Ven'an Federacien syväinazieloin elimien ruadajan päivy
Материалы библиотеки имени Б.Н. Ельцина
Материалы библиотеки имени Б.Н. Ельцина
| Ven'an Federacien syväinazieloin elimien ruadajan päivy | |
|---|---|
 | |
| Sežo | Policien päivy |
| Merkičys | Syväinpuolizien azieloin ruadajien toimen merkičykselližyön da vaigevuksen tunnustamine kanzalazien da rahvaskunnan suojelemizekse |
| Pandih alguh | Ven'an Federacien Piämiehen käskys 13. ligakuudu vuvvennu 2011. Vuodessah 2011 — Policien päivy |
| Pietäh |
 Ven'anmua |
| Päivymiäry | 10. kylmykuudu |
| Piendy | pruazniekkutapahtumat, pruazniekkukonsertat |
| Perindöt | urhakkahuttu ozutannuzien ruadajien palkičendu, veteruanoin kunnivoiččemine, kukkien panendu mustomerkilöile — sluužbal kuadunuzien ruadajien piäle |
Ven'an Federacien syväinazieloin elimien ruadajan päivy (ven. День сотру́дника о́рганов вну́тренних дел Росси́йской Федера́ции, ei-virralline nimi — Policien päivy[1]) on Ven'an ammatilline pruazniekkupäivy, kudamua joga vuottu pietäh kylmykuun 10. päivänny[2]. Päivy on perustettu Ven’an Federacien Piämiehen käskys vuvvennu 2011, sissäh sil oli Milicien päivy -nimi[2]. Se ei ole lebopäivy[2].
Histourii
Pruazniekan histourii ottau oman allun Ven’an valdukunnaspäi. Vuvvennu 1715 imperuattoru Pedri I perusti suojelusluužban Ven’al yhteiskunnallizen olemizen kunnos olendakse, kudamale pani Policii-nimen.
Vuvvennu 1718 Pedri I:n käskyn mugah Piiteris rodih uuzi valdivolline virgu — generualu-policiimies libo policiipiälikkö. Häi johti suojelupalveluu, kudaman ruavonnu oli kaččuo da vardoija kanzalazien turvalližuttu, ottua kiini rozvoloi.
Vuvvennu 1778 varustettih Kogo Ven’an policiedu koskii ustuavu, а vuvvennu 1802 imperuattoru Aleksandr I perusti Ven'an Federacien syväinpuolizien azieloin ministerstvan, kudamale rubei kuulumah kaikkien oigevuksienvalvojien laitoksien toimindan tarkastus[3].
Tuhukuun vallankumovuksen jälgen vuvvennu 1917 väliaigaine halličus salbai Policien departuamentan da hajotti erillizen žandarmujoukon, vaihtoi net "rahvahan miliciel".
Pruazniekan nygöine päivymiäry, 10. kylmykuudu, liittyy Ligakuun vallankumovuksen jälgehizih tapahtumih. Sinäpiän (28. ligakuudu julianskoin kalenduaran mugah) vuvvennu 1917 Ven'an federatiivizen socialistizen nevvostotazavallan Syväinpuolizien azieloin rahvahan komissariatan (NKVD:n) piätökses perustettih "ruadajien milicii" yhteiskunnallizen olemizen suojeltavakse[4]. Dokumentu, kudaman allekirjutti Rahvahan komissariatan piälikkö Aleksei Rikov, miäräi milicien Ruadajien da saldattudeputuattoin nevvoston alazekse[5].
Vuvvekse 1918 milicies rodih alalleh toimii elin, vuvvennu 1919 se alistettih vojennoih kurih, tavoittehih da zakonoih — milicien ruadajii rinnastettih Ruadajien da muanruadajien Ruskien armien saldatoinke.
Vuvvennu 1921 milicii siirrettih Ven'an federatiivizen socialistizen nevvostotazavallan Syväinpuolizien azieloin rahvahan komissariatan (NKVD:n) johtoh, mi avvutti sistiemas tapahtujien processoin uvvellehjärjeständiä korgiembale tazole nostamizekse. Myöhembi luajittih uuttu palveluu: pahantegotutkimusozasto, socialistizen omažuon varrastuksien vastuandualaozastot (BHHS), patruli- da vardoičuspalvelu da toizet[3].
Pruazniekal kodvan ei olluh virrallistu stuatussua. Ammattipruazniekan stuatussu — Nevvostolazen milicien päivy — perustettih Nevvostoliiton Korgeviman Nevvoston Prezidiuman käskys 26. syvyskuudu vuvvennu 1962[6][7].
