Vera Larionova

Vera Mihailovna Larionova
Vera Mihailovna Larionova
Roindupäivy	28. oraskuudu 1956 (70 vuottu)
Roindupaikku	Kotkatjärvi, Anuksen kanzalline piiri, Karjal-Suomelaine socialistine nevvostotazavaldu, Nevvostoliitto;
Kanzalližus	Nevvostoliitto; Ven'a;
Toiminduala	runoilii, kirjuttai
Tevoksien kieli	karjalan kielen livvin piämurreh
Palkindot	Vladimir Brendojevan nimizen literatuurupallindon laureattu (2015)

Vera Mihailovna Larionova (roin. 28. oraskuudu 1956, Kotkatjärvi, Anuksen kanzalline piiri; ven. Вера Михайловна Ларионова) on karjalaine kirjuttai, runoilii, Vladimir Brendojevan nimizen literatuurupalkindon laureattu (2015).

Eloskerdu

Vera Larionova on roinnuhes Kotkatjärven kyläs 28. oraskuudu 1956 vuvvel muanruadajien perehes. Pienete kaimai muaman, ga yksikai kazvoi hyvämielizenny lapsennu. Opastui Kotkatjärven školas, oli parahien joukos, suvaičči lugie, ottua ozua ozutelmoih, konsertoih, kilboih. Konzu loppi školaopastundan, piäzi opastumah Karjalan pedagouguyliopistoh, kudaman loppi vuvvennu 1977 ylen hyvin.

Yliopiston jälles hāndy työttih ruadamah Jeroilan alguškolah, kudai oli hierun kaksikerroksizes parzikois. Jeroilas naine ruadoi nelli vuottu, lastu oli vähättävy, škola sit salvattih, a Vera Mihailovna vie äijän vuottu, vuvves 1881 penziessäh, ruadoi algukluassoin opastajannu Alavozen keskiškolas.

On eläkkehel, eläy Alavozen kyläs.

Luomisruado

Vuvves 2004 kirjuttau runuo karjalan kielel, niilöi painetah Oma Mua- da Olonija -lehteh, erilazih kogomuksih^[1]. Vuvvennu 2015 rodih Vladimir Brendojevan nimizen literatuurupalkindon laureatakse^[2].

Kiinnostukset

"Minä suvajčen kaikkie karjalastu", sanoi kerran Vera Mihailovna. Naine mielihyväl tarattau livvikse, kirjuttau muamankielel runuo, kerdomustu, ozutelmua, pajozii da častuškoi. Puaksuh pastau šipainiekkua, marjupiiruadu, kui on harjaitettu karjalazis perehis.

On joga ruadoh nerokas, ei istu tyhjiä televiizoran ies, ainos midägi käzil čopottau: nieglou čomii alazii, ruuttii, šalipaikkoi, sumkii, ombelou, viišivoiččou. Pidäy kunnos duaččua Jeroilas, kazvattau äijän ouveššii, marjua, kukkua. Suvaiččou vastata gostii, šeimie tävvet stolat, gostittua ku paras emändy. Ainos on varustuksis tulla abuh pidoloih karjalan kielen hyväkse. Joga kohtas azuu omii fotokuvii da videoloi, sit niis keksiy omat kinot. Runot da kuvat painau omih käzikniigazih.

Palkindot da arvonimet

Vladimir Brendojevan nimizen literatuurupalkindon laureattu (2015)^[3].

Huomavukset

↑ Вера Михайловна Ларионова (рус.). lit-karta.karelia.ru. Kačondan päivymiäry: 7. ligakuudu 2025.
↑ XV Республиканский фестиваль карельской литературы имени В. Брендоева (2015 год) (рус.). fulr.karelia.ru. Kačondan päivymiäry: 7. ligakuudu 2025.
↑ Лауреаты премии им. В.Е. Брендоева (рус.). biblioteka-olon.karelia.ru. Kačondan päivymiäry: 7. ligakuudu 2025.

[1] Вера Михайловна Ларионова (рус.). lit-karta.karelia.ru. Kačondan päivymiäry: 7. ligakuudu 2025.

[2] XV Республиканский фестиваль карельской литературы имени В. Брендоева (2015 год) (рус.). fulr.karelia.ru. Kačondan päivymiäry: 7. ligakuudu 2025.

[3] Лауреаты премии им. В.Е. Брендоева (рус.). biblioteka-olon.karelia.ru. Kačondan päivymiäry: 7. ligakuudu 2025.

[1]

[2]

[3]