Ivan Savin
| Ivan Stepanovič Savin | |
|---|---|
| Roindupäivy | 7. syvyskuudu 1940 (84 vuottu) |
| Roindukohtu | Siämärvi, Priäžän piiri, Karjalan avtonoumine socialistine nevvostotazavaldu, Ven'an federatiivine socialistine nevvostotazavaldu, Nevvostoliitto |
| Kanzalližus |
 Nevvostoliitto,  Ven'anmua |
| Toimindu | runoilii, kirjuttai |
Ivan Stepanovič Savin (7. syvyskuudu 1940) on karjalaine kirjuttai da runoilii, Vladimir Brendojevan nimizen literatuurupalkindon laureattu (2006)[1].
Eloskerdu
Ivan Savin on roinnuhes vuvvennu 1940 Priäžän piirin Siämärven kyläs. Hänen lapsusaigu meni Anuksen piirin Nurmoilan kyläs. Mies oli armies pohjazes merilaivastos.
Ivan Savin opastui Piiterin meččyakadiemies, loppi Siktivkaran sel'l'ulouzu- da bumuagutehnikuman[2], ruadoi Läskeläs, avvutti nostua Taškentua muanjärähtyksen jälles. Jälgimäzet 20 vuottu eläkkehele lähtendässäh Savin ruadoi Petroskoin sähkölämbökeskukses.
Monii vuozii Savin pajatti da tansi Oma Pajo -horas, ruadoi yhteiskunnallistu ruaduo Karjalan Rahvahan Liitos.
Luomisruado
Livvinkielisty runuo Ivan Savin rubei kirjuttamah vuvves 1989 algajen. Hänen runoloi on painettu Oma Mua- da Olonija -lehtis, Taival-al'manuahas, Carelia- da Mokša-žurnualois, kerävökniigois "Volny trav: Stikhi poetov Karelii" (Petrozavodsk, 1998) (ven'akse runot kiändi Armas Mišin) da "Omil pordahil" (Petroskoi, 1999), sego antolougies "Karjalan pagin" (Petroskoi, Periodika, 2003).
Kyläs kazvanuh da monis kohtis ruadanuh Savin hyvin tiedäy karjalazen rahvahan elaijan, sydämeči tundou da suvaiččou Karjalan luonduo.
Muamankieli, oman rahvahan vahingot da ihalmot, luondoymbäristö ollah hänen runoloin piätiemannu. Se nägyy jo runoloin nimis: "Karjalan kieli", "Minun Karjal", "Oma Mua", "Syvysehty", "Luonnon helmas"...
Vuvvennu 2005 piäzi ilmah Ivan Savinan runokniigu "Roindurandu". Lugii löydäy kniigas kaunistu, mieleviä, nerokastu, sydämen lämmittäjiä runuo da rivii. Nuorile tämä runokniigu roih, ku rikas aittu, kuduas löydyy tarkua sanua, puhtastu karjalankielisty sanondua, viizahuttu. Kaikkiedah runoilijal on piässyh ilmah kolme kniigua.
Savin kuuluu karjalankielizien kirjuttajien da runoilijoin Karjalaine sana -yhtymykseh (ven. «Карельское слово»).
Bibliogruafii
- Savin I. Roindurandu: runot. – Petrozavodsk: Periodika, 2005. – 79 s.
- Савин, И. С. Родное до боли / Иван Савин. – Петрозаводск : Verso, 2014.
- Savin I. Minä mustan. – Petrozavodsk, 2015.
Palkindot da arvonimet
- Vladimir Brendojevan nimizen literatuurupalkindon laureattu (2006)