Karhumäin piirin muzei

On otettu Рувики-späi
Gerb-icon.png

Ven'an Federacien kul'tuuruministerstvu

Arrow-Right.png
Gerb-big.png
Ven'an Federacien kul'tuuruministerstvu
Karhumäin piirin muzei
Medvezhyegorsk museum 2021.jpg
Perustandan päivymiäry 1962
Olopaikku
Adressi Karjalan tazavaldu, Karhumägi, Dzeržinskoin uuličču, 22
Johtai Grišina Jelena Jurjevna
Verkosivusto Muzein verkosivusto
Логотип РУВИКИ.Медиа Медиафайлы на РУВИКИ.Медиа

Karhumäin piirin muzein alannu on histourii. Muzei ruadau Karjalan tazavallan Karhumäin linnas. Vuvvennu 1962 se algoi toimindan školamuzeinnu, nygözen nimen se sai vuvvennu 2006[1].

Muzein histourii

Muzein enzimäzenny johtajannu oli nelländen škola-internuatan (1960—1974) muantiijon opastai da kodialovehen histourien tutkii Jeršov Viktor Petrovič (oli rodivunnuh vuvvennu 1937). Yhtes omien opastujienke häi ajeli omua piirii myö ezinehien ečos tulieh muzeih niškoi[2][3]. Terväh Jeršov laudi škola-internuatas nuorien kodialovehtutkijoin kluuban — ven. КЮКР, kudai jällel sai ven. «Восьмерик» -nimen. Vuvvennu 1960 allettih ruadoloi školamuzein avuamizekse. Tilat muzeih niškoi lövvyttih škola-internuatan enzimäzel kerroksel (endine Belbaltkombinuatan hoteli). Muzein enzimästy ozutteluu varustettih iče opastujat opastajan johtol[4].

Avattih muzei 12. sulakuudu vuvvennu 1962, enziallus se ruadoi školamuzeinnu, vuvvennu 1969 se rodih Kiži -muzei-zapovedniekan ozastokse, vuvvennu 1977 muzei kuului Karjalan valdivollizeh kodialovehmuzeih.

Vuvven 1985 tiedoloin mugah muzein varastolois oli läs nelliätuhattu ezinehty, niilöin keskes muinažuontiijolline keräilemy (ezinehet Sandarmoh-kohtas da toizis paikois), luonnontiijollizet materjualat, kodivehkehet da eloksentavois sanelijat ezinehet, käzin luajitut vešit, piirin hiestouriedu koskijat ainehellizet, kuva- da dokumentumaterjualat. Ozuttelu oli kolmes pertis 218 nellikkömetril: Elättimuailmu da sen suojelu; Karhumäin piirin dekoratiivine da rahvahan taido; Karhumäin piiri Suuren Ižänmuallizen voinan aigua. Joga vuottu muzeih kävyi läs seiččietuhattu hengie[5].

Vuvves 1991 muzei rodih iččenäzekse, se sai Linnan muzei -stuatusan. Muzein perustajannu oli Karhumäin piirin paikalline ičehaldivo. Vuvvennu 2006 linnan muzeis se muutui piirin muzeikse da sai nygözen Karhumäin piirin muzei -nimen.

Vuvvennu 2000 muzein Sandarmoh — surman kohtu -projektu voitti Sorosan fondan kilvas, palkindodengah muzeih ostettih tiedokonehtu, pandih rattahile tiijoitustoimindu, jatkettih jiännöksien ečindyruadoloi sego suuren terroran aijan yheksäntuhanden tapettuloin igäzeh mustoh panenduruadoloi ammundukohtal. Joga vuottu 4. elokuudu Karhumägeh tullah oman muan da ulgomuan rahvas[6].

8. elokuudu vuvvennu 2000 Karjalan halličuksen käskys Sandarmoh-kohtu kuuluu Ven’an kul'tuuruperindön objektoin luvetteluh alovehellizen merkičyksenke. Kaččou da pidäy kunnos kohtua Karhumäin piirin muzei tazavallan da piirin budžiettuvaroin vuoh[7].