Nevvostovallan aigah pruazniekkupäiviä piettih pruazniekallizeh tabah. Konsertoi ruvettih järjestämäh vuvves 1966, vuvves 1972 lähtijen niidy ozutetah TV:s.
Myöhembi, vuozinnu 1990—2010, pruazniekan virralline nimi muutettih Ven'an milicien päiväkse. Valdivollizes Kremlin dvorčas rodih päivän piäpruazniekkutapahtumien piendypaikku.
Ven’an Syväinpuolizien azieloin ministerstvas piettylöin uvvistuksien da milicien nimen policii-nimekse muutandan jälles pruazniekku sai oman nygyaigazen nimen. Ven’an Federacien piämiehen käskys 13. ligakuudu vuvvennu 2011 pruazniekku nimitettih Ven'an Federacien syväinazieloin elimien ruadajan päiväkse[8]. Sen ei-viralline nimi on Policien päivy.
Pruazniekan piendytavat
Ven'an Federacien syväinazieloin elimien ruadajan päivänny tavan mugah järjestetäh pruazniekkutapahtumua, kudamis palkitah urhakkahuttu ozutannuzii ruadajii da juatah arvonimilöi. Mugaže sinäpiän kiitetäh da ylistetäh veteruanoi sego mustellah sluužbal kuadunuzii ruadajii — vietäh kukkua mustomerkilöillyö. Nevvostoaijas jäi moudah perindö ozuttua keskustelekanualoi myö suurdu päiväle omistettuu pruazniekkukonsertua[9].
Ven'an syväinpuolizien azieloin ministerstvan alazis opastuslaitoksis pietäh muuzikkukonsertua da sportukilbua[10].
Erähis školis, koulledžois da huogavundulaitoksis avatah ozutteluloi, pietäh luvendoloi da avvonazii urokkoi, järjestetäh tiedokilboi, tiedočuassuloi, kižoi, vastavuksii syväinazieloin elimien ruadajien da veteruanoinke. Syväinazieloin elimien histouriele omistettulois muzeilois pietäh ekskursieloi.
10. kylmykuudu vuvvennu 2021 Piiteris Ven'an Federacien syväinazieloin elimien ruadajan päivänny avattih policiimiehen (ven. городовой) mustopaččahan. Pačas on azetettu Piiterin da Leningruadan alovehen Syväinpuolizien azieloin ministerstvan Piähallindon rakenduksen lähäle Suvorovan prospektan da Kavalergardskoin uuličan ristavukses[11].
10. kylmykuudu vuvvennu 2023 Piiteris piettih Leningruadan blokudan aigua kuadunuzien miliciimiehien mustopaččahan pruazniekkuavuajazet. Mustomerki on Stačkoin lagevol da sanelou alovehen täyzivaldazen Pavel Vinokurcevan urhotevos — 8. kylmykuudu vuvvennu 1941 heittelemättömän ambumizen aigua oman hengen hinnal häi piästi surmas tyttözen[12].
Toizis mualois
Syväinpuolizien azieloin elimien ruadajien ammattipäivii, Ven'anmuan pruazniekan jyttymii, pietäh toizis mualoisgi:
- Azerbaidžuanu — 2. heinykuudu (Azerbaidžuanan policien ruadajien päivy)[13];
- Armienii — 16. sulakuudu (Armienien policien ruadajien päivy)
- Valgo-Ven'an tazavaldu — 4. kevätkuudu (Valgo-Ven'an milicien päivy)[14];
- Kazahstuanu — 23. kezäkuudu (Kazahstuanan policien päivy)[15];
- Kirgizii — 1. kylmykuudu (Kirgizien tazavallan milicien ruadajan päivy)[16];
- Molduavien tazavaldu — 18. talvikuudu (Kanzallizen policien päivy)[17];
- Tadžikistuanu — 10. kylmykuudu (Tadžikistuanan milicien päivy)[18];
- Uzbekistuanu — 25. ligakuudu (Syväinpuolizien azieloin elimien ruadajien päivy)[19];
- Ukrainu — 4. heinykuudu (Ukrainan kanzallizen policien päivy).
Huomavukset
- ↑ 10 ноября — День сотрудника органов внутренних дел Российской Федерации. veterani37.ru. Kačondan päivymiäry: 7. kylmykuudu 2025.
