Andrei Paškov

Tämä kirjutus kuuluu hyvien kirjutuksien joukkoh
On otettu Рувики-späi
Andrei Nikitovič Paškov
Андрей Никитович Пашков.jpg
Roindupäivy 27. elokuudu 1910(1910-08-27)
Roindukohtu Jendoguba, Sorokan voulosti, Kemin ujezdu, Arhangelin gubernii[1], Ven’an valdukundu
Kuolendupäivy 27. pakkaskuudu 1945(1945-01-27) (34 vuottu)
Kuolendukohtu Pol’šu
Kuulundu  Nevvostoliitto
Voiskien laji tankuvoiskat
Palvelun vuvvet 1932—1945
Arvonimi
Полковник
Командовал 32. erilline gvardien murron tankupolku,
220. tankubriguadu
Torat/voinat Talvivoinu (1939—1940)
Suuri Ižänmualline voinu
Palkindot
Герой Советского Союза
Leninan kunnivomerki Орден Красного Знамени Орден Красного Знамени Орден Отечественной войны I степени
Орден Красной Звезды Медаль «За боевые заслуги» Leningruadan puolistukses -medalil
ПочётныйГражданинКарелии.png

Andrei Nikitovič Paškov (27. elokuudu vuvvennu 1910 — 27. pakkaskuudu vuvvennu 1945) on nevvostolaine oficieru-tankistu, Talvivoinan da Suuren Ižänmuallizen voinan ozanottai. Nevvostoliiton urhomies.

Suuren Ižänmuallizen voinan aigah — 220. tankubriguadan piälikkö, Ruskien Armien polkovniekku. Ozutti iččie pakkaskuul vuvvennu 1945 Vislu-Oderan operacien aigah.

Eloskerdu

Aigazet vuvvet

Oli roinnuhes 27. elokuudu vuvvennu 1910 Jendoguba-kyläs (nygöi Karjalan tazavallan Belomorskan piiri) köyhän muanruadajan pereheh[2].

Vuvvennu 1924 liityi nuorižoliittoh, händy vallittih mečänpiluanduzavodan nuorižoliiton sekretarikse[2]. Vuvves 1925 vuodessah 1928 opastui fuabrikku-zavodanopastuksen školas mečänpiluanduzavodan tyves Sorokan kyläs (nygöi Belomorskan linnu), sen loppiettuu ruadoi brakovščiekannu Sorokan mečänpiluanduzavodal[2].

Vuvvennu 1929 liityi Kogo Nevvostoliiton bol’ševiekkoin kommunistizeh partieh. Vuvvennu 1930 händy vallittih Sorokan nuorižoliiton piirikomitietan sekretarikse[2].

Sodasluužbu

Jälles opastundua ruadotiedokunnal Leningruadas vuvvennu 1932 Paškovua otti Ruadajien da muanruadajien Ruskieh Armieh Belomorskan piirin sodakomitiettu, händy työttih Saratovan tankuškolah, kudaman lopiettuu vuvvennu 1933 häi rubei sluužimah Leningruadan sodaokrugan tankuozastolois[2].

Vuvvennu 1939 loppi M. V. Frunzen nimizen soda-akadiemien[2].

Talvivoinu da Suuri Ižänmualline voinu

Kapituanannu otti ozua Talvivoinah[2].

Vuvven 1941 kezäkuus kapituanu A. N. Paškov oli Suuren Ižänmuallizen voinan frontil, voinan allus oli Riigas, kus väliaigazesti oli 12. mehaniziiruitun korpusan 28. tankudiviizien štuaban piälikönny[3]. Otti ozua Luodehfrontan puolistusbojuloih Šjaul’ain da Novgorodan luo[2]. Yhtyi kuudeh tankubojuh. Voinan allus ozutetus urholližuos händy palkittih Ruskien Flavun kunnivomerkil (25. heinykuudu vuvvennu 1941)[3]. 18. elokuudu oli jygiesti ruanittu[4].

Ligakuul da kylmykuul vuvvennu 1941 otti ozua Tihvinän operacieh[2]. Händy pandih 7. gvardien jygien tankubriguadan piälikökse[5].

Pakkaskuul vuvvennu 1943 32. erillizen gvardien murron tankupolkan piälikönny A. N. Paškov yhtyi Leningruadan blokuadan katkuandah Pedrun linnoituksen lohkol[2]. Hänen polku yhtes 327. ammundudiviizien ozastoloinke valloitti vihollizen erähän lujiman puolistuskohtan — Kruglaja-rošan. Jygieh kontuuzieh kaččomattah ei lähtenyh bojus, jatkoi sen johtandua. Leningruadan blokuadan katkuandas A. N. Paškovua palkittih Suuren Ižänmuallizen voinan I astien kunnivomerkil (17. kevätkuudu vuvvennu 1943), 327. ammundudiviizies rodih 64. gvardien ammundudiviizii[6].

