Nikolai Zaicev
| Nikolai Petrovič Zaicev | |
|---|---|
| Roindupäivy | 16. talvikuudu 1938 |
| Roindukohtu | Alavozen čupun Antilan kylä, Anuksen piiri, Karjalan avtonoumine socialistine nevvostotazavaldu, Nevvostoliitto |
| Kanzalližus |
 Nevvostoliitto,  Ven'anmua |
| Toimindu | kirjuttai, taidoilii |
| Palkindot da arvonimet |
Vladimir Brendojevan nimine literatuurupalkindo |
Nikolai Petrovič Zaicev (16. talvikuudu 1938) on karjalaine kirjuttai da taidoilii. Kirjuttau karjalan kielen livvin murdehel.
Eloskerdu
Nikolai Zaicev on roinnuhes 16. talvikuudu vuvvennu 1938 Alavozen čupun Antilan kyläs Anuksen piiris. Školan jälles ruadoi Alavozen meččyzavodal. Jo lapsennu ylen äijäl suvaičči piirustua. Vuvvennu 1960 Nikolai Zaicev loppi Moskovan kogonevvostoliiton taidoinstituutan.
Oman mučoinke Galinanke Nikolai Zaicev tuttavui vuvvennu 1963 Alavozen kluubas, nuoret kerras miellyttih toine toizeh. Yhtes kazvatettih kaksi poigua, kazvatetah bunukkoigi. Nikolai Petrovič sanou, ku pereh kannattau händy kaikis ruadolois.
Nikolai Zaicev ruadoi meččyzavodal. Nygöi on eläkkehel da eläy Anuksenlinnas. Vuvves 2005 algajen rubei kirjuttamah kerdomuksii, novelloi karjalan kielen livvin murdehel. Novellois Zaicev kuvailou omua muadu, Karjalan hieruloin histouriedu. Novelloin piäaihiennu on karjalaine ristikanzu, hänen hengi, mielet, duumat, tahtot, ilot da igävät.
Toimindu literatuurualal
Vuvvennu 2006 Nikolai Zaicev kirjutti oman enzimäzen Čuajumuagari-kerdomuksen. Sen jälles päivänvalgien nägi vie äijy piendy da suurdu kerdomustu. Viizi niilöis on otettu kirjuttajan enzimäzeh Omat ikkunat -kniigah, kudai piäzi ilmah vuvvennu 2009.
Vuvvennu 2014 Petroskois piäzi ilmah kirjuttajan kerdomuksien kogomus "Katkattu oza". Nikolai Zaicev oli sen kniigan taidoilijannu.
Zaicevan tevoksien piätiemannu on ristikanzu, kudaman kauti kirjuttai sanelou vaigielois histouriellizis tahahtumis: voinis, kollektivizacies, repressielois sego voinan jälgehizis vuozis. Tevokset on kirjutettu iče Nikolai Zaicevan, hänen buaban da died'oin elaigufaktoin pohjal. Nikolai Zaicevan kerdomukset koskietah syväindy. Kirjuttai nerokkahasti, kielastamattah da liijoittelemattah ozuttau karjalazien elaigua da tabua.
Vuozinnu 2008 da 2011 Nikolai Zaicev on suannuh Vladimir Brendojevan nimizen literatuurupalkindon[1].
Toimindu taidoilijannu
Nikolai Zaicev on nerokkahannu taidoilijannu. Piirustua häi algoi školas, konzu opastui kolmandes kluasas. Piirustuskerhos hänel oli nerokas opastai Leonid Korhonen, kuduas häi äijäl mih opastui. Sit nämmä tiijot päittih hänele Moskovan taidoinstituutas opastujes. Mondu vuottu Nikolai Zaicev ruadoi mainostaidoilijannu. Kogo elaijas hänel suitui läs sadua kuvua. Erähät niilöis pandih ozutettavakse Anukses, Alavozes sego Petroskois.
Bibliogruafii
- Zaitsev, N. Omat ikkunat : kerdomuksii / Nikolai Zaitsev. — Petroskoi : Periodika, 2009. — 77, [1] c. ; 17 см. — На авантит.: Karjalan Tazavallan 90-vuozipaivakse. — Текст карел. — В вып. дан. авт.: Николай Петрович Зайцев. — ISBN 978-5-88170-190-1.
- Zaitsev, N. Katkattu oza : kerdomuksii karjalan kielel, livvin murreh / Nikolai Zaitsev ; taidoilii Nikolai Zaitsev. — Petroskoi : Verso, 2014. — 143, [1] c., [4] л. цв. ил. ; 20 см. — Текст карел. (ливвик. наречие). — В вып. дан.: Сломанная судьба : рассказы на карельском языке, ливвиковское наречие / Николай Петрович Зайцев. — ISBN 978-5-91997-120-7.
- Zaitsev, N. Nägemizih, Tuulos : [kerdomus] / Nikolai Zaitsev. — Petroskoi : Periodika, 2018. — 62 с. ; 20 см. — В выпускных данных заглавие и автор: До встречи, Тулокса : повесть на ливвиковском наречии карельского языка / Николай Петрович Зайцев. — ISBN 978-5-88170-314-1.
Huomavukset
Kirjalližus
- Judina, N. Heimovellilöin tunnustus : [anukselaine kirjuttai Nikolai Zaitsev on suannuh literatuurupalkindon] / Natalja Judina // Oma Mua. — 2010. — 17. kylmyk. (№ 45). — Текст карел.
- Libertsova, V. Ammui vuotettu kirjuttai : [Nikolai Zaitsev täyttäy 75 vuottu] / Valentina Libertsova // Oma Mua. — 2013. — 4. talvikuudu (№ 47). — Текст карел.
- Kuzmina, O. Luonnon helmas kazvanuh kirjuttai : [Karjalan kirjuttai Nikolai Zaitsev täytti 75 vuottu] / Ol'ga Kuzmina // Oma Mua. — 2013. — 25. talvikuudu (№ 50). — Текст карел.
- Libertsova, V. Nikolai Zaitsevan kirjavu muailmukuva / Valentina Libertsova // Taival, 2013 : almanakku / [toim.: Galina Lettijeva и др.]. — Петрозаводск, 2013. — С. 44-47. — ISBN 978-5-88170-229-8. — Текст карел.
- Smotrova, O. Nikolai Zaitsev: "Suvaičen mualata luonduo" / Ol'ga Smotrova // Taival, 2014 : almanakku / [toim.: Jelena Migunova, Natalja Sinitskaja, Olga Melentjeva]. — Петрозаводск, 2014. — С. 81-91. — ISBN 978-5-88170-240-3. — Текст карел.
- Kuzmina, O. Luondo joga kuvas : [Nikolai Zaitsevan mualavuksien ozuttelu] / Ol'ga Kuzmina // Oma Mua. — 2014. — 26. tuhukuudu / tuiskukuuta (№ 7). — Текст карел.
- Mičurova, N. Elän sobun oman hengenke : [Karjalan kirjuttai Nikolai Zaitsev täytti 80 vuottu] / Nadežda Mičurova // Oma Mua. — 2018. — 26. talvikuuta / talvikuudu (№ 50). — S. 8. — Текст карел.