- ↑ 1 2 3 День сотрудника органов внутренних дел Российской Федерации. sovetmo-spb.ru. Kačondan päivymiäry: 7. kylmykuudu 2025.
- ↑ 1 2 10 ноября — День сотрудника органов внутренних дел: история и традиции, Известия (10 kylmykuudu 2024). Kačondan päivymiäry: 7. kylmykuudu 2025.
- ↑ В этот день была создана советская милиция. Президентская библиотека имени Б. Н. Ельцина. Kačondan päivymiäry: 7. kylmykuudu 2025.
- ↑ День милиции: история и традиции. Новостной портал NEWSinfo (10. kylmykuudu 2008). Kačondan päivymiäry: 7. kylmykuudu 2025.
- ↑ День милиции. Томский государственный педагогический колледж. Kačondan päivymiäry: 7. kylmykuudu 2025.
- ↑ Знаменательный день не только для правоохранителей. Петровка, 38. Kačondan päivymiäry: 7. kylmykuudu 2025.
- ↑ Когда День полиции и какие традиции у этого праздника. tolknews.ru (28. ligakuudu 2024). Kačondan päivymiäry: 7. kylmykuudu 2025.
- ↑ Из истории празднования Дня сотрудника органов внутренних дел Российской Федерации. kcgumvdspb.ru. Kačondan päivymiäry: 7. kylmykuudu 2025.
- ↑ День полиции 2025 в России: какого числа праздник сотрудника органов внутренних дел (рус.). vesti.ru. Kačondan päivymiäry: 7. kylmykuudu 2025.
- ↑ Лялин Р.. Памятник Городовому торжественно открыли у полицейского главка в Петербурге, Комсомольская правда (10 kylmykuudu 2021). Kačondan päivymiäry: 7. kylmykuudu 2025.
- ↑ Памятник подвигу блокадных милиционеров открыли в Петербурге, AiF. Kačondan päivymiäry: 7. kylmykuudu 2025.
- ↑ Азербайджанская полиция отмечает 107-летие. baku.ws. Kačondan päivymiäry: 7. kylmykuudu 2025.
- ↑ 4 марта - День милиции. zav.minsk.gov.by (2. kevätkuudu 2020). Kačondan päivymiäry: 7. kylmykuudu 2025.
- ↑ 23 июня – День полиции Казахстана. 24.kz (2025). Kačondan päivymiäry: 7. kylmykuudu 2025.
- ↑ Ташиев поздравил сотрудников милиции с их профессиональным праздником, Report.kg – новости Кыргызстана и Бишкека. Kačondan päivymiäry: 7. kylmykuudu 2025.
- ↑ Сегодня в Молдове отмечают День Национальной полиции, TV-Nord (18 talvikuudu 2024). Kačondan päivymiäry: 7. kylmykuudu 2025.
- ↑ В Таджикистане 10 ноября вновь отметят День милиции. Вечёрка (4. kylmykuudu 2011). Kačondan päivymiäry: 7. kylmykuudu 2025.
- ↑ В Узбекистане 25 октября отмечается День работников органов внутренних дел. UzNews.uz (25. ligakuudu 2020). Kačondan päivymiäry: 7. kylmykuudu 2025.
Kirjalližus
- Дунаева А.. Реформа полиции в России: сегодня и сто лет назад // Родина. — 2012. — № 11. — С. 41—46.
- Зайцева, Е.. Сейчас бы супчику горяченького да с потрошками!: праздничный обед муровца по случаю дня полиции. Рецепты блюд // Родина. — 2023. — № 11. — С. 90—93.
- Калиниченко И. А. День сотрудника органов внутренних дел Российской Федерации // Государственная служба и кадры. — 2014. — № 3. — С. 15—16.
Linkat
- День сотрудника органов внутренних дел Российской Федерации
- Постановление НКВД РСФСР от 28.10.1917 "О рабочей милиции"
Дисциплинарный устав Рабоче-крестьянской красной милиции: утверждается Наркомвнудел А. Белобородов, зам. пред. Реввоенсовета Э. Склянский, Наркомюст Курский, Наркомтруд РСФСР Бахутов. 16/VIII-1923 г., г. Москва : приложение к приказу Начальника Центр. Администрат. Управления НКВД — Начальн. Милиции Республики, № 9, 1923 г. — Нижний Новгород: Нижполиграф, 1923.
| Ven'an ammatillizet pruazniekat | |
|---|---|
| |
