Nikolai Varlamov

Nikolai Gavrilovič Varlamov
Roindupäivy	6. pakkaskuudu 1907(1907-01-06)
Roindukohtu	Piiteri
Kuolendupäivy	25. heinykuudu 1943(1943-07-25) (36 vuottu)
Kuolendukohtu	Segežan piiri, Karjal-Suomelaine socialistine nevvostotazavaldu
Kuulundu	Nevvostoliitto
Voiskien laji
Palvelun vuvvet	1929—1943
Arvonimi
Torat/voinat	Suuri Ižänmualline voinu
Palkindot

Nikolai Gavrilovič Varlamov (1907—1943) on Ruadajien da muanruadajien Ruskien Armien seržantu, Suuren Ižänmuallizen voinan ozanottai, Nevvostoliiton urhomies (1943).

Eloskerdu

Oli roinnuhes 6. pakkaskuudu vuvvennu 1907 Piiteris Putilovan zavodan ruadajan Gavriil Varlamovan lapsekkahah pereheh. Kuvves lapses Nikolai oli nelländenny. Nikolain rodivundan jälles hänen tuattah Ven’an valdukunnan poliicien mugah rodih "uskomattomakse", pereh sit muutui Petroskoih, kus tuattah rubei ruadamah Aleksandrovskoil snar’uaduluajinduzavodal (nygöi Oniegutraktoruzavodu).

Nelläntostu vuvven ijäs, seiččemen kluasan školan loppiettuu, sil zavodal Varlamov rodih raudusepän opastujakse. Vuozinnu 1929—1931 sluuži Ruadajien da muanruadajien Ruskies Armies, sen jälles tuli järilleh ruadamah zavodale.

Suuren Ižänmuallizen voinan algupäivinny Varlamov yhtes kahten oman vellenke omas tahtos liityi Ruadajien da muanruadajien Ruskieh Armieh. Armieh händy otti Petroskoin sodakomitiettu 25. kezäkuudu vuvvennu 1941. Allus vojuičči 71. ammundudiviizies, otti ozua bojuloih rajapiirilöis Karhumäissäh, kus oli pahasti ruanittu sygyzyl vuvvennu 1941. Jälles parandamistu Varlamov kiändyi järilleh frontale. Sygyzyl vuvvennu 1943 seržantu Varlamov oli Karjalan frontan 26. armien 27. ammundudiviizien 239. ammundupolkan 9. ammunduroutan ozaston piälikönny. Ozutti iččie bojulois Karjalas.

25. heinykuudu vuvvennu 1943 Onda-joven päivännouzurannal juamalluo "Kočkoma — Rugarvi", konzu loputtih kai mahtot vihollizen dzotanke vojuijes, Varlamov peitti omal rungal sen ambrazuuran, oman hengen annandal avvutti oman ozaston saldatoile valloittua ammundukohtu. Varlamovan tevot avvutettih valloittua vihollizen tugikohtan.

Nikolai Varlamovua pandih muah velleskalmah ajotien "Kočkoma — Rugarvi" 59. kilometril (А-137). Vuvvennu 1976 hänen urhotevon kohtas (12 kilometrii liidehehpäi Onda-joven puoleh) on azetettu obelisku, ga vuvvennu 2006 mustopačas sie varrastettih. Jälles säilynyöl alustal azetettih kivimustomerki mustokirjutuksen da urhomiehen kuvan da Kuldaine Tiähti -medalinke.

Nevvostoliiton Korgeviman Nevvoston Prezidiuman käskys 25. syvyskuudu vuvvennu 1943 "johtokunnan bojutehtävien kunnollizes täyttämizes frontal germuanielazii valloittajii vastah da urhakkahuos da urholližuos" seržantu Nikolai Varlamovale annettih korgei Nevvostoliiton urhomiehen arvonimi. Händy palkittih sežo Leninan kunnivomerkil.

Palkindot da arvonimet

• Leninan kunnivomerki;
• Kuldaine Tiähti -medali;
• Karjalan tazavallan kunnivokanzalaine -arvonimi (kuoltuu, vuvvennu 2025).

Pereh

Akkah — Tatjana, tytär — Titkova Tamara Nikolajevna, vunukku — Jelena Mihailovna Ivanova, tyttövunukku — Titkova Natalja Mihailovna, brihaččuvunukku — Titkov Nikolai Mihailovič, pruavovunukku — Ivanov Andrei Stanislavovič, pruavovunukku — Ivanov Dmitrii Stanislavovič, pruavovunukku — Kan’gina Julija Nikolajevna.

Musto

• Vuvvennu 1982 Kamenii bor -kyläs (Segežan piiri) Vezisähköstansien Uikkujoven ruadajien varoih avattih Nikolai Varlamovan mustopačas (kuvanvestäi Andrei Arhipov), vuvvennu 2013 mustopačas siirrettih Petroskoih da azetettih uuličal, kudai sai urhomiehen nimen.
• N. G. Varlamovan kuva, kui kaikkien Karjalas rodivunnuzien 28 Nevvostoliiton urhomiehien kuvat, on Nevvostoliiton urhomiehien gallereis, kudai avattih vuvvennu 1977 Karjalan piälinnas Petroskois Antikazen da Ruskien uuličan lohkol.
• Varlamovan nimen sai keskisuuruine kalastuslaivu № 4352, kudai luajittih vuozinnu 1970 Rostokan verfil (Germuanien demokruattine tazavaldu).
• Vuvvennu 1958 Vienanmeren laivaston laivale ven. «Экспортлес-14» annettih uuzi Nikolai Varlamov -nimi.

Huomavukset

Kirjalližus

• Николай Варламов. — [Петрозаводск: Госиздат КФССР, 1944]. — 38, [2] с.: портр. (Герои Отечественной войны)
• Кондратьев Ф. Г. В бою на Онде. [О Герое Советского Союза пехотинце Н. Г. Варламове]. — Петрозаводск, Карел, кн. изд., 1964. — 42 с. с илл. и портр.
• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
• Бессмертные подвиги / Составители Коваленко А. П., Сгибнев А. А. — М.: Воениздат, 1980. — 351 с. — ISBN ББК 63.3(2)722 ; УДК 9(С)27(092).
• Герои земли советской / Редактор Карху Т. П.. — Петрозаводск: Карельское книжное издательство, 1968. — С. 83—96. — 367 с. — 20 000 экз.
• Героям Родины — слава! — Петрозаводск: Карелия, 1985.
• Мешкова Н. Обретение героя: [о Н. Варламове] // Притяжение подвига: Очерки. — Петрозаводск, 1988. — С. 7-16.
• Завод и люди: События. Факты. Даты. Фотографии. Очерки. Стихи. Справочные материалы / Сост. В. А. Савельев. — Петрозаводск: «Карелия», 1991—136 с.: ил. — ISBN 5-7545-0546-9

Linkat

• Nikolai Varlamov (рус.). Muan urhomiehet -verkosivusto.
• Из наградного листа
• В Муезерском районе почтили память Героя Советского Союза Николая Варламова
• Памятник в Петрозаводске
• Братская могила советских воинов на 59-м км шоссе Кочкома — Реболы
• Место подвига Героя Советского Союза Н. Г. Варламова