Jurii Padorin

Jurii Ivanovič Padorin
Roindupäivy	17. elokuudu 1926(1926-08-17)
Roindukohtu	Petroskoi, Karjalan avtonoumine socialistine nevvostotazavaldu, Nevvostoliitto
Kuolendupäivy	2. oraskuudu 1980(1980-05-02) (53 vuottu)
Kuolendukohtu	Severomorsku, Murmanskan aloveh, Nevvostoliitto
Kuulundu	Nevvostoliitto
Voiskien laji	Nevvostoliitto
Palvelun vuvvet	1943—1980
Arvonimi
Командовал	Pohjazen laivaston Poliittizen hallindon piälikkö
Torat/voinat	Suuri Ižänmualline voinu, Vilu voinu
Palkindot

Jurii Ivanovič Padorin (17. elokuudu vuvvennu 1926 — 2. oraskuudu vuvvennu 1980) on vienalazel venehel sluužii sodamies, poliittine ruadai, Pohjazen laivaston Poliittizen hallindon piälikkö (1976—1980), Nevvostoliiton urhomies (25.05.1976). Vice-admirualu (31.10.1978).

Eloskerdu

Oli roinnuhes Petroskois. Hänen lapsusaigu meni Leningruadas, kus häi loppi keskiškolan.

On Suuren Ižänmuallizen voinan ozanottai. Heinykuul vuvvennu 1943 blokuadu-Leningruadas omatahtozennu liityi Nevvostoliiton sodalaivaston palveluh, vuvvennu 1944 loppi Baltiekkulaivaston Opastusjoukon školan Kronštadtas. Sulakuus oli gidroakustiekannu Baltiekkulaivastol, händy palkittih Nahimovan medalil. Sulakuul vuvvennu 1946 Padorinua työttih ruadoh Suvi-Baltiekkulaivaston Libavskoile sodameritugikohtale. Vuvvennu 1948 työttih opastumah.

Vuvvennu 1951 loppi A. A. Ždanovan nimizen poliittizen sodameriopiston Leningruadas. Syvyskuus vuvvennu 1951 uvvessah sluuži Kronštadtas, vuvven 1952 talvikuus vuodessah 1954 oli Kronštadtan sodamerilinnoituksen poliittizen ozaston nuorižoliittolazien ruavon ozaston vahnembannu instruktorannu.

Vuvvennu 1958 loppi V. I. Leninan nimizen soda-poliitiekkuakadiemien da oli työtty ruadoh Pohjazeh laivastoh, oli vienalazen ydinvenehen «К-40» varapiälikönny poliittizes puoles, vuvves 1963 — poliittizen ozaston piälikönny — laivaston 303. kohendettavien venehien erillizen joukon varapiälikönny poliittizen puoles, vuvven 1966 syvyskuus — Pohjazen laivaston vienalazien venehien 1. laivastokunnan poliittizen ozaston varapiälikönny. Vuvves 1967 ruadoi Nevvostoliiton kommunistizen partien Keskuskomitietan hallindos, jiäjen Sodamerilaivaston ruadokundah. Vuvven 1973 heinykuus oli Pohjazen laivaston Ruskien Flavun ozaston poliittizen hallindon enzimäzenny sijahizennu. Vuvvennu 1975 loppi Akadiemizet kursit V. I. Leninan nimizen soda-poliitiekkuakadiemien tyves. Kontr-admirualu (25.04.1975).

Vuvvennu 1976 joukon vahnembannu poliittizennu ruadajannu otti ozua vienalazen kreiseran ven. «К-171»]] da vienalazen ydinvenehen ven. «К-469» matkah Pohjazes Tyynimeren laivastoh suate vienpinnale nuozemattah suvimerimatkan kauti, kolmen valdumeren kauti.

Nevvostoliiton Korgeviman Nevvoston käskys 25. oraskuudu vuvvennu 1976 johtokunnan tehtävien kunnollizes täyttämizes da niilöin aigah ozutetus urhakkahuos da rohkevuos J. I. Padorinale annettih Nevvostoliiton urhomiehen arvonimi Leninan kunnivomerkinke da Kuldaine Tiähti -medalinke.

