Zoja Saveljeva
| Zoja Lukinična Saveljeva | |
|---|---|
 | |
| Roindupäivy | 13. tuhukuudu 1936 |
| Roindukohtu | Jessoilu, Priäžän piiri, Avtonoumine Karjalan socialistine nevvostotazavaldu, Nevvostoliitto |
| Kuolendupäivy | 20. talvikuudu 2016 (80 vuottu) |
| Kuolendukohtu | Jessoilu, Priäžän piiri, Karjalan tazavaldu, Ven'a |
| Kanzalližus |
 Nevvostoliitto,  Ven'anmua |
| Toimindu | opastai, kirjuttai, yhteiskunnalline ruadai |
Zoja Lukinična Saveljeva (ven. Зоя Лукинична Савельева, 13. tuhukuudu vuvvennu 1936 — 20. talvikuudu vuvvennu 2016) on karjalaine opastai, kirjuttai, yhteiskunnalline ruadai.
Eloskerdu
Zoja Saveljeva oli roinnuhes 13. tuhukuudu vuvvennu 1936 Jessoilan kyläh lapsekkahah karjalazeh pereheh[1]. Tuattah — Luka Vasiljevič, muamah — Matr’ona Mihailovna[2].
Loppi Petroskoin pedagouguopiston №7. Ruadoi pionieruvožuatoinnu Kemin lapsienkois, opastajannu Kukoinvuaran školas. Konzu loppi Karjalan pedagouguinstituutan, ruadoi Jessoilan keskiškolas ven'an kielen opastajannu da opastuspuolenjohtajannu. Hänen alguhpanos Jessoilan školas da päivykois ruvettih opastamah karjalan kieldy.
Zoja Saveljevua tundietah karjalan kielen akkiloiččijannu da puolistajannu, häi monien vuozien aigah oli Karjalan Rahvahan Liiton Jessoilan ozaston piälikönny. Kuului Jessoilan karjalazet -yhtistykseh. Oli karjalazien kerähmölöin deleguatannu, monien karjalan kieldy da karjalastu kul'tuurua koskijoin konferensieloin, seminuaroin ozanottajannu.
Kuului Karjalan tazavallan sanastokomissieh[1].
Kirjutti runoloi da kerdomuksii karjalan kielel. Niilöi suau lugie karjalankielizes Oma Mua -lehtes da Kipinä-žurnualas, monis kogomuksis da Karjalan pagin -antolougies.
Vuvvennu 2009 piäzi ilmah Zoja Saveljevan kniigu "Buaban luvut livvin kielel"[3]. Tämän kniigan mugah Jessoilan Valgien kodine -stuudii luadi karjalankielizen piirdofil’man "Buaballuo gostis" (ven. «В гостях у бабушки»), kudai voitti Kanzoinvälizes suomi-ugrilazien rahvahien taidofestivualis «Туйвеж» nominacies "Lyhyt piirdofil'mu"[4].
Zoja Saveljeva äijän kerdua otti ozua Vladimir Brendojevan nimizeh literatuurufestivualih Anukses. Jessoilas oli omassah vellen, rahvahan kirjuttajan Volkovan lugemizien, Anne lennetäh runot-linduizet Siämärven piäl -runohusfestivualin alguhpanijannu da luadijannu.
Pajatti Jessoilan Aldoine-ansambl'as. Oli ansambl’an ruavon erähii alguhpanijoi. Kirjutti pajoloin sanoi "Aldozeh" nähte.
Kuoli 20. talvikuudu vuvvennu 2016[5][6].
Pereh
Ukko — Nikolai Petrovič Saveljev. Velli — Aleksandr Volkov, rahvahan kirjuttai.
Palkindot da arvonimet
- Ilmari Virtazen literatuurupalkindon laureattu.
- Ven'an piämiehen kunnivokirjaine[2].
Huomavukset
- ↑ 1 2 75-летие З.Л. Савельевой
- ↑ 1 2 Карельская общественница Зоя Савельева отметила 80-летний юбилей
- ↑ Таланты из Сямозерья
- ↑ Мультипликаторы из Эссойлы
- ↑ Karjalan TV. Zoja Saveljevan mustoksi
- ↑ Viestit-Karjala. Karjalaista rahvasta yhä vähenöy. Eklein 20.12 tuonilmoihi siirtyi Zoja Lukinična Saveljeva.