Erähän aijan 59. armien raudusuojustankoin da mehaniziiruittuloin voiskien (Leningruadan frontu) piälikönny olduu polkovniekku A. N. Paškov rodih kezäkuul vuvvennu 1944 220. Gatčinan Ruskien Flavun tankubriguadan piälikökse. Karjalan kannakselpäi vihollizen myöstyttyy da Viborgan piästettyy briguadu siirrettih Pol’šah, kus se liityi 5. iškuarmieh[2].

Vuvven 1945 pakkaskuun allus briguadu ylitti Visla-joven Varšavua suvemba da yhtes toizien jalguväin da artilierien ozastoloinke (94. gvardien ammundudiviizii, 396. gvardien jygei ičeliikkui artilierien polku, 92. inženieru-tankupolku[4]) sil pidi katkata vihollizen puolistus Magnuševan placdarmal[2].

220. tankubriguadan piälikkö A. N. Paškov nerokkahasti järjesti vihollizen puolistuksen katkuandan 14. pakkaskuudu vuvvennu 1945 da Pilica-joven ylittämizen. 17. pakkaskuudu vuvvennu 1945 briguadu valloitti Skernevice-linnan da pietteli sidä ammundujoukkoloin tulendassah[2] (vastustettih kaheksa vihollizen atuakkua suutkien aigah[4]). Sen jälles briguadu piästi Vongrovec-linnan[2].

Briguadan № 300 piälikön tanku, kudai oli briguadan bojujärjestykses, 14-40 čuasun aigah 27.01.45 joudui peittopaikaspäi faustgranuatan ammundah. Tankan bašn’ah ammundah surman sai briguadan piälikkö.

Ilmoituksespäi 28.1.1945[7].

27. pakkaskuudu vuvvennu 1945 vihollizen puolistuksien rynnäköl otandan aigah Erbarsdorfan linnan lähäl A. N. Paškov sai surman, konzu briguadan kolonnu puutui ymbäröičykseh.

Händy pandih muah Vongrovec-linnan piälagevole[2].

Nevvostoliiton Korgeviman Nevvoston Prezidiuman käskys 6. sulakuudu vuvvennu 1945 "nerokkahas tankujoukon ohjuandas, johtokunnan tehtävien kunnollizes täyttämizes da ozutetus urhakkahuos da urholližuos fašistoin valloittajii vastah" gvardien polkovniekale Andrei Nikitovič Paškovale annettih Nevvostoliiton urhomiehen arvonimi[2].

Palkindot da arvonimet

Nevvostoliiton valdivollizet palkindot da arvonimet[2]:

  • Nevvostoliiton urhomies (6. sulakuudu vuvvennu 1945[4]);
  • Leninan kunnivomerki (6. sulakuudu vuvvennu 1945);
  • kaksi Ruskien Flavun kunnivomerkii (25. heinykuudu vuvvennu 1941[3], 25 апреля 1942[6]);
  • Suuren Ižänmuallizen voinan I astien kunnivomerki (17. kevätkuudu vuvvennu 1943[6]);
  • Ruskien Tiähten kunnivomerki (14. tuhukuudu vuvvennu 1944[8]);
  • medalit, niilöin joukos:
    • Medali "Bojuarvoruadolois" (1944[4]);
    • Medali "Leningruadan puolistamizes" (1942[4]);
  • Karjalan tazavallan kunnivokanzalaine -arvonimi (kuoltuu, vuvvennu 2025)[9].

Pereh, persounalline elos

Ulgopuolizet kuvat
Perehen kuva.

Olen nygöi uvves fatieras sagies pedäjikös, kaivoimmokseh oman tolohuonke syväh muah. Se on jälgimäine fatieru enne bojuu. Nygöi minul piäs on kaksi suurdu ajatustu: 1. Työ, minun pereh, kudamanke minä tahton vastavuo, da ku ei olis sit eruondua; 2. Da voittua boju ilmai suurii kaimavuksii, täyttiä tehtävät.

Kirjaine akale 4. pakkaskuudu vuvvennu 1945[5].

Akkah — Anna Grigorjevna Paškova (Peret’agina), eli Leningruadas Pvarskoil kujol[10]. Enne voinua opastui Sorokan fuabrikku-zavodanopastuksen školas, ruadoi meččyzavodal. Yhtes ukonke jagoi kai Ruskien Armien piälikön elosijoin muutandat[5].

Poigah — Jevgenii, inženieru-avtomobilistu[5]. A. N. Paškov kirjutti frontalpäi akale da poijale enämbän kahtusadua kirjastu[5].