Heinykuul vuvvennu 1976 händy pandih Sodanevvoston ozanottajakse — Pohjazen laivaston Poliittizen hallindon piälikökse.

Tuhukuul 1980 Padorinua vallittih Ven’an Federatiivizen socialistizen nevvostotazavallan Korgeviman Nevvoston 10. kučundukerähmön deputuatakse.

Kuoli vuottamattah sluužban aigua 2. oraskuudu vuvvennu 1980 Severomorskas. On pandu muah Moskovas Kuncevon kalmužimal.

Palkindot da arvonimet

• Nevvostoliiton urhomies (25.05.1976);
• Leninan kunnivomerki (1976);
• Ruskien Ruadoflavun kunnivomerki (1974);
• Ruskien Tiähten kaksi kunnivomerkii (1963, 1968);
• Medali "Bojuarvoruadolois" (1953);
• Nahimovan medali (1944);
• Medali "Leningruadan puolistamizes" (1944);
• Nevvostoliiton toizet medalit;
• Medali "Kuban Vallankumovuksen Ammundutarbehil varustettuloin voimien 20. vuozipäivy" (Kuba).

Pereh

Tuattah: Ivan Petrovič Padorin (1895 - 1980, Leningruadu), Kanzallizen voinan ozanottai, keskitysluageris Mudjug-suarel olluh. Vuvves 1923 – Karjalan avtonoumizen socialistizen nevvostotazavallan meččytevolližuon rahvahan komissuaru, Suuren Ižänmuallizen voinan aigah – rakendusbataljonan varapiälikkö "Eloksen dorogal"; vuvves 1946 – meččytevolližuon alan ruadai. Palkittih Leninan kunnivomerkil.

Muamah: Anatonina Ivanovna Padorina (1902 - 1968, Leningruadu), kodiemändy.

Akkah: L’ubov’ Mihailovna Padorina (roinnuhes vuvvennu 1926, Leningruadu), inženieru, loppi Leningruadan kinoinženieroin instituutan, eläy Moskovas.

Tytär: Ol’ga Jurjevna Padorina (roinnuhes vuvvennu 1953, Leningruadu), kielentutkii, kiändäi, filolougientiedoloin kandiduattu, loppi Moskovan valdivonyliopiston, eläy Moskovas.

Vunukku: Marija Aleksejevna Stromova (roinnuhes vuvvennu 1978, Moskovu), TV-žurnalistu, kiändäi, loppi Moskovan valdivonyliopiston, eläy Moskovas.

Musto

• Urhomiehen nimi on annettu uuličale Severomorskas, sen erähäs talois on azetettu mustolaudu
• Ruadau suuri laivu ven. «Адмирал Падорин» (ruavos vuvves 1982).
• Mustomerki urhomiehen kuvanke on azetettu Puudogas školan №3 luo (Karjalan tazavaldu) vuvvennu 2017.
• Padorinan kuva on Nevvostoliiton urhomiehien gallereis Petroskois.

Huomavukset

Kirjalližus

• Военные моряки — герои подводных глубин. — М., 2006.
• Долматов Н. Юрий Иванович Падорин // Не просто имя — биография страны. — Мурманск, 1989. — Кн. 2.
• Барсуков И. И., Йолтуховский В. М., Кондрашов А. Б. «Адмиралы и генералы Военно-морского флота. Руководители структур политической и воспитательной работы. Биографические хроники (1917—2013)». — М.: «Кучково поле», 2014. — 432 с. — ISBN 978-5-9950-0408-0.
• Сорокажердьев В. В. Они служили в Заполярье. — Мурманск: Типография «Бенефис-О», 2009. — С. 96. — 160 с. — ISBN 978-5-9900752-3-8.

Linkat

• Jurii Padorin (рус.). Muan urhomiehet -verkosivusto.