Aleksandr Paškov

Aleksandr Pavlovič Paškov
Roindupäivy	25. talvikuudu 1920(1920-12-25)
Roindukohtu	Käppeselgy, Kondupohjan piiri, Karjalan ruadokommuunu
Kuolendupäivy	24. sulakuudu 1945(1945-04-24) (24 vuottu)
Kuolendukohtu	Berlinas
Kuulundu	Nevvostoliitto
Voiskien laji	Nevvostoliiton Sodamerilaivasto
Palvelun vuvvet	1939—1945
Arvonimi
Torat/voinat	Suuri Ižänmualline voinu
Palkindot

Aleksandr Pavlovič Paškov (25. talvikuudu vuvvennu 1920 — 24. sulakuudu vuvvennu 1945) on Nevvostoliiton urhomies, 1. stat't'an vahnembi.

Eloskerdu

Oli roinnuhes muanruadajien pereheh, loppi seiččemen kluasan školan da fubrikkuzavodan školan Kondupohajas. Ruadoi mašinistan abuniekannu Kirovan raududorogal, Käppesellän kylänevvoston piälikönny, Karhumäin nuorižoliiton piirikomitietas.

Vuvvennu 1939 Paškovua kučuttih Ruadajien da muanruadajien Ruskieh laivastoh, sluuži Pohjazen laivaston laivoil.

Suuren Ižänmuallizen voinan allettuu, kezäkuun 1941 päiväs, kuului merijalguvägijoukkoh, otti ozua Moskovan torah, oli ruanittu da palkittu Rohkevuos-medalil.

Jälles gospitalis parandamistu sluuži Volgan sodalaivaston katieran piälikönny, otti ozua Stalingruadan puolistukseh, oli jygiesti ruanittu.

Jälles gospitalis parandamistu Dnepran sodalaivastoh kuulujannu otti ozua Valgoven’an piästämizeh, Visla-Oderan rynnäköl otandah.

Berlinan rynnäköl otandas 24. sulakuudu vuvvennu 1945 vihollizen joukkoammundan aigah poluglisseran piälikkö Aleksandr Paškov varmisti 5. iškuarmien edujoukkoloin siirrändiä Špree-joven päivänlaskurannale, oli ruanittu kädeh, ga ohjavorattahan tagan suatoi katieran randassah. Yhtes ilmudesantujoukkoloin saldatoinke yhtyi bojuh vihollizenke, otti ozua atuakkah da sai surman faustpatronan räjähtykses.

Nevvostoliiton Korgeviman Nevvoston Prezidiuman käskys 31. oraskuudu vuvvennu 1945 Dnepran laivaston 1. Bobruiskoin jogilaivoin joukon poluglisseroin 1. erillizen joukon poluglisseran piäliköle 1. stat’t’an vahnembale Aleksandr Paškovale annettih Nevvostoliiton urhomiehen arvonimi johtokunnan tehtävien kunnollizes täyttämizes da urhakkahuos da urholližuos. Oli palkittu Leninan kunnivomerkil.

Enzimäi Paškovua pandih muah Kystrin-linnah, Germuanien Brandenburgan provincies (nygöi Kostšin-na-Odre, Pol’šu)*. Sit oli pandu muah velleskalmah № 123 sodakalmužimal Gožuv-velikopol’ski-linnas (Val’čakan uuličču), L’bušskoi vojevodstvu, Pol’šu**. Ketonaf on azetettu kalmužimal № 1 Karjalan tazavallan Kondupohjan linnas.

Pereh

Muamah — Agafja Ivanovna Paškova, sizär — Aleksandra.

Palkindot da arvonimet

• Leninan kunnivomerki;
• Kuldaine Tiähti -medali;
• Karjalan tazavallan kunnivokanzalaine -arvonimi (kuoltuu, vuvvennu 2025).

Musto

• Urhomiehen arvonimi on annettu uuličale Karjalan tazavallan Kondupohjan linnas;
• Aleksandr Paškovan kuva on Nevvostoliiton urhomiehien gallereis Petroskois;
• Ven’an soda-histourielline yhtistys azetti mustolavvan Paškovan mustokse Kondupohjan piirin Käppesellän keskiškolan taloil, sie opastui Paškov;
• Vuvvennu 1958 Vienanmeri-Oniegan laivaston laivale ven. "Экспортлес-12" annettih Aleksandr Paškovan nimi.

Huomavukset

Kirjalližus

• Кутькова М. А. Отважный моряк. [Герой Советского Союза А. Пашков]. — Петрозаводск, Карел, кн. изд., 1964. — 60 с. с илл.
• Кутькова М. Корабли штурмуют бастионы. — Петрозаводск, 1964.
• Кликачёв А. От Невы до Одера: [Очерк о Герое Совет. Союза А. Н. Пашкове] // Карелия. Годы. Люди: Сб. очерков. — Петрозаводск, 1967. — С. 187—197.
• Герои земли советской. — Петрозаводск: Карельское книжное издательство, 1968. — С. 201—215. — 367 с. — 20 000 экз.
• Боков Ф. Подвиг моряков на Шпрее // Военно-исторический журнал. 1971. № 1.
• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.

Linkat

• Aleksandr Paškov (рус.). Muan urhomiehet -verkosivusto.
• Из наградного листа.