Valamoin muzei-zapovedniekku

Valamoin tiedotutkimukselline kirikköarheolougien da luonnon muzei-zapovedniekku
Tiippu	valdivolline laitos
Perustanduvuozi	1979
Perustajat	Karjalan tazavallan kul'tuuruministerstvu, Moskovan patriarhii
Sijoittumine	Valamoi (Ven'a)
Toimindan ala	matkailu
Verkosivusto	www.museum.ru/M1240
Медиафайлы на РУВИКИ.Медиа

Ven'an Federacien kul'tuuruperindön objektu

Valamoin muzei-zapovedniekku enziallus oli valdivollizennu muzeinnu, jälles ei-kaupallizennu yhtistyksenny Valamoin suaristol, se perustettih suarien arhitektuuru- da muakompleksan, sežo mualuamistaijon, gruafiekan, dekoratiivukäytöndöllizen taijon, Valamoin Spuasan miesmanasterin histourien materjualoin keräilemien säilyttämizekse da ozuttamizekse.

Histourii

Valamoin suaristol on Spuasan miesmanasteri, eräs merkittävimis pravosluavien keskuksis Ven'an pohjazes. Manasterin paras aigu piädyi XIX vuozisuan puolivälih — XX vuozisuan alguh, konzu manasteris oli kehitynnyöt talohus, ruadopajat, fermat, savut, puuloin toimenkazvatushuonukset, kanualat, kudamat yhtistettih järvilöin sistieman da muut. Vuvvennu 1917 Suomi sai iččenäžyön da Valamoin suaret ruvettih kuulumah sih. Talvivoinan aigah Valamoin manuahat mendih evakkoh Suomen sydämeh da ei loitton Heinäviespäi perustettih Uuzi-Valamoin manasteri. Uudeh manasterih da Kuopion kirikkötaijon muzeih puututtih Valamoin manasterispäi suurin oza viettylöis kirjastos, arhiivois, kellolois, obrazois da tozis kallehis vehkehis.

Vuvvennu 1979 Valamoin suaristol, kudamal jo sih aigah oli luonnon suojelualoveh, Valamoin Spuasan manasterin arhitektuuru- da muakompleksan säilyttämizekse Ven'an federatiivizen socialistizen nevvostotazavallan Ministroin Nevvoston käskys № 437 28.08.1979 perustettih valdivolline muzei-zapovedniekku, Karjalan kodialovehmuzein ozasto. Piettih suariston alovehen juandu, sit eroitettih alovehet vagavan suojelunke, rekriacii-, talovus-, suojelualovehet. Ven'alazen stiilin mugah (arhitektoru A. M. Gosnostajev da muut) nostetut Valamoin manasterin huonukset (Spuasan kirikkö, kel'l'oin, hoteliloin huonukset) da skiitat, kudamat luonnollizesti yhtytäh kauneheh luonnonmuah, suadih Ven'an kul'tuuruperindön objektan stuatusan.

Vuvvennu 1984 Valamoin valdivolline histourien da arhitektuuran da luonnon muzei-zapovedniekku ei rubie kuulumah Karjalan kodialovehmuzeih.

Konzu Spuasan manasteri rubei uvvessah ruadamah vuvvennu 1989, muzei-zapovedniekan varastolois oli läs 13 tuhattu ozutteluvehkehty, niilöin joukos oli arheolougizii löydölöi, etnogruafien da luonnontiijon keräilemii, nygyaigazien taidoilijoin Valamoile omistettuloin mualuamistaijon da gruafiekan tevoksien keräilemii. .

Vuvvennu 1992 Karjalan avtonoumizen socialistizen nevvostotazavallan Ministroin Nevvoston käskys muzei-zapovedniekku salvattih da sit luajittih yhtistys rajoitetun vastuolližuonke "Valamoin tiedotutkimukselline kirikköarheolougien da luonnon muzei-zapovedniekku", oza keräilemäs annettih Alovehellizeh Pohjazen Luadogan rannikon muzeih (Sordavalu-linnu).

Muutoksih kaččomattah vuvvennu 1995 piäzi ilmah Ven'an Federacien piämiehen käsky № 176,kudaman mugah jo olemas olematoi Valamoin valdivolline histourien da arheolougien da luonnon muzei-zapovedniekku rubei kuulumah histourien da kul'tuuran perindön objektoin joukkoh federuallizen merkičyksenke.

Vuvvennu 2002 pietäh uuttu muzein muutostu, muuttuu muzein järjestely- da oigevusmuodo, yhtistykses rajoitetun vastuolližuonke rodieu yhtymys rajoitetun vastuolližuonke, uvven yhtymyksen perustajikse roittih Karjalan tazavallan kul'tuuruministerstvu da Moskovan patriarhii.

Vuvvennu 2009 muzein alalline ozuttelu avavui uvvessah nostetus Pyhän Vladimiran skiitas.

Vuvvennu 2013 uvvessah rodih muutostu Valamoin muzein histouries — perustetah OOO "Valamoin manasterin muzei" ven. ООО «Музей Валаамского монастыря». Sen ainavonnu perustajannu on Valamoin Spuasan miesmanasteri.

Vuvvennu 1996 Valamoin suariston luondo- da kul'tuurukompleksan aloveh oli kandiduatakse UNESCON muailman perindön luvettelun objektoin, ga vuvvennu 2016 pakičus otettih iäre.

Ozuttelut

• Alalline ozuttelu Pyhän Vladimiran skiitan kirikköhuonukses.
• Kariettu- da kon'uššisaruas valgamol Manasterin lahtes avattih Valamoin manasterin talovuole da eloksentavoile omistettu ozuttelu.

Huomavukset

Kirjalližus

• Постановление Совета Министров РСФСР от 28.08.1979 № 437 : О мерах по сохранению и использованию памятников истории и культуры и природного ландшафта Валаамских островов в Карельской АССР. — Москва, 1979.
• Указ Президента РФ от 20.02.1995 № 176 : Об утверждении Перечня объектов исторического и культурного наследия федерального (общероссийского) значения. — Москва, 1995.
• Российская музейная энциклопедия : в 2 т.. — М. : Прогресс, «РИПОЛ КЛАССИК», 2001. — Т. 1. — 416 с. — ISBN 5010045354.
• Валаамский научно-исследовательский церковно-археологический и природный музей-заповедник [Электронный ресурс]. — «Музеи России». — 2015.
• Вехи истории Музея Валаамского монастыря [Электронный ресурс] / Я.А. Гайдукова. — Valamo.ru.
• Попов С. Валаамский музей-заповедник [Электронный ресурс]. — Museolog.com.
• World Heritage Site [Электронный ресурс] : The Valamo archipelago. — www.worldheritagesite.org.