Sodaliäkäri J. A. Noreiko musteli, ku A. N. Paškov «ei olluh suuri kazvol, ruznas mies, prostoin aktiivizen ilvienke. Ainos kunnos, kunnivomerkilöinke, vuadivaine oman ičen da toizien puoleh, kovasydämelline, konzu sidä tarvittih, da samal aigua huogavohetkinny suadavis olii.»[11] Hänen bojukyvys kai bataljounan piäliköt — M. D. Kononov, V. A. Gnedin da V. G. Kabanov, kudamat sežo roittih Nevvostoliiton urhomiehiekse, šuutkahes dai vagavah yhtel aigua sanottih A. N. Paškovua «bat'akse»[5]. A. N. Paškoval oli vagavu taudi — vačan ruanu, ga briguadas sit ei tietty, voinan periä hänel ei olluh aigua parandamizeh[11].

Musto

Ulgopuolizet kuvat
Paškovan kuva Nevvostoliiton urhomiehien gallereis Petroskois.
Kodi Jendoguba-kyläs, kudamas oli roinnuhes da kazvanuh A. N. Paškov.

Belomorskas da Pol’šan Vongrovec-linnas A. N. Paškovan kunnivokse azetettih mustopaččahat. Hänen nimi oli annettu lagevole Vongrovec-linnas (sai uvven nimen). Hänen nimen suadih sežo uuličču da puusto Belomorskas. A. N. Paškovan kuva on Nevvostoliiton urhomiehien gallereis Petroskois, se avattih vuvvennu 1977 Antikazen da Ruskien uuličan lohkol[2].

Roindukyläs Jendoguba säilyi kodi, kudamas oli roinnuhes da elänyh vuodessah 1925 Nevvostoliiton urhomies A. N. Paškov[12], kodi on Karjalan tazavallan soda-histouriellizen perindön objektannu[13].

Huomavukset

  1. ↑ Nygöi Belomorskan piiri, Karjalan tazavaldu.
  2. ↑ 1 2 3 4 5 6 7 8 9 10 11 12 13 14 15 16 17 18 Andrei Paškov (рус.). Muan urhomiehet -verkosivusto.
  3. ↑ 1 2 3 Наградной лист А. Н. Пашкова с представлением в ордену Красного Знамени в электронном банке документов «Подвиг народа» (архивные материалы ЦАМО. Ф. 33. Оп. 682523. Д. 1. Л. 175).
  4. ↑ 1 2 3 4 5 6 Наградной лист А. Н. Пашкова с представлением к званию Героя Советского Союза в электронном банке документов «Подвиг народа» (архивные материалы ЦАМО. Ф. 33. Оп. 793756. Д. 36. Л. 182).
  5. ↑ 1 2 3 4 5 6 Бацер И. М. Друзья комбрига / Кошкина, 2010.
  6. ↑ 1 2 3 Наградной лист А. Н. Пашкова с представлением в ордену Отечественной войны I степени в электронном банке документов «Подвиг народа» (архивные материалы ЦАМО. Ф. 33. Оп. 682526. Д. 616. Л. 17).
  7. ↑ Бацер И. М. В передовом отряде / Кошкина, 2010.
  8. ↑ Наградной лист А. Н. Пашкова с представлением в ордену Красной Звезды в электронном банке документов «Подвиг народа» (архивные материалы ЦАМО. Ф. 33. Оп. 686044. Д. 2857. Л. 23).
  9. ↑ Уроженцам и жителям Карелии – Героям Советского Союза – присвоены звания Почетных граждан республики (рус.). Официальный интернет-портал Республики Карелия. Kačondan päivymiäry: 21. elokuudu 2026.
  10. ↑ Информация в электронном банке документов ОБД «Мемориал» (архивные материалы ЦАМО. Ф. 33. Оп. 11458. Д. 844)
  11. ↑ 1 2 Евгений Норейко. Наш комбриг / Кошкина, 2010.
  12. ↑ Ендогуба. Карелия. Туристский портал. Kačondan päivymiäry: 16. syvyskuudu 2014.
  13. ↑ Объекты военно-исторического наследия на территории Республики Карелия, связанные с именами Героев Советского Союза. Объекты историко-культурного наследия Карелии. Kačondan päivymiäry: 16. syvyskuudu 2014. Arhiviiruittu 23. tuhukuudu 2020

Kirjalližus

  • Кликачев А. В огне сражений. [О Герое Советского Союза А. Н. Пашкове]. — Петрозаводск, Карел, кн. изд., 1962. — 84 с. с илл.
  • Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
  • Бацер И. М. Пишу на броне: повесть о комбриге. Петрозаводск, 1979. — 245 с.
  • Герои земли советской. 2-е изд., испр., доп. Петрозаводск, 1968. — С. 216—240.
  • Героям Родины — слава! 3-е изд., испр., доп. Петрозаводск, 1985. — С. 274—275.
  • Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. С.352—464 с.: ил., карт. ISBN 978-5-8430-0125-4 (т. 2)
  • Пашков Андрей Никитич : библиодайджест / Сост. С. В. Кошкина. — Беломорск : Беломорская центральная районная библиотека, 2010. — 38 с. — (Моя малая Родина).

Linkat

Lähteh - "https://olo.ruwiki.ru/w/index.php?title=Andrei_Paškov&oldid=126357259"