Muzein taloi

Muzein ozuttelun fragmentu

Muzein tilat ollah endizen Belbaltkombinuatan  (ven.) (olo. hotelin enzimäzel kerroksel. Belbaltkombinuatan hoteli on vuozien 1930 Nevvostoliiton aijan kuulužimii simvoloi. Muzein taloi on mustomerki federuallizen merkičyksenke, valdivon vardoittavannu.

Varastot

Nygözel aijal muzein varastolois on enämbi 16 tuhattu ezinehty[8]. Varaston bohatus ollah Pohjazen mualuamisškolan Oniegantagavozes, Vigoreckoin manasteris da Seesjärvespäi tuovun enämbi migu kahtensuan obrazan keräilemy; Oniegantagavozen kirjoindehen keräilemy (azuttu tamburnois piärmindytehniekas); Puudogan da Seesjärven čupun, Vienanmeren rannikon, Oniegantagavozen ainavoluaduzien kuožaliloin keräilemy; naizien kaikenjyttymien biiseras punottuloin čomenduksien keräilemy (s’ergat-liipoilinduzet, venčat da kaglučomendukset). Muzein varaston erillizel paikal ollah mieldykiinittäjät kodivehkehet da ruadobrujat sego piirin (Danilovo- da Sergijevo-kylien) vahnan uskon rahvahan pivois da tavois sanelijat vešit: kives da puus vestetyt obrazat, vaskizet ezinehet: obrazat, ristat, kirikköezinehet, ristazet da toizet. Varastolois on tuohes punottuu, puuhistu da raudahistu vehkehty, kodiveššii da eri aijan pertilomuu. Muzeis tallel ollah Suurdu Ižänmuallistu voinua koskijat materjualat, ozutteluezinehien keskes ollah saldattoin kirjazet, fotokartočkat, käil kirjutetut painokset, dokumentat da suuri videoarhiivu[6].

Ozuttelu

Viijes zualas ruadau alalline ozuttelu. Se sanelou 18. da 19. vuozisuan paikallizien eläjien elokses da eloksentavois, Vienanmeren-Baltienmeren kanualan nostandas vuozinnu 1930—1940 sego Oniegantagavozen kirjoindehen histouries: ven. «На рубеже веков», «Кархумяки», «Беломорско-Балтийский канал», «Заонежские узоры. История и современность». Muzeis järjestetäh väliaigazii ozutteluloi[8].

Huomavukset

  1. ↑ Муниципальное казенное учреждение "Медвежьегорский районный музей". Госкаталог. Kačondan päivymiäry: 4. kevätkuudu 2025.
  2. ↑ Ершов В. П. "Самый обыкновенный поход" (находки 1960-х гг. из Красной Сельги в коллекции Медвежьегорского краеведческого музея) Arhiivukoupii 22 pakkaskuudu 2022 Wayback Machine // Живая старина. 2020. № 3 (107). С. 48—51.
  3. ↑ Ершов В. П. Крестьянские иконы Карелии Arhiivukoupii 22 pakkaskuudu 2022 Wayback Machine // Живая старина. 2008. № 3. С. 2—5.
  4. ↑ Пашков А. Виктор Ершов: краевед, педагог и коллекционер Arhiivukoupii 21 pakkaskuudu 2022 Wayback Machine // Лицей. 2017. 12 апреля.
  5. ↑ Исторические и краеведческие музеи СССР: каталог / Центр. Музей революции СССР; сост. Л. Н. Годунова и др. — М., 1988. С. 7—8.
  6. ↑ 1 2 Ружинская И. Н. Туризм как фактор возрождения провинциального музея (на примере Медвежьегорского районного музея) // Труды Санкт-Петербургского государственного университета культуры и искусств. — СПб. : СПб., 2012. — Т.193. — С.72—76.
  7. ↑ Флиге И. А. Сандормох: драматургия смыслов. СПб.: Нестор-История, 2019. С. 81. Kačondan päivymiäry: 22. pakkaskuudu 2022. Arhiviiruittu 20. pakkaskuudu 2022
  8. ↑ 1 2 Сайт Медвежьегорского районного музея. Kačondan päivymiäry: 22. pakkaskuudu 2022. Arhiviiruittu 22. pakkaskuudu 2022
Lähteh - "https://olo.ruwiki.ru/w/index.php?title=Karhumäin_piirin_muzei&oldid=126354929"