Tamara Ščerbakova

On otettu Рувики-späi
Tarkastettu kirjutus
Tamara Vasiljevna Ščerbakova
TamaraŠčerbakova.png
Roindupäivy 4. tuhukuudu 1944(1944-02-04)
Roindukohtu Tuuksen kylä, Anuksen piiri, Karjalan avtonoumine socialistine nevvostotazavaldu, Nevvostoliitto
Kuolendupäivy 6. sulakuudu 2018(2018-04-06) (74 vuottu)
Kuolendukohtu Petroskoi
Kanzalližus  Nevvostoliitto,  Ven'anmua
Toimindu opastai, kirjuttai, kiändäi
Palkindot da arvonimet

Tamara Vasiljevna Ščerbakova (ven. Тамара Васильевна Щербакова, 4. pakkaskuudu vuvvennu 1944 — 6. sulakuudu 2018) on karjalan kielen opastai, kirjuttai, runoilii, kiändäi, Vladimir Brendojevan nimizen literatuurupalkindon laureattu (2014)[1].

Eloskerdu

Tamara Ščerbakova oli roinnuhes 4. tuhukuudu vuvvennu 1944 Anuksen piirin Tuuksen kyläs suures karjalazes perehes. Sen Tuuksen kylän agjua sanotah Änkiläkse. Tuatto ruadoi raududorogal, muamo — kolhozas da souhozas[2]. Tamara oli keskimäine lapsi, hänel oli kolme vellie da kolme sizärdy[3].

Loppi Karjalan pedagouguinstituutan. Instituutan jälles rodih opastajakse. Ruadoi Suojärven piiris, sit Vienan Karjalas Lendieran kyläs. Opasti matemuatiekkua da ven’an kieldy. Vuvvennu 1986 pereh muutui Petroskoih da Tamara rubei ruadamah školas № 2[3]. Jälles sit školas häi rubei opastamah lapsii karjalan kieleh. Kaikkiedah opastajannu ruadoi nellikymmen nelli vuottu[2]. On karjalan kielen opastuskniigoin luadijannu.

Konzu rubei ruadamah karjalan kielen opastajannu, rubei kirjuttamah kerdomuksii da runoloi karjalan kielen livvin murdehel. Kaksi vuottu Tamara Ščerbakova lapsienke vedi karjalan kielen urokkoi Karjalan TV:n ohjelmis[2].

Kuului karjalan kielel kirjuttajien da runoilijoin Karjalaine sana -yhtistykseh da Karjalan Rahvahan Liiton hallindoh[3].

Kuoli 6. sulakuudu vuvvennu 2018 jygien tavvin jälles[4].

Luomisruado

Kirjuttajan kerdomuksii da runoloi lapsile ruvettih painamah Oma Mua -lehteh da Kipinä-žurnualah 1990-luvun puolivälis.

Hänen enzimäine kniigu "Pajun kukkazet — keviän viestit" piäzi ilmah vuvvennu 1999. Sen jälles piäzi ilmah vie äijy kaunehkirjalližuon kniigua.

Kirjuttajan kerdomuksien piäaihiennu ollah lapset, luondo, elätit da kylän elaigu.

Tamara Ščerbakovua tundietah kiändäjänny. Häi yhtes Tatjana Boikonke kiändi Mihail Prišvinan Päiväzen aittu -kerdomuksen, kudai nägi päivänvalgien kniigannu vuvvennu 2006 Petroskois. Elaijan jälgivuozinnu kiändi karjalan kielele Astrid Lindgrenan kniigoi “Peppi Pitkysukas”. Niilöi painettih Suomes Karjalan Sivistysseuran kannatuksel.

Vuvvennu 2014 Ščerbakova rodih Vladimir Brendojevan nimizen literatuurupalkindon laureatakse.

Bibliogruafii

  • Tamara Ščerbakova. Pajun kukkazet — keviän viestit. — Petroskoi: Periodika, 1999.
  • Tamara Ščerbakova. Enne Rastavua. — Petroskoi: Periodika, 2000.
  • Tamara Ščerbakova. Armahile bunukoile: kerdomukset karjalan kielel. — Petroskoi: Periodika, 2002.
  • Malittusana karjalan kielen livvin murdehel / kiändi karjalakse T. Ščerbakova; čomastai O. Ikkonen. — Petroskoi : Periodika, 2002.
  • Bogdanova, L. Karjalan kielen harjoituskogomus : 3—4. luokku : livvin murdehel / L. Bogdanova, T. Ščerbakova. — Petroskoi : Periodika, 2004. — 95 s
  • Tamara Ščerbakova. Kačo da vardoiče. — Petroskoi: Periodika, 2006.
  • Prišvin, M. Päiväzen aittu : [рассказ] / Mihail Prišvinan mugah ; kiännettih karjalakse: Ščerbakova Tamara, Boiko Tatjana ; [kuv. O. Ikkonen]. — Petroskoi : Verso, 2006. — 25 c. : ил. ; 29 см. — Текст карел. (ливвик. наречие). — На обороте тит. л. в макете: Кладовая солнца / Михаил Пришвин. — ISBN 5-85039-188-7.
  • Tamara Ščerbakova. Armahile bunukoile. — Petroskoi: Verso, 2010.
  • Marjuškan ilot / Tamara Ščerbakova, Marjukka Patrakka. — Petroskoi: Verso, 2010.
  • Seiččie eriväristy vihmuvarjie / Tamara Ščerbakova, Marjukka Patrakka. — Petroskoi: Verso, 2012.
  • Tamara Ščerbakova. Minun enzimäzet ruavot. — Petroskoi: Verso, 2014.
  • Peppi Pitkysukku / Astrid Lindgren; livvinkarjalakse kiännettih: Tamara Ščerbakova, Aleksi Ruuskanen; čomendi Ingrid Vang Nyman]. — [S. a.] : Karjalan Sivistysseura, 2018. — 153, [1] с. : ил. ; 22 см. — Текст карельский. — ISBN 978-952-7193-14-3
  • Peppi Pitkysukku nouzou laivale / Astrid Lindgren; livvinkarjalakse kiännettih: Tamara Ščerbakova, Aleksi Ruuskanen; — Karjalan Sivistysseura, 2019

Huomavukset

  1. ↑ Литературная карта Карелии. Щербакова Тамара Васильевна
  2. ↑ 1 2 3 Karjalan ruadivo. Opastajan da kirjuttajan mustole
  3. ↑ 1 2 3 Kuulužat da pravvallizet liittolazet: Tamara Ščerbakovan vuozipäiväkse
  4. ↑ Karjalan ruadivo. Tamara Ščerbakovan mustokse

Kirjalližus

  • Valentina Mironova. Kuulužat da pravvallizet liittolazet: Tamara Ščerbakovan vuozipäiväkse // Oma Mua. — 2024. — 7. tuhukuudu (№ 5). — С. 7.

Linkat

Lähteh - "https://olo.ruwiki.ru/w/index.php?title=Tamara_Ščerbakova&oldid=126360654"