphony -festivualis Ruskealas da toizis kohtis[1][2][3].
Vuvvennu 2025 joukko otti ozua kanzoinvälizeh Tiähti-muuzikkukilbah, "Tuarii" ozutettih Ven'an federuallizes Tiähti-kanualal 10. oraskuudu, joukko pajatti Musta mado-pajuo. Pajattajien sanoin mugah mieleh painui tuttavus arvostelukunnan piälikön Viktor Drobišanke:
Ihan hämmästyimmö, konzu Viktor Drobiš tervehti meidy suomekse. Jällespäi tiijustimmo, ku häi kodvan aigua eli Suomes, kus opastui suomen kieleh, häi hyvin tundou sigälästy kul’tuurua, kudai on lähäl karjalazien kul’tuurua.Darja Toivonen, Oma Media[1]
Syvyskuun 5. päivänny vuvvennu 2025 Moskovas kanzoinvälizes dokumentufil'moin Doker-festivualis piettih Kuundele!-dokumentufilm'an (ven. «Послушай!») enzi-ildu. Fil'mas sanellah nelläs etnomuuzikan ezittäjäs, heijän joukos on "Tuarigi"[4].
Ligakuul vuvvennu 2025 joukko piästi ilmah uvven videon karjalazes pajos "Ruskei neičyt, valgei neičyt"[5].
 "Tuari" Ruskeala Symphony -festivualis, vuozi 2025 |
Ohjelmisto
Tuarin ohjelmistoh kuulutah karjalazen rahvahan pajoloin da runoloin sovitukset. Muuzikkumiehet sanotah, ku tuliel aigua reknaillah pajattua omiigi kirjutettuloi pajoloi da Karjalan, Ven'angi toizien kanzoin pajoloi[1].
"Tuarin" erähii pajoloi:
Joukon ozanottajat
Tuari on viijen hengen pajojoukko. Sih kuulutah[1][3]:
- Darja Toivonen — pajattai, Petroskoin K. E. Raution nimizen muuzikkukolledžan loppenuh, Ven'an Gnesinoin nimizen muuzikkuakadiemien opastui;
- Vsevolod Šajin — pajattai, muuzikan sovittai, Petroskoin muuzikkukolledžan loppenuh;
- Ksenija Prikman — pajattai, mul'ti-instrumentalistu, Petroskoin muuzikkukolledžan loppenuh, Petroskoin valdivollizen konservatourien opastui, soittau monil soittimil: diatounizel kandelehel, jouhikol, varganal, skripkal, fleital;
- Anna T'utr'umova — kandelehelsoittai, Petroskoin valdivollizen konservatourien opastui;
- Anastasija Sošnevskaja — skripkal soittai (liityi myöhembä).
Kilboih ozanotandu
- Jevruazien iäni -muuzikkuprojektan loppuoza (ven. Музыкальный проект «Звук Евразии») (vuozi 2023);
- kanzoinväline Tiähti-muuzikkukilbu (ven. Звезда-2025) Moskovas (vuozi 2025)[6][7][8].
Huomavukset
- ↑ 1 2 3 4 5 6 7 8 Анастасия Михайлова. TUARI: как карельская фолк-группа покоряет сцены России (рус.). rk.karelia.ru (21. kevätkuudu 2024). Kačondan päivymiäry: 16. syvyskuudu 2025.
- ↑ Карельская фолк-группа «TUARI» покоряет крупные музыкальные площадки страны (рус.). СампоТВ 360° (15. oraskuudu 2024). Kačondan päivymiäry: 16. syvyskuudu 2025.
- ↑ 1 2 Anna Umberg. ”Mieleni minun tekevi, aivoni ajattelevi…” (рус.). Oma Media (15. elokuudu 2025). Kačondan päivymiäry: 16. syvyskuudu 2025.
- ↑ Tuarista dokumentin sankari – Elokuva sai ensi-iltansa Moskovassa (suo.). Oma Media (9. syvyskuudu 2025). Kačondan päivymiäry: 16. syvyskuudu 2025.
- ↑ Karjalan Tuari-etnojoukko valmisti uvven muuzikkuvideon. Oma Media (21. ligakuudu 2025). Kačondan päivymiäry: 22. ligakuudu 2025.
- ↑ Этно-группа Tuari выступит на федеральном канале (рус.). Oma Media (26. kevätkuudu 2025). Kačondan päivymiäry: 16. syvyskuudu 2025.
- ↑ Tuari-joukkuo kuunelkua ”Tiähtel”. Oma Media (7. oraskuudu 2025). Kačondan päivymiäry: 16. syvyskuudu 2025.
- ↑ Смотрите выступление Tuari на "Звезде" (рус.). Oma Media (7. oraskuudu 2025). Kačondan päivymiäry: 16. syvyskuudu 2025.